ހދ. ކުޅުދުއްފުށި ރީޖަނަލް ހޮސްޕިޓަލުގައި ސިޒޭރިއަނެއް ހެދުމަށް ފަހު ލޭ މަނާ ނުވުމުގެ ސަބަބުން ހާލު ސީރިއަސްވެ އެ ރަށު ސިނަމާގެ އައިޝަތު ފަރިޔާލު،33، ނިޔާވި މައްސަލައިގެ ތަހުގީގު އަދި ވެސް ނުނިމޭ ކަމަށް މޯލްޑިވްސް މެޑިކަލް ކައުންސިލުން ބުނެފި އެވެ.
މެޑިކަލް ކައުންސިލްގެ އޮފިޝަލަކު މިއަދު ސަން އަށް ވިދާޅުވީ އެ މައްސަލައިގެ ތަހުގީގު އަދި ނުނިމޭ ކަމަށާއި ތަހުގީގު ނިމުމުން އެކަމުގެ މައުލޫމާތު މީޑިއާއަށް ހިއްސާކުރާނެ ކަމަށެވެ.
ފަރިޔާލުގެ ސިޒޭރިއަން ހަދާފައި ވަނީ މިދިޔަ ޖެނުއަރީ މަހުގެ ހަތް ވަނަ ދުވަހު އެވެ.
އޭނާ ނިޔާވީ ސިޒޭރިއަން ހެދުމުގައި ދިމާވި މައްސަލައަކާ ގުޅިގެން ލޭ މަނާ ނުވެ ހާލު ސީރިއަސްވެ، މާލެ ގެނެސް އައިޖީއެމްއެޗްގައި ފަރުވާދެމުން ދަނިކޮށެވެ.
ފަރިޔާލުގެ އާއިލާ އިން ތުހުމަތުކުރާގޮތުގައި ސިޒޭރިއަން ހެދުމުގެ ތެރޭގައި މައްސަލަ ދިމާވީ ޑޮކްޓަރުގެ އިހުމާލުންނެވެ. އެ ހާދިސާއަށް ފަހު އެ ޑޮކްޓަރު މާލެ ގެނެސް އައިޖީއެމްއެޗުގައި ބަހައްޓައިގެން އެސެސްމެންޓުތަކެއް ހެދުމަށް ފަހު ކޮންޓްރެކްޓް ހަމަވުމުން އަނބުރާ ގައުމަށް ފޮނުވާލާފައިވާ ކަމަށް ހެލްތު މިނިސްޓްރީން ވަނީ ބުނެފަ އެވެ.
އެ މައްސަލަ ހިއުމަން ރައިޓްސް ކޮމިޝަން (އެޗްއާރްސީއެމް) އިން ވެސް އަންނަނީ ތަހުގީގު ކުރަމުންނެވެ.
ފަރިޔާލު ނިޔާވުމާ ގުޅިގެން އެ ރަށު ބަޔަކު ހޮސްޕިޓަލް ކައިރިއަށް އެއްވެ މުޒާހަރާ ވެސް ވަނީ ކޮށްފަ އެވެ.