ކުރިއަށް އޮތް ލޯކަލް ކައުންސިލް އިންތިޚާބުގައި ތައާރަފް ކުރަން އުޅޭ އީވޯޓިން ސިމްޓަމްގެ ދަށުން ވޯޓުލާންޖެހޭނީ ނިމިދިޔަ އިންތިޚާބުތަކުގައި ވެސް ވޯޓު ލި ގޮތަށް ގަލަމުން ފާހަގަޖަހައިގެން ކަމަށް އިލެކްޝަންސް ކޮމިޝަންގެ ރައީސް އަހްމަދު ސުލައިމާން ވިދާޅުވެއްޖެ އެވެ.
އިލެކްޝަންސް ކޮމިޝަނުން ހއ. ހޯރަފުށީގައި ކުރިޔަށް ގެންދިޔަ ޑިމޮކްރަސީ ހަފްތާގެ ނިމުން ފާހަގަކުރުމަށް މިރޭ ސްޓެލްކޯގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން ސުލައިމާނު ވިދާޅުވީ އީވޯޓިން ސިސްޓަމް ބޭނުންކުރަނީ ވޯޓު ކަރުދާސް ގުނުމަށް އެކަނި ކަމަށެވެ. އަދި އީވޯޓިން މެޝިނުން ގުނުމަށްފަހު ބޭނުންނަމަ މިހާރުވެސް ވޯޓު ކަރުދާސް ގުނަމުން އަންނަ ގޮތަށް ގުނުމުގެ ފުރުސަތު އޮންނާނެ ކަމަށް ވެސް ސުލައިމާން ވިދާޅުވި އެވެ.
ހަމަ ބެލޮޓު ޕޭޕަރުގައި، ވޯޓު ކަރުދާހުގައި ފާހަގަ ޖަހާފައި ވައްޓާލެވޭނީ. ބޭނުންވެއްޖެ ހާލަތެއްގައި ފޮށި ބަންޑުން ޖަހާފައި ގުނާލެވޭ ވޯޓިންގ ސިސްޓަމެއް މިއީ އިލެކްޝަންސް ކޮމިޝަންގެ ރައީސް
އޭނާ ވިދާޅުވީ ކަމުގެ ހަގީގަތް އެނގިތިބެ ބައެއް ސިޔާސީ ޕާޓީތަކުން އީވޯޓިންއާ ބެހޭގޮތުން ރައްޔިތުންނަށް ދޮގު މައުލޫމާތުތައް ފަތުރަމުންދާ ކަމަށެވެ.
"ބައެއް ސިޔާސީ ޕާޓީތަކުން އާންމު ރައްޔިތުންނަށް އޮޅުވާލަން އީވޯޓިންއާ ބެހޭ ދޮގު މައުލޫމާތު ފަތުރާ. މިއަދު ޓެކްނޮލޮޖީގެ ގޮތުން ކުރިއަރާފައިވާ މި ދިވެހި މުޖުތަމައުގައި ކުރަން މިއީ ނާތަހުޒީބު ކަމެއް. އެބޭފުޅުން އޮޅުވާލަނީ މިކަން އެނގިތިބެ. ގަސްތުގައި ކޮމިޝަނުގެ އަގު ވައްޓާލަން. އެކަން ހަރުކަށި އިބާރާތުން އަޅުގަނޑު ކުށްވެރި ކުރަން،" ސުލައިމާން ވިދާޅުވި އެވެ.
ރާއްޖޭގައި ތައާރަފްކުރާ އީވޯޓިން ސިސްޓަމަކީ އިންޓަނެޓާ ގުޅިފައިވާ އެއްޗެއް ނޫން ކަމަށް ވެސް އިލެކްޝަންސް ކޮމިޝަންގެ ރައީސް ވިދާޅުވި އެވެ.
އޭނާ ވިދާޅުވީ، އެ ސިސްޓަމް މަސައްކަތް ކުރާ ގޮތް ރަނގަޅަށް އޮޅުން ފިލާ ކޮންމެ މީހަކު ވެސް އީވޯޓިން އަށް ތަރުހީބު ދޭނެ ކަމަށެވެ. އެގޮތުން އެ ސިސްޓަމާ ބެހޭ މައުލޫމާތު ރަށްރަށުގެ ރައްޔިތުންނަށް ރަނގަޅަށް އޮޅުން ފިލުވައިދިނުމުން އީވޯޓިން ބޭނުންކުރުމަށް މިހާރުވެސް މާ ލަސްވެއްޖެ ކަމަށް ގިނަ ބަޔަކު ބުނާ ކަމަށް ސުލައިމާން ވިދާޅުވި އެވެ.
އީވޯޓިން ސިސްޓަމް ރާއްޖެއަށް ތައާރަފު ކުރުމަށް 2011 ވަނަ އަހަރު އޮތް އިލެކްޝަންސް ކޮމިޝަނުން ވެސް ނިންމި ކަމަށް އޭނާ ވިދާޅުވި އެވެ.
"ހިތާމައަކީ، އޭރު އެކަން ނިންމެވި ބޭފުޅުން މިއަދު އެހެން ލަވައެއް ކިޔުއްވައި، އެހެން ބެރެއް ޖައްސަވާތީ. އަދި ހަގީގަތާ ޚިލާފު ވާހަކަތަކެއް ދައްކަވާތީ،" ސުލައިމާން ވިދާޅުވި އެވެ.
ކުރިޔަށް އޮތް ލޯކަލް ކައުންސިލް އިންތިޚާބުގައި އީވޯޓިން ތައާރަފު ކުރުމަށް އެ ކޮމިޝަނުން ކުރަމުންދާ މަސައްކަތް އިރާދަކުރެއްވިއްޔާ ކާމިޔާބުވާނެ ކަމަށް ސުލައިމާން ވިދާޅުވި އެވެ.
މިދިޔަ މަހު ވިލާތުގެ އިއްތިހާދުގެ ވަފުދެއް ރާއްޖެ ޒިޔާރަތްކުރި އިރު، އެ އިއްތިހާދުން ވަނީ ރާއްޖޭގައި ތައާރަފު ކުރަން އުޅޭ އީވޯޓިން ސިސްޓަމާ ބެހޭ މައުލޫމާތު ހޯމް މިނިސްޓަރު އުމަރު ނަސީރުގެ ކިބައިން ހޯއްދަވައިފަ އެވެ.
ހޯމް މިނިސްޓަރު އުމަރު ނަސީރު ވިދާޅުވީ، ރާއްޖެ އަށް ތައާރަފު ކުރަން ނިންމާފައި ވަނީ، ދެކުނު ކޮރެއާގައި ވެސް ބޭނުންކުރާ އީ ވޯޓިންގ ސިސްޓަމް ކަމަށާއި ނަމަވެސް އެ ސިސްޓަމް ތައާރަފު ކުރާނީ އެކަމަށް ރައްޔިތުންގެ އިތުބާރު ލިބި، ރައްޔިތުން އެކަމަށް އެއްބަސްވާ ނަމަ ކަމަށެވެ.
އަދި، އެ ސިސްޓަމް ބޭނުންކުރާ ގޮތް މޮނީޓަރ ކުރަން އެދޭ ބޭރުގެ ފަރާތްތަކަށް އެ ފުރުސަތު ވެސް ދެއްވާނެ ކަމަށް ހޯމް މިނިސްޓަރު ވިދާޅުވި އެވެ.