ރާއްޖޭގެ ކައިޓް ބޯޑަރުންނަށް ރަނގަޅު ކުރިމަގެއް އެބައޮތް ކަމަށް ކައިޓް ބޯޑިން ޗެމްޕިއަންކަން ދެ ފަހަރު ހޯދާފައިވާ ނެދަލެންޑްސްގެ ޔޫރީ ޒޫން ބުނެފި އެވެ.
މާފުށީ ޑައިވް އެންޑް ވޯޓާ ސްޕޯޓްސް އިން އިންތިޒާމުކޮށްގެން މި މަހުގެ ހަ ވަނަ ދުވަހުން ފެށިގެން މިއަދުގެ ނިޔަލަށް ކ. މާފުށީގައި ކުރިއަށް ގެންދިޔަ ކައިޓް ބޯޑިން ކްލިނިކުގައި ބައިވެރިވި ބައިވެރިންނަށް ޔޫރީގެ ހަރަކާތްތައް ދައްކާލައި، އޭނާ ވަނީ ހުނަރުތައް ދަސްކޮށްދިނުމަށް ރާއްޖޭގެ އެތުލީޓުންނަށް އެހީތެރިކަން ފޯރުކޮށްދީފަ އެވެ.
ކައިޓް ބޯޑިން ޗެމްޕިއަން ޔޫރީ ޒޫން، އޭނާގެ ހުނަރު ދައްކާލަނީ --- ސަން ފޮޓޯ: މުއާވިއަތު އަންވަރު
ކައިޓް ބޯޑިން ކްލިނިކް ނިންމާލުމަށްފަހު، އިބްރާހިމް ނާސިރު އިންޓަނޭޝަނަލް އެއާޕޯޓުގައި ހުރެ "ސަން" އަށް ދިން އިންޓަވިއުއެއްގައި ޔޫރީ ބުނީ، އެ ކްލިނިކަކީ ބައިނަލްއަގުވާމީ ފެންވަރުގައި ރާއްޖޭގެ އެތުލީޓުން ކުރި ފުރަތަމަ ތަޖުރިބާ ކަމަށާއި ރާއްޖޭގެ އެތުލީޓުންނަށް ދަސްކޮށްދިން އުކުޅުތައް ވަރަށް އަވަހަށް ނަގައިގަތް ކަމަށެވެ.
"އެމީހުން ކައިޓް ބޯޑު ކުރާ ގޮތް ކުޑަކޮށް ތަފާތު ކުރޭ. އެމީހުން ކައިޓް ބޯޑު ދުއްވާ ގޮތް ވެސް ކުޑަކޮށް ތަފާތު ކުރޭ. އަހަރެން ދެކެނީ އެމީހުންނަށް ރަނގަޅު ކުރިމަގެއް އެބައޮތް. އަހަރެން ވަރަށް އަވަހަށް ރާއްޖެ އަށް އެނބުރި އަންނާނަން. އަދި އެމީހުންގެ ކުރިއެރުންތަކަށް ބަލާނަން. އެއަށްފަހު އަންނަ އަހަރު ނޫނީ އޭގެ އަނެއް އަހަރު އެމީހުންނަށް މުބާރާތްތަކުގައި ވާދަކުރެވޭނެ،" އޭނާ ބުންޏެވެ.
ޔޫރީ ބުނީ، ރާއްޖޭގައި މި ވަގުތު ކައިޓް ބޯޑިން ދަނީ ވަރަށް ދަށްކޮށް ކަމަށާއި ބައެއް މީހުން ރާއްޖޭގައި ވައި ޖެހެމުންދަނީ ވަރަށް ދަށްކޮށް ކަމަށް ދެކުނު ނަމަވެސް، އޭނާ ދެކެނީ އެއާ މުޅިން ހިލާފަށް ކަމަށެވެ.
ކައިޓް ބޯޑިން ޗެމްޕިއަން ޔޫރީ ޒޫން، އޭނާގެ ހުނަރު ދައްކާލަނީ --- ސަން ފޮޓޯ: މުއާވިއަތު އަންވަރު
"ފަސް ދުވަހުގެ ކްލިނިކްގައި ކޮންމެ ދުވަހަކު ވެސް ވަރަށް ރަނގަޅަށް ވައި ޖެހެމުން ދިޔައީ. އަހަރެންނަށް ހީވަނީ ކައިޓް ބޯޑިން އިން ރާއްޖެ އަށް ރަނގަޅު ކުރިމަގެއް އެބައޮތް ހެން. މިއީ ވަރަށް ރީތި ތަނެއް. ރާޅުވެސް ވަރަށް ރަނގަޅު. ކައިޓް ބޯޑިން އަށް ބޭނުންވާ ހުރިހާ ކަމެއް ރާއްޖޭގައި އެބަހުރި. މިހާރަށް ރާއްޖޭގެ އެތުލީޓުންގެ ކައިޓް ބޯޑިން ފެންވަރު ރަނގަޅު ކުރުމަށް އަހަރެން އެމީހުންނަށް ދަސްކޮށްދިން ކަންތައްތަކާއެކު ކުރިއަށްދިއުން ރަނގަޅުވާނެ. އެމީހުންނަށް ކައިޓް ބޯޑިންގައި ގިނަ ވަގުތު ހޭދަކުރަންޏާ އިތުރަށް ރަނގަޅު ކުރެވޭނެ،" އޭނާ ބުންޏެވެ.
ރާއްޖެއާ ބެހޭގޮތުން ޔޫރީ ބުނީ، ރާއްޖެއަކީ ވަރަށް ރީތި ތަނެއް ކަމަށާއި އޭނާ އަށް މި ގައުމަކީ ވަރަށް ހާއްސަ ތަނެއް ކަމަށެވެ.