ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު އަހުމަދު ފާރިސް މައުމޫނާއި ކައުންސިލް މެމްބަރު އައިމިނަތު ނާދިރާ ޕާޓީގެ މެންބަރުކަމުން ވަކިކުރަން ސުލޫކީ ކޮމިޓީން ނިންމީ ސައްހަ ބައްދަލުވުމެއްގައި ނޫން ކަމަށް ޕީޕީއެމްގެ ރައީސް އަދި ކުރީގެ ރައީސް މައުމޫން އަބްދުލް ގައްޔޫމް ވިދާޅުވެއްޖެ އެވެ.
ޕީޕީއެމްގެ ތެރޭގައި ޚިޔާލު ތަފާތުވުންތަކެއް އުފެދުނު ފަހުން ފުރަތަމަ ފަހަރަށް އެ ޕާޓީގެ ކައުންސިލުން މިރޭ ވަނީ ކުއްލި ބައްދަލުވުމެއް ބާއްވަން މަސައްކަތް ކޮށްފަ އެވެ. އެ ބައްދަލުވުން ވަނީ ކުރިއަށްގެންދެވޭ ގޮތް ނުވެގެން ހުއްޓައިލަފަ އެވެ.
މިރޭ ނޫސްވެރިންނާ ބައްދަލުކުރައްވައި ޕީޕީއެމްގެ ރައީސް މައުމޫން ވިދާޅުވީ ފާރިސާއި ނާދިރާ ޕާޓީ އިން ވަކިކުރީ ސައްހަ ބައްދަލުވުމަކުން ނޫން ކަމަށެވެ.
"އަޅުގަނޑު ދެންނެވިން އެ ދެ ބޭފުޅުން ޕާޓީގެ މެންބަރުކަމުން ވަކިވެވަޑައިގެންފައިވާ ކަމަށް ގަބޫލު ނުކުރައްވާކަމަށް. އެއީ ސައްހަ ބައްދަލުވުމެއްނޫން ބާއްވާފައި އޮތީ. ސުލޫކީ ކޮމިޓީގައި ހަތް މެންބަރުން ތިއްބަވާ އިރު ތިން މެންބަރުން ބައްދަލުކުރެއްވީމަ ކޯރަމެއް ވެސް ނުލިބޭ. މަދުވެގެން ހަތަރެއް އެބަތިބެން ޖެހޭ،" މައުމޫން ވިދާޅުވި އެވެ.
ޕީޕީއެމްގެ ނައިބު ރައީސް އަބްދުއްރާހީމް އަބްދުﷲ އާއި އަދި ޕާޓީގެ ކައުންސިލްގައި ހިމެނިވަޑައިގަންނަވާ ގިނަ އަދަދެއްގެ މެންބަރުން ބައިވެރިވެވަޑައިގެންނެވި އެ ބައްދަލުވުން ހުއްޓާލަން ޖެހުނީ، އެ ޕާޓީގެ މެންބަރުކަމުން ވަކިކުރުމަށް، ޕާޓީގެ ސުލޫކީ ކޮމެޓީން ނިންމާފައިވާ ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު އަހުމަދު ފާރިސް މައުމޫނާއި ކައުންސިލް މެމްބަރު އައިމިނަތު ނާދިރާ އެ ބައްދަލުވުމުގައި ބައިވެރިވެވަޑައިގަތުމުންނެވެ.
ފާރިސް އާއި ނާދިރާ އެ ބައްދަލުވުމުގައި ބައިވެރިވެވަޑައިގެންފައި ވާތީ، ކައުންސިލްގައި ހިމެނިވަޑައިގަންނަވާ ރައީސް ޔާމީނަށް ތާއީދުކުރަށްވާ މެންބަރުން ވަނީ، އެ ދެ ބޭފުޅުން ހިމަނައިގެން އެ ބައްދަލުވުން ކުރިއަށް ނުގެންދެވޭނޭ ކަމަށް ވިދާޅުވެ، ބައްދަލުވުން ދޫކުރައްވައި ބޭރަށް ނުކުމެވަޑައިގެންފަ އެވެ.
ޕީޕީއެމްގެ ކައުންސިލްގައި ހިމެނިވަޑައިގަންނަވާ ރައީސް ޔާމީނަށް ތާއީދުކުރައްވާ މެންބަރުން ބައްދަލުވުން ދޫކުރައްވައި ބޭރަށް ނުކުމެ ވަޑައިގަތުމުން އެ ބައްދަލުވުމުގެ ކޯރަމް ގެލުމާއެކު ބައްދަލުވުން ވަނީ ނިންމާލައިފައެވެ.
އެ ބައްދަލުވުމަށް ފަހު ކުރީގެ ރައީސް މައުމޫން ދެއްވި ޕްރެސްއެއްގައި ވިދާޅުވީ، ފާރިސް އާއި ނާދިރާ ވަކިކުރަން ސުލޫކީ ކޮމިޓީން ނިންމީ ސައްހަ ބައްދަލުވުމެއްގައި ނޫން ކަމަށާއި ކޮމިޓީގައި ހަތް މެމްބަރުން ތިއްބަވާ އިރު، އެ ދެ ބޭފުޅުން ވަކިކުރަން ނިންމީ ތިން މެންބަރުންގެ ބައްދަލުވުމެއްގައި ކަމަށެވެ. އެހެންކަމުން އެއީ ސައްހަ ނިންމުމެއްކަމަށް ގަބޫލުނުކުރައްވާ ކަމަށް މައުމޫން ވިދާޅުވި އެވެ.