ފްރާންސްގައި މިފަހަރުގެ ޔޫރޯގައި އައިސްލޭޑް މެޗުތައް ކުޅުނު ދަނޑުތަކުން އެ ފެނުނު "ވައިކިން ކްލެޕް" މިހާރު މި ވަނީ ވިލާތު ފަހަނައަޅައި ރާއްޖެ އައިސްފައެވެ. ބަޑިބަޑި ތަޅަމުން އެ ޖޯޝީފޯރި ގާދޫކޮލުން ވަދެގެން އައިސް ކައިރި ކުރީ ވެރިރަށް މާލެއަކަށް ނޫނެވެ. ރާއްޖޭގެ އުތުރުގެ ޝަހުސިއްޔަތު ހާމަކޮށްދޭ އަދި ހދ. އަތޮޅުގެ ވެރިކަންކުރާ ކުޅުދުއްފުށި "ތަރަތަރަ" އަޅަމުންދަނީ އެ ފޯރީގައެވެ.
ފްރާންސްގައި މިފަހަރު ނިމިދިޔަ ޔޫރޯ 2016 ފުޓްބޯޅަ މުބާރާތުގައި ގިނަބަޔަކު ހީނުކުރާ ފަދަ ނަތީޖާތަކެއް ނެރުނު ގައުމަކީ ރާއްޖެފަދަ ކުޑަކުޑަ އާބާދީއެއް އޮންނަ އައިސްލޭންޑެވެ. އައިސްލޭންޑުގެ ފުޓްބޯޅަ ޓީމުން ޔޫރޯގައި ދެއްކި ހައިރާން ކުރުވަނިވި ކުޅުމާއެއްވަރަށް ފާހަގަ ކުރެވުނު އަނެއް ކަމަކީ އެ ޓީމުގެ ސަޕޯޓަރުންގެ އެ ހިތްގައިމު ފޯރިގަދަ ތަރުހީބުގެ އަތްތިލަބަޑި ޖެހުމެވެ. އެ ތަރުހީބަކީ، މިފަހަރު ޔޫރޯގައި މުޅިން އަލަށް ވާދަކޮށް މުބާރާތުގެ ކުއާޓާ ފައިނަލާ ހަމައަށް ދަތުރުކުރި އައިސްލޭންޑްގެ އެ ކާމިޔާބީގެ އެންމެ މުހިއްމު ބައެވެ.
ފްރާންސްގައި މިފަހަރު ބޭއްވި ޔޫރޯ 2016 ފުޓްބޯޅަ މުބާރާތުގައި އައިސްލޭންޑްގެ ސަޕޯޓަރުން އެޓީމަށް ތަރުހީބުދެނީ -- ފޮޓޯ: އައިސްލޭންޑްމެގް
"ވައިކިން ކްލެޕް" ނިސްބަތްވަނީ ، މީލާދީން 9 ވަނަ ގަރުނުގައި އައިސްލޭންޑު ހޯދައި، އެތަނުގައި ވަޒަންވެރިވި ސްވިޑެންގެ ވައިކިން ދަރިކޮޅުގެ މީހުންނަށެވެ. އައިސްލޭންޑްގެ އާބާދީއަކީ ގާތްގަނޑަކަށް 332،000 މީހުންނެވެ.
ހދ. ކުޅުދުއްފުށީ ޒޯން ސްޓޭޑިއަމްގައި މިހާރު ކުރިއަށްދާ ހދ. އަތޮޅު ފުޓްބޯޅަ މުބާރާތުގައި މިދިޔަ ހޮނިހިރު ދުވަހު ހަނިމާދުއާ ދެކޮޅަށް އަދި އަންގާރަ ދުވަހު، އެ އަތޮޅު ނެއްލައިދޫއާ ދެކޮޅަށް ކުޅުދުއްފުށި ކުޅުނު އެސްޓީއޯ މިނިވަން 50 ޗެމްޕިއަންޝިޕު ފުޓްބޯޅަ މުބާރާތުގެ މެޗުތައް ކުރިއަށް ދިޔައިރު ކުޅުދުއްފުށީ ސަޕޯޓަރުން ދިޔައީ އެ ޓީމަށް މެދުކެނޑުމެއް ނެތި ތަރުހީބުދެމުންނެވެ.
