ފުލުހުންގެ މުއައްސަސާގައި އުފައްދާފައިވާ ފުލުހުންގެ ވެލްފެއަރ ފަންޑަށް ލިބޭ ފައިސާ އާއި އެހީ ބޭނުންކުރާނެ ގޮތުގެ އުސޫލު އެކުލަވާލައި ފުލުހުންގެ ތެރޭގައި ޢާއްމު ކޮށްފިއެވެ.
އެ އުސޫލު އެކުލަވާލާފައިވަނީ ފުލުހުންނަށާއި ފުލުހުންގެ މުއައްސަސާގައި މަސައްކަތްކުރާ މުވައްޒަފުންނަށް ފޯރުކޮށްދެވޭ އެހީއަކީ ހަމަހަމަ ކަމާއި އިންސާފުވެރިކަމާއެކު ދެފުށް ފެންނަ ސިޔާސަތެއްގެ ދަށުން ފޯރުކޮށްދެވޭ އެހީއަކަށް ހެދުމުގެ މަގްސަދުގައި ކަމަށް ފުލުހުން ބުނެއެވެ.
މި އުސޫލުގައި ވާގޮތުން ފުލުހުންގެ ވެލްފެއަރ ފަންޑުގެ އެހީއަށް އެދި ހުށަހަޅަން ވާނީ އެ މުއައްސަސާގެ އެޗްއާރު ޑިޕާޓްމެންޓަށެވެ.
"ފުލުހުންގެ ވެލްފެއަރ ފަންޑުން ޚަރަދު ކުރެވޭނީ އަންނަނިވި ދާއިރާތަކުން ކަމަށް މި އުޞޫލުގައި ވަނީ ކަނޑައަޅާފައެވެ. އެ ދާއިރާތަކަކީ ފުލުހަކު ނުވަތަ މުވައްޒަފަކު ނުވަތަ ޢާއިލާގެ މެމްބަރަކަށް ދިމާވާ ޞިއްޙީ ބޮޑެތި ކަންކަމަށް ބޭސްފަރުވާ ކުރުމާއި، ފުލުހުންގެ ޚިދުމަތުގައި ރަސްމީ ޑިއުޓީގައި އުޅެނިކޮށް ޝަހީދުވާ ފުލުހުންގެ ދަރިންނަށް އެހީތެރިކަން ފޯރުކޮށްދިނުމަށާއި، ފުލުހުންގެ ޚިދުމަތުގައި ރަސްމީ ޑިއުޓީގައި އުޅެނިކޮށް ލިބޭ އަނިޔާ ނުވަތަ ގެއްލުންތަކަށް ދިގު މުއްދަތަކަށް ބޭސްފަރުވާ ކުރަންޖެހުމުން އެހީތެރިކަން ފޯރުކޮށްދިނުމާއި، ފުލުހުންގެ ވަޒީފާއިން ޝަރަފުވެރިކަމާއެކު ރިޓަޔަރ ކޮށްފައިވާ މީހުންނަށް ބޭސްފަރުވާ ކުރުމާއި، އެފަދަ ފަރާތްތަކަށް ކުއްލިއަކަށް ދިމާވާ ކަންކަމުގައި އެހީތެރިކަން ފޯރުކޮށްދިނުމާއި، ޕޮލިސް ކުލަބާއި ޕޮލިސް ވެލްފެއަރ އެސޯސިއޭޝަނުން ހިންގާ ޙަރަކާތްތަކުގައި އެހީތެރި ވުމާއި، މުއައްސަސާ ފެންވަރުގައި ކުރެވޭ ކަންކަމުގެ ތެރެއިން ކޮމިޝަނަރ އޮފް ޕޮލިސް ކަނޑައަޅުއްވާ ކަންކަމުގައި އެހީތެރި ވުމެވެ."
މި އުސޫލުގައި ބުނާގޮތުން ފުލުހުންގެ ވެލްފެއަރ ފަންޑުން ހަރަދު ކުރާނެ ގޮތާއި ޚަރަދުކުރާނެ މިންވަރު އެއަހަރަކަށް ކަނޑައަޅައި އެކަން ކޮމިޝަނަރ އޮފް ޕޮލިސް އިޢުލާނު ކުރައްވަން ޖެހެއެވެ.
ފުލުހުން ބުނީ، އުސޫލު މޯލްޑިވްސް ޕޮލިސް ސާވިސްގެ މެނޭޖްމަންޓް ބޯޑުން ފާސްކޮށް ފުލުހުންގެ ތެރޭގައި އިޢުލާނުކޮށްފައިވުމާއެކު މި އުޞޫލަށް މިހާރު އަމަލު ކުރަމުން ދާ ކަމަށެވެ.
ޕޮލިސް ވެލްފެއަރ ފަންޑުގެ އުސޫލު އެކުލަވާލެވުމާއެކު އެ ފަންޑަށް ލިބޭ ފައިސާއިން ހަރަދުކޮށްގެން 1438 ވަނަ އަހަރު ދެ މުވައްޒަފަކު ހައްޖަށް ފޮނުއްވަން ނިންމަވައި، ސީޕީ އަރީފް ވަނީ އެކަން އިއުލާންކުރައްވާފައެވެ.