ޑރ. އަފްރާޝީމް އަލީގެ ގާތިލު ހ. ލޮބީ ހުސައިން ހުމާމް އަހްމަދުގެ މައްޗަށް މަރުގެ އަދަބު ދިނުމާ ދެކޮޅަށް އޮކްސްފޯޑް ޔުނިވާސިޓީގައި އިސްލާމް ދީނާ ބެހޭ ޢިލްމު ކިޔަވައިދޭ ތޯރިގު ރަމަޟާން ރައީސުލްޖުމްހޫރިއްޔާ އަބްދުﷲ ޔަމީނަށް ފޮނުއްވި ސިޓީގައިވާ ވާހަކަތަކަށް، އިސްލާމިކް ޔުނިވާސިޓީ އޮފް މޯލްޑިވްސްގެ ވައިސް ޗާންސެލާ ޑރ. މުހައްމަދު ޝަހީމް އަލީ ސައީދު ރައްދު ދެއްވައިފި އެވެ.
ޕްރޮފެސާ ތޯރިގު ރަމަޟާން، ހުމާމްގެ މައްޗަށް މަރުގެ އަދަބު ތަންފީޒު ކުރުމަކީ އިސްލާމީ ޝަރީޢަތުގެ އަސާސުތަކާ ޚިލާފު ކަމެއް ކަމަށް ބުނެ ރައީސް އަބްދުﷲ ޔާމީނަށް ސިޓީއެއް ފޮނުވާފައި ވަނީ މީގެ ދެ ދުވަސް ކުރިންނެވެ. އެ ސިޓީގައި އޭނާ ވަނީ ހުމާމްގެ ޝަރީއަތާއި، އަފްރާޝީމްގެ މަރުގެ މައްސަލައިގައި ކަންބޮޑުވާ ބައެއް ކަންކަން ފާހަގަ ކުރައްވައިފަ އެވެ.
ތޯރިގު ރަމަޟާންގެ ސިޓީ އިންޓަނެޓުގައި އާންމުވެފައިވާ އިރު، އޭގައި ދައްކާފައިވާ ވާހަކަތަކަށް ރައްދު ދެއްވައި ރާއްޖޭގެ ކުރީގެ އިސްލާމިކް މިނިސްޓަރ ޑރ. މުހައްމަދު ޝަހީމް އަލީ ސައީދު ވިދާޅުވީ މަރުގެ އަދަބު ތަންފީޒު ކުރުމާ ބެހޭ ގޮތުން ރާއްޖޭގައި ހަދާފައިވާ ގަވާއިދު ޕްރޮފެސާ ތޯރިގު ވިދާޅުވެފައި ނުވާކަން އެނގޭ ކަމަށެވެ.
ޑރ. ޝަހީމް ވިދާޅުވީ ޤިސާސްގެ ހުކުމަކީ އިސްލާމީ ޝަރީޢާގައި އޮތް ހުކުމަކަށްވާ އިރު، ގިސާސްގެ މައްސަލައެއް ރާއްޖޭގެ ޝަރުއީ ތިން މަރުހަލާ ނިމިގެން ނޫން ގޮތަކަށް ތަންފީޒު ނުކުރާނެ ކަމަށެވެ.
"ދުނިޔޭގެ އެދުމަށް އަނިޔާވެރި ހުކުމެއް ކުރާ ފަނޑިޔާނެއް ނަމަ އެމީހެއްގެ ޖަޒާއަކީ ނަރަކަ. ހައްގަށް ހުކުމް ކުރާ ފަނޑިޔާރުންގެ ޖަޒާއަކީ ސުވަރުގެ. ގިށާސްގެ ހުކުމް ކުރަންވާނީ އެއްޗެސް ޝައްކެއް ނެތް މިންވަރަށް ސާބިތު ވުމުން،" ޝަހީމް ނެރުއްވި ބަޔާނެއްގައި ވިދާޅުވި އެވެ.
19 ޖޫން 2016 ވަނަ ދުވަހު ސްޕްރީމް ކޯޓްގައި ތާވަލް ކުރި ސަރިއަތުގެ މަޖިލީސް ކެންސަލް ވުމުން ހުމާމް ކޯޓުން ނެރެގެން ގެންދަނީ -- ސަން ފޮޓޯ/ފަޔާޒު
ޝަހީމް ވިދާޅުވީ ގިސާސްގެ މައްސަލައިގައި މަރަށް މަރު ހިފުމަށް ސުޕްރީމް ކޯޓުން ހުކުމް ކޮށްފި ނަމަ އެކަން ގެންދަންވާ ގޮތް ބަޔާންކޮށްދޭ ގަވައިދު ހަދާފައި ވަނީ އިސްލާމީ ޝަރީޢަތް އަސްލަކަށް ބަލައިގެން ކަމަށެވެ.
ވާރިސުންގެ ބަސް ހޯދަން ބަލާއިރު މައްޔިތާގެ ވާރިސުންގެ ތެރޭގައި ބާލިޣު ނުވާ ކުއްޖަކު ހުރި ނަމަ އޭނާ ބާލިޣު ވަންދެން މަރުގެ ހުކުމް ތަންފީޒުނުކޮށް މުޖުރިމު ހައްޔަރުގައި ބަހައްޓަން ޖެހޭނެ. މަރުގެ ހުކުމް ތަންފީޒު ކުރަން ވާނީ އޭނާގެ ބަސް ވެސް ބަލާފައި. މިއީ ގިސާސް ހިފުމުގައި އިސްލާމީ ޝަރީޢާގައި ކަނޑައަޅުއްވާފައިވާ ޝަރުތެއް.
ކުރީގެ އިސްލާމިކް މިނިސްޓަރު ޝަހީމް ވިދާޅުވީ އެކުލަވާލާފައިވާ ގަވައިދުގެ ދަށުން، މައްޔިތާގެ ވާރިސުންނާ ގާތިލާ ދެމެދު މެދުވެރިއެއްގެ ދައުރު އަދާކުރާނީ އިސްލާމިކް މިނިސްޓްރީން ކަމަށާއި، ވާރިސުން ނުވަތަ އެންމެ ވާރިސަކު ނަމަވެސް މައާފު ކޮށްފި ނަމަ މަރުގެ އަދަބު ތަންފީޒު ނުކުރާނެ ކަމަށެވެ.
އަދި ގަވައިދުގެ ދަށުން، ގާތިލުގެ ސިއްހީ ހާލަތު ބަލާނެ ކަމަށާއި ބަލި މީހެއް ނަމަ ހުކުމް ތަންފީޒު ކުރުން ފަސް ކުރާނެ ކަމަށް ޝަހީމް ވިދާޅުވި އެވެ.