ދިވެހިރައްޔިތުންނާއެކު ބަރަކާތްތެރި ފިޠުރު އީދު ފާހަގަކުރުމުގެ ގޮތުން މުއާސަލާތީ ކުންފުނި ދިރާގުން މާލެއާއި ރާއްޖޭގެ އެކި ސަރަހައްދުތަކުގައި އީދުގެ ހަދިޔާ ބެހުމުގެ ހަރަކާތްތަކެއް ކުރިޔަށްގެންގޮސްފިއެވެ.
ދިރާގުގެ ޕަބްލިކް ރިލޭޝަންސް މެނޭޖަރ އިމްޖާދް ޖަލީލް ވިދާޅުވީ، އެ ކުންފުންޏަކީ މުޅި ރާއްޖެ ތަމްސީލުކުރާ ކުންފުންޏަކަށްވާއިރު މިއީ ފިތުރު އީދުގެ އުފާ ރާއްޖޭގެ އެކިކަންކޮޅުތަކުގައި ފާހަގަކުރަމުންދާ މި ދަނޑިވަޅުގައި އީދުގެ އުފަލުގައި ދިވެހި ރައްޔިތުންނާ ބައިވެރިވެ މިކަން ފާހަގަކުރުމުގެ ގޮތުން ދިރާގުން ކުރިޔަށް ގެންދިޔަ ހަރަކާތެއްކަމަށެވެ.
ދިރާގުން މިއަދު ވަނީ، މާލޭގެ 5 ސަރަހައްދެއްގެ އިތުރުން، ދިރާގުގެ ރީޖަނަލް އޮޕަރޭޝަން ސެންޓަރުތައް ގާއިމްކޮށްފައިވާ 8 އަތޮޅެއްގައި އީދުގެ އުފާ ފާހަގަކުރުމުގެ ގޮތުން ކުޑަކުދިން ޖަމާވާ އެކި ސަރަހައްދުތަކުގައި އީދު ނަމާދުގެ ފަހުގައި ހަދިޔާ ބަހާފައެވެ. އަދި މިއަދު ހަވީރުވެސް ބައެއް ސަރަހައްދުތަކުގައި މި ހަރަކާތް ކުރިޔަށް ގެންދާނެ ކަމަށް ދިރާގުން މައުލޫމާތުދެއްވައެވެ.
ދިރާގުގެ ފަރާތުން މާލޭގައި ހަދިޔާ ބަހަފާއިވަނީ އީދު ނަމާދަށްފަހު އިސްލާމީ މަރުކަޒުގަޔާއި، ފުރުގާން މިސްކިތުގައެވެ. އޭގެ އިތުރުން އޭޑީކޭ ހޮސްޕިޓަލާއި އައިޖީއެމް ހޮސްޕިޓަލުގައި ތިބި ކުޑަކުދިންނަށާއި ހުޅުމާލެ ސެންޓްރަލް ޕާރކު ސަރަހައްދުގައިވެސް މިއަދު ހެނދުނު ވަނީ ހަދިޔާ ބަހާފައެވެ.
"ޢީދުގެ މުނާސަބަތުގައި ހަދިޔާ ބަދަލުކޮށް އެއްބަޔަކު އަނެއްބަޔަކާއި މި އޮންނަ ގުޅުން ބަދަހި ކުރުމަކީ ޒަމާނުއްސުރެ ދިވެހިންގެ ތެރޭގައި އޮންނަ ވަރަށް ރީތި އާދައެއް. އެގޮތުން މި އަހަރުގެ ފިތުރު ޢީދު ދުވަހާއި ގުޅިގެން މިފަދަ ހަރަކާތެއް ހިންގާ ގިނަ އަދަދެއްގެ ކުޑަކުދިންތަކެއް މި އުފަލުގައި ބައިވެރިކޮށް މި އާދަ ދިރުވައި އާލާކުރުމުގެ ގޮތުން މިފަދަ ހަރަކާތެއް ހިންގުމުގެ ފުރުސަތު ލިބިގެން ދިޔުމަކީ ދިރާގުގެ ހުރިހާ މުވައްޒަފުންނަށްވެސް ލިބިގެންދާ ވަރަށް ބޮޑު އުފަލެއް. އަދި މި ފުރުސަތުގައި ދިރާގުގެ މެނޭޖްމަންޓާއި އެންމެހާ މުވައްޒަފުންގެ ނަމުގައި ދިވެހި އެންމެހާ ލޮބުވެތި ރައްޔިތުންނަށް ފިތުރު އީދުގެ ހެޔޮއެދުމާއި ތަހުނިޔާ އަރިސްކުރަން"، އިމްޖާދު ވިދާޅުވިއެވެ.
މާލޭގެ އިތުރުން އީދު ނަމާދަށްފަހު ދެން ހަދިޔާ ބެހުން ކުރިޔަށް ގެންގޮސްފައިވަނީ އައްޑުއާއި ފުވައްމުލަކުގައެވެ. އަދި މިއަދު ހަވީރު، ލ. ފޮނަދޫ ބަނދަރު ސަރަހައްދާއި، ލ. ގަން މުކުރިމަގު ބަނދަރު ސަރަހައްދު، ގަން މަތިމަރަދޫ ޤުރުއާނާއި ބެހޭ މަރުކަޒު ހުންނަ ސަރަހައްދު، އަދި ލ. ތުނޑި އިހައްދޫ ސްކޫލް ސްޓޭޖް ސަރަހައްދުގައިވެސް މިއަދު ހަވީރު ވަނީ ހަދިޔާ ބެހުމަށް ހަމަޖައްސާފައެވެ. ހަމަ އެއާއެކު، ތިނަދޫ ކުޑަކުދިންގެ ޕާކު ސަރަހައްދުގަޔާއި، ޑރ. އަބްދުލް ސަމަދު މެމޯރިއަލް ހޮސްޕިޓަލް ސަރަހައްދުގައިވެސް މި ހަރަކާތް ދިރާގުން ކުރިޔަށް ގެންދާނެއެވެ.
އިމްޖާދު ވިދާޅުވީ، މިއަދު ހަވީރު 4:30 ން ފެށިގެން ކުޅުދުއްފުށީ ބޮޑު މަގާއި ގއ. ގައްދޫ މައިމަގުގައި، 'ޢީދު އުފާ' ހަރަކާތްތައް ކުރިޔަށް ގެންދިޔުމަށް ހަމަޖެހިފައިވާ ސަރަހައްދުގެ އިތުރުން ބ. އޭދަފުށީ 'ހިއްކި ބިން' ސަރަހައްދުތަކުގައިވެސް ދިރާގުގެ މުވައްޒަފުން އީދު ހަދިޔާ ބެހުމުގައި ހަރަކާތްތެރި ވާނޭ ކަމަށެވެ.