ސްވިޑަން ތަރި ޒްލަޓަން އިބްރަހިމޮވިޗްގެ ލަނޑުން ޗެމްޕިއަން ލެސްޓާ ސިޓީ ބަލިކޮށް، މެންޗެސްޓާ ޔުނައިޓެޑުން ކޮމިއުނިޓީ ޝީލްޑް ކާމިޔާބުކޮށްފި އެވެ.
ވެމްބްލީ ސްޓޭޑިއަމްގައި މިރޭ ކުޅުނު ކޮމިއުނިޓީ ޝީލްޑް މެޗުގައި އިނގިރޭސި ޕްރިމިއާ ލީގުގެ ޗެމްޕިއަން ލެސްޓާގެ މައްޗަށް އެފްއޭ ކަޕްގެ ޗެމްޕިއަން ޔުނައިޓެޑް ކުރި ހޯދީ 2-1 ލަނޑުންނެވެ.
މެޗުގެ ފުރަތަމަ ހާފުގެ ކުރީކޮޅު ލެސްޓާ އިން ރަނގަޅު ކުޅުމެއް ދައްކައި ލަނޑު ޖަހާނެ ރަނގަޅު ފުރުސަތުތަކެއް ތަނަވަސް ކުރި އެވެ. އެގޮތުން މެޗުގެ 18 ވަނަ މިނެޓުގައި ލެސްޓާގެ ޝިންޖީ އޮކަޒާކީ އަށް ލިބުނު ފުރުސަތު ފާހަގަކޮށްލެވެ އެވެ. އޭނާ އުފެއްދި ހަމަލާ، ޔުނައިޓެޑުގެ ކުޅުންތެރިއެއް ގައިގައި ޖެހިފައި ދިޔައީ ގޯލުގެ އަރިމަތީ ދަނޑި ކައިރިން ބޭރަށެވެ.
މެޗުގެ 32 ވަނަ މިނެޓުގައި ޔުނައިޓެޑުން ވަނީ ލަނޑެއް ޖަހައި ލީޑު ހޯދައިފަ އެވެ. އެ ލަނޑު ޔުނައިޓެޑަށް ކާމިޔާބުކޮށްދިނީ ޖެސޭ ލިންގާޑް އެވެ. އޭނާ އެ ލަނޑު ކާމިޔާބު ކުރީ ވޭން ރޫނީ ދިން ބޯޅައެއް ހިފައިގެން ލެސްޓާގެ ތިން ކުޅުންތެރިއެއް ކައިރިން ނައްޓާލުމަށްފަހު އުފެއްދި ހަމަލާ އަކުންނެވެ. މެޗުގެ ފުރަތަމަ ހާފު ނިމިގެންދިޔައީ 1-0 ލަނޑުން ޔުނައިޓެޑް ކުރީގައި އޮވެގެންނެވެ.
ޔުނައިޓެޑްގެ ސްވިޑަން ތަރި އިބްރަހިމޮވިޗް ކޮމިއުނިޓީ ޝީލްޑް އުފާލައިލަނީ: ލެސްޓާ އަތުން ޔުނައިޓެޑް މޮޅުވީ އިބްރަހިމޮވިޗްގެ ލަނޑުން --- ފޮޓޯ: އޭޕީ
މެޗުގެ 52 ވަނަ މިނެޓުގައި ލެސްޓާ އިން ވަނީ ލަނޑެއް ޖަހައި، ނަތީޖާ ހަމަހަމަކޮށްފަ އެވެ. ޔުނައިޓެޑުގެ ބެލްޖިއަމް މިޑްފީލްޑަރު މާރުއާން ފެލައިނީ އަށް ހެދުނު ގޯހަކުން ލެސްޓާ އަށް އެ ލަނޑު ކާމިޔާބުކޮށްދިނީ އެ ޓީމުގެ އިނގިރޭސި ފޯވަޑް ޖެމީ ވާޑީ އެވެ.
ޔުނައިޓެޑުގެ ރަނގަޅު ދެ ހަމަލާއަކަށް ފަހު، ޔުނައިޓެޑަށް އަލުން ލީޑު ހޯދުނީ މެޗު ނިމެން ހަތް މިނެޓަށް ވެފައި ވަނިކޮށެވެ. އެންޓޯނިއޯ ވެލެންސިއާ ނަގައިދިން ހުރަހަކުން ޔުނައިޓެޑަށް އެ ލަނޑު ކާމިޔާބުކޮށްދިނީ މި ސީޒަނަށް އެ ޓީމަށް ގެނައި ފޯވަޑް އިބްރަހިމޮވިޗް އެވެ. އޭނާ އެ ލަނޑު ކާމިޔާބު ކުރީ ލެސްޓާގެ ޕެނަލްޓީ އޭރިޔާ ތެރޭގައި ހުރެފައި ބޮލުން އުފެއްދި ހަމަލާއަކުންނެވެ.