އިލެކްޓްރޯނިކް ވޯޓިންއާ ގުޅިގެން އުފެދުފައިވާ ކަންބޮޑުވުންތައް ހައްލުކޮށްދޭނެ ކަމަށާއި ހުރިހާ ޕާޓިއަކުންވެސް އިންތިހާބުތަކުގައި ވާދަކުރާނެ ކަމަށް އުންމީދު ކުރައްވާ ކަމަށް އިލެކްޝަން ކޮމިޝަނުން ބުނެފިއެވެ.
އިލެކްޓްރޯނިކް ވޯޓިން ނުވަތަ އިވޯޓިން ބޭނުންކުރާ އިންތިހާބުތަކުގައި ބައިވެރި ނުވާން އިދިކޮޅު އެމްޑީޕީން އިއްޔެ ވަނީ ރަސްމީކޮށް ނިންމާފައެވެ.
އެކަމާ ގުޅިގެން ސަންއިން ކުރި ސުވާލަކަށް ޖަވާބު ދެއްވަމުން އިލެކްޝަންސް ކޮމިޝަންގެ މެމްބަރު އަހުމަދު އަކްރަމް ވިދާޅުވީ އިންތިހާބީ ކަންކަމުގައި ސިޔާސީ ޕާޓީއެއްގެ ކަންބޮޑުވުން އުޅޭނަމަ އެއީ އެކޮމިޝަނުން ވަރަށް ބޮޑަށް ބަލާނެ ކަމެއް ކަމަށާއި އެކަންބޮޑުވުންތައް ހައްލުކޮށްދޭނެ ކަމަށެވެ.
"އަޅުގަނޑުމެން ޔަގީން ކުރަން ހުރިހާ ޕާޓީއަކުން ވެސް އިންތިހާބުތަކުގައި ބައިވެރިވާނެ ކަމަށް. ދެވެން އޮތް ހުރިހާ އެއްބާރުލުމެއް ދޭނަން،" އަކްރަމް ވިދާޅުވިއެވެ.
ރާއްޖެއަކީ އާބާދީގެ ނިސްބަތުން އެންމެ ގިނައަދަދެއްގެ ބަޔަކު ވޯޓުލާ ގައުމަކަށްވާއިރު ކުރިއަށްއޮތްތަނުގައިވެސް އެކަން ތަކުރާރު ކުރުމަށް ގިނަގުނަ މަސައްކަތްތަކެއް ކުރާނެ ކަމަށް އަކްރަމް ވިދާޅުވިއެވެ.
އީވޯޓިންގެ ސަބަބުން ނަތީޖާއަށް އޮޅުވާލުމުގެ ފުރުސަތު އޮންނާނެ ކަމަށް އެމްޑީޕީން ވަނީ ބުނެފައެވެ.
އަކްރަމް ވިދާޅުވީ އެސިސްޓަމްގެ ތެރެއިން އިންތިހާބަށް މަކަރު ނުހެދޭނެ ކަމަށާއި އެސިސްޓަމް ތަޖުރިބާކުރުމުގެ ފުރުސަތު ދޭނެ ކަމަށެވެ.