މިދިޔަ ހޮނިހިރު ދުވަހު ކުޅުނު، ކުޅުދުއްފުށި ހަނިމާދޫ މެޗުގެ ވީޑިއޯ ކްލިޕެއް
(ވީޑިއޯ އައިވެލް ޕޯޓްރެއިޓް)
ފަހަރެއްގަައި ބަލާބެލުމަށް މިއީ މާލޭ ގައުމީ ފުޓްބޯޅަ ދަނޑުގައި ރާއްޖޭގެ ގައުމީ ފުޓްބޯޅަ ޓީމު ބޭރުގެ ޓީމަކާ ދެކޮޅަށް މެޗެއް ކުޅެމުން ދިޔަވަގުތުގެ މަންޒަރެކޭ ވެސް ހީވެދާނެެއެވެ. މީގެ ކުރީން ބޮޑެތި މެޗުތަކުގައި މާލޭ ގަލޮޅު ފުޓްބޯޅަ ދަނޑުން ސަޕޯޓަރުން ފެންނަ ގޮތަށް ކުޅުދުއްފުށީ ދަނޑުގައި އެ މެޗު ކުރިއަށްދިޔަ އިރު ގިނަ އަދަދެއްގެ ސަޕޯޓަރުން އެއްވެ އެ މީހުންގެ ޓީމަށް ތަރުހީބުދެމުން ދިޔައެވެ. ނަމަވެސް މީގެ ކުރީން ނުފެންނަފަދަ ގޮތަކަށެވެ.
ކުޅުދުއްފުށި ސަޕޯޓަރުން -- ފޮޓޯ: އައިވެލް ޕޯޓްރެއިޓް
ލަސްލަހުން ވަކި ހަމައަކަށް ބެރުޖަހަމުން ދާއިރު އޭގެ ފުނައާއެކު ސަޕޯޓަރުންގެ ދެއަތް މައްޗަށް ނަގައި، އެއް ވާނަކަށް ބެރުގެ ފުނައާ އެއްވަރަށް އަތްތިލަބަޑި ޖަހަމުންދާއިރު ސިފަވެގެން ދިޔައީ ހަމަ މިފަހަރުގެ ޔޫރޯގައި އައިސްލޭންޑްގެ މެޗުތައް ކުޅެމުންދިޔައިރު އެޓީމުގެ ސަޕޯޓަރުން ގައުމީ ރޫހެއްގައި ޖަހަމުން ދިޔަ، "ވައިކިން ކްލެޕް"އެވެ. އެ މަންޒަރު ރެކޯޑްކޮށް ގިނަ ބަޔަކު ދަނީ ސޯޝަލް މީޑިއާގައި ޝެއާކުރަމުންނެވެ.
މިދިޔަ އަންގާރަ ދުވަހު ކުޅުނު ކުޅުދުއްފުށި ނެއްލައިދޫ މެޗުގެ ވީޑިއޯ ކްލިޕެއް
(ވީޑިއޯ އައިވެލް ޕޯޓްރެއިޓް)
ގާތްގަނޑަކަށް 9500 މީހުންގެ އާބާދީއެއް އޮންނަ ކުޅުދުއްފުށީ ސަޕޯޓަރުން ވަތަނީ ރޫހެއްގައި އެމީހުންގެ ޓީމަށް އާދަޔާ ޚިލާފު ތަރުހީބަކާއި ހިތްވަރެއް ދެމުން ގެންދިޔައިރު، އަންގާރަ ދުވަހު ކުޅުނު މެޗުގެ 24 ވަނަ މިނިޓްގައި ކުޅުދުއްފުޓަށް އެ ޓީމުގެ ފުރަތަމަ ލަނޑު ޖަހައިދިނީ އަހްމަދު ނަދީމެވެ. އަދި 75 ވަނަ މިނިޓްގައި ފަރުހަތު މުހައްމަދު ވަނީ އެ ޓީމުގެ ދެ ވަނަ ލަނޑު ކާމިޔާބުކޮށްދީފައެވެ. މެޗު ނިމުނީ 2-0 ލަނޑުން ނެއްލައިދޫގެ މައްޗަށް ކުޅުދުއްފުށިން ކާމިޔާބު ހޯދައިގެންނެވެ. މުޅި ރަށަށް އާދަޔާޚިލާފު ފޯރިއަކާއި އުފާވެރިކަމެއް ގެނެސްދެމުންނެވެ.
