އޭއެފްސީ ކަޕުގެ ގްރޫޕް އެފްގެ ފަހު މެޗުގައި ނިއު ރޭޑިއަންޓް ސްޕޯޓްސް ކްލަބާ ދެކޮޅަށް ކުޅުނު މެޗުން ހޯދި ޕޮއިންޓާއެކު ފިލިޕީންސްގެ ކާޔާ އެފްސީ ދެވަނަ ބުރުގެ ޖާގައެއް ހޯދައިފި އެވެ.
ގައުމީ ފުޓްބޯޅަ ދަނޑުގައި މިއަދު ހަވީރު ނިއު ރޭޑިއަންޓާއި ކާޔާ ބައްދަލުކުރި މެޗު ނިމިގެންދިޔައީ ދެ ޓީމުންކުރެ އެއްވެސް ޓީމަކަށް ލަނޑެއްނުޖެހި އެއްވަރުވެގެންނެވެ. މި ގްރޫޕްގައި ކުޅުނު އަނެއް މެޗުގައި އަމިއްލަ ދަނޑުގައި ސިންގަޕޫރުގެ ބަލެސްޓިއާ ޚަލްސާ އަތުން 4-0 ލަނޑުން މޮޅުވެ، ހޮންކޮންގެ ކިޗީ ވެސް ވަނީ ދެވަނަ ބުރުން ޖާގައެއް ހޯދައިފަ އެވެ.
ގްރޫޕް އެފްގެ ފަހު މެޗުތަކަށްފަހު، ގްރޫޕްގެ އެއްވަނައިގެ ގޮތުގައި ދެވަނަ ބުރުން ޖާގަ ހޯދި ކިޗީއަށް ކުޅުނު ހަ މެޗުން ލިބިފައިވަނީ 13 ޕޮއިންޓެވެ. ދެވަނައިގެ ގޮތުގައި ދެވަނަ ބުރުން ޖާގަ ހޯދި ކާޔާއަށް ހަ މެޗުން ދިހަ ޕޮއިންޓް ލިބުނު އިރު، ގްރޫޕުގެ ތިން ވަނަ ބަލެސްޓިއާ ޚަލްސާއަށް ހަ މެޗުން ލިބިފައިވަނީ ހަތް ޕޮއިންޓެވެ. ފަހު މެޗަށް ނުކުތްއިރު ވެސް މުބާރާތަށް އަލްވަދާއު ކިޔާފައިވާ ނިއުއަށް ކުޅުނު ހަ މެޗުން ލިބިފައިވަނީ ތިން ޕޮއިންޓެވެ.
މެޗުގެ ފުރަތަމަ ހާފުގައި ދެ ޓީމަށްވެސް ލަނޑުޖަހާނެ ރަނގަޅު ފުރުސަތުތަކެއް ލިބިގެންދިޔަ އެވެ. އެގޮތުން މެޗުގެ ފުރަތަމަ ފުރުސަތު ލިބިގެންދިޔައީ ކާޔާ އެފްސީ އަށެވެ. މެޗުގެ ހަތަރު ވަނަ މިނެޓުގައި ކާޔާގެ ހާފުގެ ތެރެއިން ލިބުނު ހިލޭ ޖެހުމަކުން ޖޫނިއާ މުނޯޒް ނަގައިދިން ހުރަހުން ނިއުގެ ޕެނަލްޓީ އޭރިޔާ ތެރޭގައި ހުރެފައި ލުއިސް ކްލާކް ބޮލުން އުފެއްދި ހަމަލާ ދިޔައީ ގޯލުގެ ހުރަސްދަނޑި މަތިން ބޭރަށެވެ.
