ފޯރަމް އޮފް އިލެކްޝަންސް މެނޭޖްމެންޓް ބޮޑީސް އޮފް ސައުތު އޭޝިޔާ (ފެމްބޯސާ) ގެ ހަތްވަނަ ސަރަހައްދީ ބައްދަލުވުން މިއަދު ނިންމާލައިފި އެވެ.
ބަނޑޮސް އައިލެންޑް ރިސޯޓުގައި ކުރިއަށް ގެންދިޔަ ފެމްބޯސާ ގައުމުތަކުގެ ބައްދަލުވުން މިއަދު ނިންމާލާފައިވާއިރު، އެ ބައްދަލުވުމުގައި ޖުމްލަ އަށް ގައުމަކުން ބައިވެރިވެފައިވެ އެވެ. އެ ބައްދަލުވުމުގައި ބައިވެރިވެފައިވަނީ ރާއްޖޭގެ އިތުރުން ބޫޓާން، ނޭޕާލް، ސްރީލަންކާ، އިންޑިޔާ، ޕާކިސްތާން، ބަންގްލަދޭޝް އަދި އަފްޣާނިސްތާނެވެ.
މިއަދު ހަވީރު ބައްދަލުވުން ނިންމާލާފައިވާއިރު މިއަހަރުގެ ތީމް އާ އެއްގޮތަށް ޓެކްނޮލޮޖީގެ ގޮތުން ގުޅިގެން ކުރެވެން ހުރި ހުރިހާ ކަމެއް ކުރުމަށް ހުރިހާ ގައުމަކުން އެއްބަަސްވެފައިވާ ކަމަށް އިލެކްޝަންސް ކޮމިޝަންގެ ރައީސް އަހްމަދު ސުލައިމާން ވިދާޅުވި އެވެ.
ބައްދަލުވުން ނިންމާލުމަށްފަހު ބޭއްވި ނޫސްވެރިންގެ ބައްދަލުވުމުގައި އޭނާ ވިދާޅުވީ، އީ ވޯޓިންގައި، މެމްބަރު ގައުމުތަކުން ރާއްޖޭގެ އިލެކްޝަންސް ކޮމިޝަނާ އެކު ކުރިއަށް ދިއުމަށް އެއްބަސްވުމަކަށް އާދެވިފައިވާ ކަމަށެވެ.
ފެމްބޯސާގެ ހަތްވަނަ ސަރަހައްދީ ބައްދަލުވުން ނިންމާލެއްވުމަށްފަހު ނޫސްވެރިންނަށް މައުލުމާތު ދިނުމުގެ ސެޝަންގެ ތެރެއިން --- ސަން ފޮޓޯ/ އިޙްތިޝާމް މުހައްމަދު
"އެއްބަސް ވުމަކަަށް އާދެވުނީ އީވޯޓިން އަށް ދިއުމަށްޓަކައި ޕޮޕިއުލޭޝަންގެ އަދަދަކީ، ރާއްޖޭގެ ރައްޔިތުންގެ އަދަދަކީ މައްސަލައެއް ނޫން ކަމަށް،" އިލެކްޝަންސް ކޮމިޝަންގެ މެމްބަރު އަހްމަދު އަކްރަމް ވިދާޅުވި އެވެ.
ފެމްބޯސާގެ އަހަރީ ބައްދަލުވުން ކޮންމެ އަހަރަކުވެސް އެއް ފަހަރު މެމްބަރު ގައުމުތަކުން ގައުމެއްގައި އަންނަނީ ބާއްވަމުންނެވެ. އެގޮތުން މިއަހަރުގެ ބައްދަލުވުން ރާއްޖޭގައި ބާއްވާފައިވާއިރު، އެ ބައްދަލުވުމުގައި އިންތިހާބުތަކާ ގުޅޭ ކަންކަން ހަރުދަނާ ކުރުމަށް މަޝްވަރާ ކުރެވިފައިވެ އެވެ. އަންނަ އަހަރު ފެމްބޯސާގެ ބައްދަލުވުން ބޭއްވުމަށް ހަމަޖެހިފައިވަނީ އަފްގާނިސްތާނުގައެވެ.