މޯލްޑިވްސް ޕޫލް ބިލިއާޑް އެސޯސިއޭޝަން (އެމްޕީބީއޭ) އިން އިންތިޒާމްކޮށްގެން ކުރިއަށްގެންދާ ގައުމީ 8 ބޯލް ބިލިއާޑް ޗެމްޕިއަންޝިޕްގެ ފައިނަލަށް މުހައްމަދު ޝަރީފާއި ހުސައިން ފަޔާޒް ދަތުރުކޮށްފި އެވެ.
އެ މުބާރާތުގެ ފައިނަލްގެ ޖާގަތައް ޝަރީފާއި ފަޔާޒަށް ކަށަވަރުވެފައިވަނީ އެމްޕީބީއޭ ކްލަބު ހައުސްގައި ރޭ ކުޅުނު މެޗުތަކަށްފަހު އެވެ.
ރޭ ކުޅުނު ސެމީ ފައިނަލުގެ ފުރަތަމަ މެޗުގައި ބައްދަލުކޮށްފައިވަނީ ޝަރީފާއި ފަޔާޒެވެ. އެ މެޗު 7-4 ފްރޭމް އިން ކާމިޔާބުކޮށް، ސެމީގެ ފުރަތަމަ ޖާގަ ކަށަވަރުކޮށްފައިވަނީ ޝަރީފެވެ. ރޭ ކުޅުނު މެޗުގައި އަލީ ޝާވިން އަތުން 7-3 ފްރޭމް އިން މޮޅުވެ، ހަސަން ޝާޒް މުހައްމަދު ވަނީ ސެމީއަށް ދަތުރުކޮށްފައެވެ.
ސެމީގެ ދެ ވަނަ މެޗުގައި ޝާޒް ނުކުތީ ފުރަތަމަ ސެމީން ބަލިވި ފަޔާޒާ ދެކޮޅަށެވެ. އެ މެޗު 7-4 ފްރޭމް އިން ކާމިޔާބުކޮށް، ފައިނަލުގެ ފަހު ޖާގަ ކަށަވަރުކޮށްފައިވަނީ ފަޔާޒެވެ.
ޑަބަލް އެލިމިނޭޝަން އުސޫލުން ކުރިއަށްދާ ގައުމީ 8 ބޯލް ބިލިއާޑް މުބާރާތުގެ ފައިނަލުގައި ޝަރީފާއި ފަޔާޒް ބައްދަލުކުރުމަށް ހަމަޖެހިފައިވަނީ މާދަމާ ރޭ 8:00 ގައެވެ.