މެޗުގެ އަށް ވަނަ މިނެޓުގައި ނިއުއަށް ލަނޑުޖަހާނެ ރަނގަޅު ފުރުސަތެއް ލިބިގެންދިޔަ އެވެ. ހަމްޒާ މުހައްމަދު (ހަމްޕު) ދިން ބޯޅައެއް ހިފައިގެން ކާޔާގެ ޕެނަލްޓީ އޭރިޔާ ތެރެއަށް ވަނުމަށްފަހު މުހައްމަދު ސާދިން އުފެއްދި ހަމަލާ ކީޕަރު މެތިއު އެންޓޮން ވަނީ ފަސޭހަކަމާއެކު ހޯދައިފަ އެވެ.
މެޗުގެ 28 ވަނަ މިނެޓުގައި ނިއުއަށް ލަނޑުޖަހާނެ އިތުރު ފުރުސަތެއް ލިބިގެންދިޔަ އެވެ. ރިލްވާން ވަހީދު (ރިލޭ) ނަގައިދިން ހުރަހަކުން ކާޔާގެ ޕެނަލްޓީ އޭރިޔާ ތެރޭގައި ހުރެފައި އިއްޒަތު އަބްދުލް ބާރީ ބޮލުން އުފެއްދި ހަމަލާ ދިޔައީ ގޯލު ހުރަސް ދަނޑިމަތިން ބޭރަށެވެ.
މެޗު ނިމެން މިނެޓަކަށް ވެފައިވަނިކޮށް، ކާޔާއަށް ލަނޑުޖަހާނެ ރަނގަޅު ފުރުސަތެއް ލިބިގެންދިޔަ އެވެ. ކާޔާއަށް ލިބުނު ހިލޭ ޖެހުމަކުން ކެންޝީރޯ ޑެނިއެލްސް އުފެއްދި ހަމަލާ ކީޕަރު ސުލޭމާނާ އަބޫ ވަނީ މަތަކޮށްފަ އެވެ.
މެޗުގެ ދެވަނަ ހާފުގައި ރަނގަޅަށް ކުޅެ، ގިނަ ހަމަލާތައް އުފައްދާފައިވަނީ ކާޔާއިންނެވެ. ދެވަނަ ހާފު ފެށިތާ ހަތަރު މިނެޓު ފަހުން ކާޔާއަށް ލަނޑުޖަހާނެ ރަނގަޅު ފުރުސަތެއް ލިބިގެންދިޔަ އެވެ. ސާދިން ކައިރިން ނައްޓާލުމަށްފަހު ނިއުގެ ޕެނަލްޓީ އޭރިޔާ ބޭރުން ޝިރްމާރް ފެލޮންގްކޯ އުފެއްދި ހަމަލާ ދިޔައީ ގޯލުގެ ހުރަސްދަނޑި މަތިން ބޭރަށެވެ.
އޭގެ ދިހަ މިނެޓުފަހުން އަނެއްކާވެސް ނިއުގެ ގޯލަށް ކާޔާއިން ނުރައްކާކުރި އެވެ. އަރިމަތިން ކެންޝީރޯ ޑެނިއެލްސް ނަގައިދިން ހުރަހަކުން ނިއުގެ ޕެނަލްޓީ އޭރިޔާ ތެރޭގައި ހުރެފައި ޝިރްމާރް އުފެއްދި ހަމަލާ ދިޔައީ ގޯލުގެ ހުރަސްދަނޑި މަތިން ބޭރަށެވެ.
މެޗުގެ 78 ވަނަ މިނެޓުގައި ކާޔާއަށް ލަނޑުޖަހާނެ އިތުރު ފުރުސަތެއް ލިބިގެންދިޔަ އެވެ. ކާޔާގެ ހާފުގައި ހުރެފައި އެލެކްސެންޑާ ޗާލްސް ބޮރޮމެއޯ ދިން ބޯޅަ ހިފައިގެން ނިއުގެ ޕެނަލްޓީ އޭރިޔާ ތެރެއަށް ވަދެ، ޖޮވިން ބެޑިކް އުފެއްދި ހަމަލާ ދިޔައީ ގޯލުގެ ހުރަސްދަނޑި މަތިން ބޭރަށެވެ.