އޭއެފްސީ އޭޝިއަން ކަޕް 2019 ކޮލިފިކޭޝަންގެ ޕްލޭ އޯފްގައި ޔަމަން އަތުން ރާއްޖެ ބަލިވިއިރު އެ ނަތީޖާއާމެދު ހިތްހަމަ ނުޖެހޭ ކަމަށާއި ނަމަވެސް ޓީމުން އިސްތިއުފާދޭން ނުވިސްނާ ކަމަށް ގައުމީ ޓީމްގެ ކޯޗު ރިކީ ހާބަޓް ބުނެފިއެވެ.
އަމިއްލަ ދަނޑުގައި 2-0ގެ ނަތީޖާ އަކުން ޔަމަން އަތުން ބިލިވި މެޗަށް ފަހު ވާހަކަ ދައްކަމުން ހާބަޓް ބުނީ ލީގްގެ މެދު ތެރެއިން އެ މެޗަށް ނިކުންނަން ޖެހުމުން ގައުމީ ޓީމާއެކު ފަރިތަކުރަން ވެސް އެކަށީގެންވާ ވަގުތެއް ނުލިބޭ ކަމަށާއި ނަމަވެސް ޓީމްގެ ފަރާތުން އެ ކުޅުންތެރިންގެ ކުޅުން ފެނިގެން ދިޔަ ކަމަށެވެ.
"އެފްއޭއެމްގެ ކޮންގްރެސް އަށް ފަހު އަދި ކިރިޔާ ހަމަ އަކަށް މި އެޅުނީ. ވޭތުވެ ދިޔަ ދުވަސްތަކުގައި އެންމެ އެކަށީގެންވާ ފުރުސަތުތަކެއް ގައުމީ ޓީމަކަށް ނުލިބޭ. ނަމަވެސް އާ ރައީސްއާ އެކު ހުރިހާ ކަމެއް ވެސް ހަމައަކަށް އެޅޭނެ،" ހާބަޓް ބުންޏެވެ.
މިދިޔަ އަހަރުގެ ސެޕްޓެމްބަރު މަހު ގައުމީ ޓީމްގެ ކޯޗު ކަމާ ހަވާލުވި ކުރީގެ ނިއުޒިލޭންޑްގެ ކޯޗު ރިކީ ހާބަޓަށް ވަނީ ރާއްޖޭގެ ގައުމީ ޓީމަށް އެކަށީގެންވާ ރަނގަޅު ކާމިޔާބީއެއް ހޯދައިނުދެވި ގިނަ ބައެއްގެ ފާޑުކިޔުން އަމާޒް ވެފައެވެ.
ޔަމަން އަތުން ރާއްޖެ ބަލިވި މެޗަށް ފަހު ދިވެހި ސަޕޯޓަރުން ވަނީ ކޯޗު ރިކީ ހާބަޓް މަގާމުން އިސްތިއުފާ ދިނުމަށް ވެސް ގޮވައިފައެވެ.
"އިސްތުއުފާ އަށް ގޮވުމަކީ މައްސަލައެއް ނޫން. ދުނިޔޭގެ އަންމެ ވަރުގަދަ ބޮޑެތި ލީގް ތަކުގައި ވެސް ސަޕޯޓަރުން ކޯޗުންގެ އިސްތުއުފާއަށް ގޮވާ. އެކަމާ އަހަރެން އަޅައެއް ނުލަން. ޓީމާއި އެކު ކުރިއަށް ދާނީ،" ހާބަޓް ބުންޏެވެ.
ކާމިޔާބީއެއް ބޭނުން ނަމަ ގިނަ ވަގުތު ނަގާނެ ކަމަށް ކުރިން ވެސް ބުނަމުން އަންނަ ހާބަޓް މިއަދު ވެސް އެ ވާހަކަ ތަކުރާރު ކުރަމުން ބުނީ ޓީމުން ނެރެމުންދާ ދަށް ނަތީޖާގެ ސަބަބުން އޭނާ ޓީމް ދޫކޮށް ނުދާނެ ކަމަށާއި ޓީމްގައި އޭނާ ހުންނާނެތޯ ނުވަތަ ނޫންތޯ ނިންމާނީ އެފްއޭއެމް އިން ކަމަށެވެ.