މުބާރާތުގައި ކުޅުދުއްފުށި ކުޅުނު ފުރަތަމަ މެޗުގައި އޯގަސްޓް ހަތަރު ވަނަ ދުވަހު ވާދަ ކުރީ ހދ. އަތޮޅުގެ އެންމެ ފަހުގެ ޗެމްޕިއަން ނޮޅިވަރަމާ ދެކޮޅަށެވެ. ކުޅުދުއްފުށީ ޓީމުން ވަނީ ފަސޭހަކަމާއެކު 3-0ގެ ނަތީޖާއަކުން ނޮޅިވަރަމް ބަލިކޮށްފައެވެ. އަދި އެޓީމު ކުޅުނު ދެވަނަ މެޗުގައި މިދިޔަ ހޮނިހިރު ދުވަހު ހަނިމާދުއާ ވާދަކޮށް ވަނީ 1-1 ން އެއްވަރުވެފައެވެ. އަދި ގްރޫޕް ސްޓޭޖްގައި އެޓީމު ކުޅުނު ފަހު މެޗުގައި މިއަދު ނޭކުރެންދޫއާ ވާދަކޮށް 1-1 ލަނޑުން އެއްވަރުވެ ކުޅުދުއްފުށީ ޓީމުވަނީ، ކުޅުނު 4 މެޗްގެތެރޭން 2 މެޗުން މޮޅުވެ 2 މެޗުން އެއްވަރުވެ 8 ޕޮއިންޓާއެކު މުބާރާތުގެ ފައިނަލުން ޖާގައެއް ކަށަވަރުކޮށްފައެވެ. ރަށުގެ ކުޅުންތެރީން ދެއްކި މޮޅު ކުޅުމަށް ހިތްވަރުދީ އިތުރު ޖޯޝެއް ގެނެސްދިން "12 ވަނަ ކުޅުންތެރިޔާ"ގެ ދައުރު ކުޅުދުއްފުށީ ރައްޔިތުން ކިތަންމެހާވެސް ރަނގަޅަށް އަދާކުރިއެވެ. އަދި އޭގެ ނަތީޖާވެސް އެހާމެ ފޮންޏެވެ.
ކުޅުދުއްފުށި ނެއްލައިދޫ މެޗުގައި ކުޅުދުއްފުޓަށް އެޓީމުގެ ދެވަނަ ލަނޑު ޖަހައިދިނީ ފަރުހަތު މުހައްމަދު -- ފޮޓޯ: އައިވެލް ޕޯޓްރެއިޓް
މި އަހަރުގެ މިނިވަން 50 ފުޓްބޯޅަ މުބާރާތުގައި ހދ. އަތޮޅުން ބައިވެރިވެފައިވަނީ ޖުމުލަ ފަސް ޓީމެވެ. އެއީ އެންމެ ފަހުގެ ޗެމްޕިއަން ނޮޅިވަރަމާއި، ކުޅުދުއްފުށި، ހަނިމާދޫ، ނެއްލައިދޫ އަދި ނޭކުރެންދޫއެވެ.
ރާއްޖޭގައި ފުޓްބޯޅަ ބަލާ އެންމެ ބޮޑު އާބާދީއެއް އޮންނަނީ ވެރިރަށް މާލޭގައެވެ. އަދި އެންމެ ގިނަ ކްލަބްތައް ވެސް އޮންނަނީ މާލޭގައެވެ. އެންމެ އާބާދީ ބޮޑީވެސް މާލޭގެއެވެ. އެހެން ނަމަވެސް، ވިލާތު ފުޓްބޯޅައިގައި ސަޕޯޓަރުންގެ ފަރާތުން އެފެންނަ ކުޅިވަރުގެ ޖޯޝާއި ކުޅިވަރުގެ ރީތި ފޯރި، މާލޭގައި ތިބި ފުޓްބޯޅައިގެ ސަޕޯޓަރުންނަށް އޭގެ ފުރިހަމަ ގޮތުގައި ދެނެގަންނަން ނޭނގި ތިއްބާ، ކުޅުދުއްފުށީ ރައްޔިތުން މިވަނީ އެކަން ދަސްކޮށް ދައްކުވައިދީފައެވެ.
ރާއްޖޭގެ ފުޓްބޯޅަ ކުރިއަރުވަން ބޭނުންނަމަ، ކުޅުދުއްފުށީ ސަޕޯޓަރުން އެ ދެއްކި ފަދަ ސަޕޯޓެއް ދިވެހި ސަޕޯޓަރުންގެ ފަރާތުން އެ މީހުންގެ ކްލަބުތަކަށް ވެސް ދޭން އެބަ ޖެހެއެވެ. އޭރުން 90ގެ އަހަރު ތަކުގައި ގަލޮޅު ދަންޑުން އެ ފެނުނު ފަދަ ފޯރި އަނެއްކާވެސް ދިވެހި ފުޓްބޯޅައިގައި އާލާވެގެން ހިނގައިދާނެއެވެ.