ކޮޕާ އިޓާލިއާގެ ތާރީހީ ކާމިޔާބަށް ފަހު، ޔުވެންޓަސްގެ ކުޅުންތެރިންނަށް އެ ކްލަބުގެ ކޯޗު މަސިމިލިއާނޯ އެލެގްރީ ތައުރީފުކޮށްފި އެވެ.
ކޮޕާ އިޓާލިއާގެ ފައިނަލުގެ އިތުރު ވަގުތުގެ ދެ ހާފުގެ ތެރޭގައި ޖެހި ލަނޑާ އެކު އޭސީ މިލާން އަތުން ޔުވެންޓަސް ރޭ މޮޅުވީ 1-0 ލަނޑުންނެވެ. އެ މެޗުގައި ފެނުނު ހަމައެކަނި ލަނޑު ޔުވެންޓަސްއަށް ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ފެނުނު އަލްވާރޯ މޮރާޓާ އެވެ.
ޔުވެންޓަސް އިން ސީޒަން ނިންމާލީ އިޓަލިއަން ސެރީއާ އާއި ކޮޕާ އިޓާލިއާގެ ތަށްޓާއެކު އެވެ. ޔުވެންޓަސް އިން ރޭ ހޯދި ކޮޕާ އިޓާލިއާއަކީ އެ ކްލަބުން ހޯދި 11 ވަނަ ކޮޕާ އިޓާލިއާ އެވެ.
"ފުރަތަމަ ކަމަކަށް އަހަރެން ބޭނުން ވަނީ ކުޅުންތެރިންނަށް ޝުކުރު އަދާކުރަން. އެއީ ފަސޭހަ މެޗެއް ނޫން. ކްލަބުގެ ސަޕޯޓަރުންނަށް ވެސް ޝުކުރު އަދާކުރަން. މިލާނަށް ވެސް އަހަރެން މަރުހަބާ ކިޔަން ހާއްސަކޮށް ފުރަތަމަ ހާފުގައި އެ ޓީމުން ދެއްކި ކުޅުމަށް،" ކުރީގެ އޭސީ މިލާން އަދި މިހާރު ޔުވެންޓަސް އަށް އިރުޝާދުދެމުންދާ ކޯޗު އެލެގްރީ ބުންޏެވެ.
އޭނާ ބުނީ، ދެވަނަ ހާފުގައި ޔުވެންޓަސް އިން ކުޅުން އިތުރަށް ވަރުގަދަކުރި ކަމަށާއި މެޗުގެ ތެރެއިން މޮޅުވުން ނުވަތަ ޕެނަލްޓީން މޮޅުވުމަށް ނިންމުމެއް ނިންމަން ޖެހުނު ކަމަށެވެ. އަދި ހުއާން ކުއަޑްރާޑޯގެ ބަދަލުގައި މޮރާޓާ ކުޅެން އެރުވީ މެޗުން މޮޅެއް ހޯދުމަށް ކަމަށް ވެސް އޭނާ ބުންޏެވެ.
މި ސީޒަނުގައި ޔުވެންޓަސް އިން ހޯދި އިޓާލިއަން ސެރީއާއަކީ އެ ކްލަބުން ހޯދި 32 ވަނަ ލީގު ތަށްޓެވެ.