ރާއްޖެއަށް އީވޯޓިންގ ނިޒާމު ތައާރަފު ކުރުމަށްޓަކައި، ރާއްޖޭގެ އާބާދީއަކީ މައްސަލައެއް ނޫން ކަމަށް ދެކުނު އޭޝިއާ ސަރަހައްދުގެ ގައުމުތަކުގެ އިންތިޚާބީ އިދާރާތަކުން ބުނެފިއެވެ.
މިއަދު ބަނޑޮސް އައިލެންޑް ރިސޯޓުގައި ނިންމާލި، ފޯރަމް އޮފް އިލެކްޝަން މެނޭޖްމެންޓް ބޮޑީސް އޮފް ސައުތު އޭޝިއާ (ފެމްބޯސާ)ގެ ހަތްވަނަ ބައްދަލުވުމަށް ފަހު ނޫސްވެރިންނަށް މައުލޫމާތު ދެއްވަމުން އިލެކްޝަންސް ކޮމިޝަނުގެ މެމްބަރު އަހްމަދު އަކްރަމް ވިދާޅުވީ، ރާއްޖޭގައި އީވޯޓިންގް ނިޒާމު ތައާރަފު ކުރުމަށް ރާއްޖޭގެ އާބާދީގައި މައްސަލައެއް ނެތް ކަމަށް ފެމްބޯސާގެ ބައްދަލުވުންތަކުގައި ބައިވެރިވި ގައުމުތަކުގެ އިލެކްޝަންސް ކޮމިޝަނުތަކުން އެއްބަސްވި ކަމަށެވެ.
"އަޅުގަނޑުމެންނަށް އެއްބަސްވުމަކަށް އާދެވުނީ، އީވޯޓިންގ އަށް ދިއުމަށްޓަކައި ޕޮޕިއުލޭޝަންގެ އަދަދަކީ، ރާއްޖޭގެ ރައްޔިތުންގެ އަދަދަކީ މައްސަލައެއް ނޫން ކަމަށް،" އަކްރަމް ވިދާޅުވި އެވެ.
އަކްރަމް ވިދާޅުވީ، ރާއްޖޭގައި އީވޯޓިންގް ތައާރަފު ކުރުމަށް ކުރާ މަސައްކަތުގައި، ފެމްބޯސާގެ މެމްބަރު ގައުމުތަކުން ރާއްޖޭގެ އިލެކްޝަންސް ކޮމިޝަނަށް އެއްބާރުލުން ދިނުމަށް ވެސް އެގައުމުތަކުން އެއްބަސްވި ކަމަށެވެ.
ރާއްޖޭގައި އީވޯޓިންގް ތައާރަފު ކުރުމަށް އިލެކްޝަންސް ކޮމިޝަނުން މަސައްކަތް ކުރަމުންދާ އިރު، އިދިކޮޅު ސިޔާސީ ފަރާތްތަކާއި ބައިނަލްއަގުވާމީ މުޖުތަމައުން ދަނީ އެކަމާ މެދު ކަންބޮޑުވުން ފާޅު ކުރަމުންނެވެ.
ވިލާތުގެ އިއްތިހާދުން ރާއްޖެއަށް ކަނޑައަޅާފައި ހުންނަ މިޝަނުން 26 ޖުލައި ވަނަ ދުވަހު ބުނެފައިވަނީ، އީވޯޓިންގް އަކީ 350 ހާސް މީހުންގެ އާބާދީއެއް ދިރިއުޅޭ ގައުމަކާ ގުޅޭ ކަމެއް ނޫން ކަމަށާއި، އީވޯޓިންގް ނިޒާމު ތައާރަފު ކުރުމުން ރާއްޖޭގައި ޑިމޮކްރަސީ ހަރުދަނާ ކުރެވޭނެ ކަމުގެ ޔަގީންކަން ރާއްޖޭގެ އިލެކްޝަންސް ކޮމިޝަނުން އިތުރު ކޮށްދޭން ޖެހޭނެ ކަމަށެވެ.
އިލެކްޝަންސް ކޮމިޝަނުގެ ރައީސް އަހްމަދު ސުލައިމާން މީގެ ކުރިން ވިދާޅުވެފައި ވަނީ ރާއްޖޭގައި ތައާރަފު ކުރަން އުޅޭ އީވޯޓިން ސިމްޓަމްގެ ދަށުން ވޯޓުލާންޖެހޭނީ ނިމިދިޔަ އިންތިޚާބުތަކުގައި ވެސް ވޯޓު ލި ގޮތަށް ގަލަމުން ފާހަގަޖަހައިގެން ކަމަށާއި އީވޯޓިން ސިސްޓަމް ބޭނުންކުރަނީ ވޯޓު ކަރުދާސް ގުނުމަށް އެކަނި ކަމަށެވެ. އަދި އީވޯޓިން މެޝިނުން ގުނުމަށްފަހު ބޭނުންނަމަ މިހާރުވެސް ވޯޓު ކަރުދާސް ގުނަމުން އަންނަ ގޮތަށް ގުނުމުގެ ފުރުސަތު އޮންނާނެ ކަމަށް ވެސް ސުލައިމާން ވިދާޅުވިއެވެ.
އޭނާ ވިދާޅުވީ ކަމުގެ ހަގީގަތް އެނގިތިބެ ބައެއް ސިޔާސީ ޕާޓީތަކުން އީވޯޓިންއާ ބެހޭގޮތުން ރައްޔިތުންނަށް ދޮގު މައުލޫމާތުތައް ފަތުރަމުންދާ ކަމަށެވެ.
އީވޯޓިންގް އާ ގުޅޭގޮތުން އިލެކްޝަންސް ކޮމިޝަނުގެ ކުރީގެ ރައީސް ފުއާދު ތައުފީގު "ސަން" އަށް މީގެ ކުރިން ދެއްވި އިންޓަވިއުއެއްގައި ވިދާޅުވީ އީވޯޓިން ނަގާނަމަ އިލެކްޝަންސް ކޮމިޝަނުގެ މައްޗަށް ބޮޑު އިތުބާރެއް އޮންނަންޖެހޭ ކަމަށާއި އެހެން ގައުމުތަކުގައި ވެސް އެ ނިޒާމް ކާމިޔާބުވެފައި ވަނީ އެ ކޮމިޝަނަކާމެދު އޮންނަ އިތުބާރެއްގެ ސަބަބުން ކަމަށެވެ. ރާއްޖެ އިލެކްޝަން ކޮމިޝަނާމެދު އެ އިތުބާރު ނެތް ކަމަށް ފުއާދު ވިދާޅުވިއެވެ.