ވޮޝިންޓަން (އޮކްޓޯބަރު 30): އެމެރިކާގެ ޑިމޮކްރަޓިކް ޕާޓީގެ ރިޔާސީ ކެނޑިޑޭޓު ހިލަރީ ކްލިންޓަންގެ އާ އީމެއިލްތަކެއް އެފްބީއައިއިން ތަހުގީގު ކުރަން ފެށިކަން އިއުލާން ނުކުރުމަށް އެގައުމުގެ ޖަސްޓިސް ޑިޕާޓްމެންޓުން އެފްބީއައިއަށް ލަފާ ދިން ކަމަށް އެޑިޕާޓްމެންޓުގެ އޮފިޝަލުން ބުނެފި އެވެ.
ޖަސްޓިސް ޑިޕާޓްމެންޓުން އެފަދައިން ލަފާ ދީފައި ވަނީ ރިޔާސީ އިންތިހާބާ ގާތްވެފައި ވަނިކޮށް އެފަދަ މައުލޫމާތު އާއްމު ކުރުމުން އޭގެ އަސަރު އިންތިހާބަށް ކޮށްފާނެތީ ކަމަށް އޮފިޝަލުން ބުންޏެވެ.
ނަމަވެސް ޖަސްޓިސް ޑިޕާންޓްމެންޓުގެ ލަފަޔާ ދެކޮޅަށް އެފްބީއައިގެ ޑިރެކްޓަރު ޖޭމްސް ކޯމީ ވަނީ ހިލަރީގެ އާ އީމެއިލްތަކެއް ތަހުގީގު ކުރަން ފަށާފައިވާ ކަން މިދިޔަ ހުކުރު ދުވަހު ކެބިނެޓަށް އަންގާފައެވެ. އޭނާ ވިދާޅުވި ގޮތުގައި އެމައުލޫމާތު ހިއްސާ ނުކުރުމަކީ އާއްމުންނަށް އޮޅުވާލުމެވެ.
އެފްބީއައިގެ އެ ނިންމުމާ ގުޅިގެން ޑިމޮކްރަޓިކް ޕާޓީގެ އިސް ލީޑަރުން ވަނީ އެ ތަހުގީގާ ބެހޭ އިތުރު ތަފްސީލު އާއްމުންނަށް މާދަމާ އެންގުމަށް ކޯމީގެ ފަރާތުން އެދިފައެވެ.
ހިލަރީ ވިދާޅުވި ގޮތުގައި އެކަށީގެންވާ މައުލޫމާތާ ނުލައި ކޯމީ އާ ތަހުގީގެއް ފައްޓަވާކަން އެންގެވުމަކީ ވަރަށް އާދަޔާ ހިލާފު ކަމެކެވެ. އަދި އޭގެ ސަބަބުން އޭނާއަށް ވަރަށް އުނދަގޫވާ ކަމަށާއި އެފްބީއައިއިން ތަހުގީގާ ބެހޭ ހުރިހާ މައުލޫމާތެއް ވަގުތުން ހިއްސާ ކުރުމަށް ހިލަރީ ގޮވާލެއްވި އެވެ.
އެމެރިކާގެ ސެކްރެޓަރީ އޮފް ސްޓޭޓުގެ ގޮތުގައި ހިލަރީ ހުންނެވި އިރު ރަސްމީ ބޭނުންތަކަށް ބޭނުން ކުރެއްވި އަމިއްލަ އީމެއިލް ސާވާއާ ގުޅުން ހުރި އީމެއިލްތަކެއް އެފްބީއައިއިން އަނެއްކާވެސް ތަހުގީގު ކުރަން ފަށާފައި ވަނީ އެމައްސަލައިގައި ހިލަރީއާ ދެކޮޅަށް ޖިނާއީ ދައުވާ ނުކުރެވޭނެ ކަމަށް އެފްބީއައި އިން ނިންމިތާ ހަތަރު މަސް ފަހުންނެވެ. (ސީއެންއެން)