ލޯކަލް ކައުންސިލްތަކުގެ އިންތިހާބުގައި އިލެކްޓްރޯނިކް ވޯޓިންގެ ނިޒާމް ބޭނުން ކުރުމަށް ނިންމަވާފައި ވާތީ އެކަމާ ގުޅޭ އިތުރު މައުލޫމާތު ސާފުކުރުމަށް އެމްޑީޕީ އިން އިލެކްޝަންސް ކޮމިޝަނަށް ސިޓީއެއް ފޮނުވައިފި އެވެ.
އެމްޑީޕީ އިން މިއަދު ނެރުނު ބަޔާނެއްގައި ބުނާ ގޮތުން، އީ ވޯޓިން ނިޒާމު ބޭނުން ކުރަން ނިންމުމުން އެކަމާ ގުޅޭ މައުލޫމާތު ސާފުކުރުމަށް އެ ޕާޓީ އިން ވަނީ މީގެ ކުރިން ވެސް އިލެކްޝަނަށް ސިޓީއެއް ފޮނުވައިފަ އެވެ.
އެހެންނަމަވެސް އެ ސިޓީ އަށް އެދި ފައިވާ މައުލޫމާތު އިލެކްޝަނުން ހިއްސާކޮށްފައި ނުވާ ކަމަށް އެމްޑީޕީގެ ބަޔާނުގައި ބުނެފައިވެ އެވެ.
އެމްޑީޕީގެ ބަޔާނުގައި ބުނާ ގޮތުން، އީ-ވޯޓިންގެ ނިޒާމު ރާއްޖެ އަށް ތައާރަފު ކުރުމާ ގުޅޭ ގޮތުން އެ ޕާޓީ އިން ކަންބޮޑުވާ ކަންކަން އިލެކްޝަނަށް ފޮނުވި ސިޓީގައި ހިއްސާކޮށްފައި ވާނެ އެވެ.
އެގޮތުން ރާއްޖެއަކީ އާބާދީ ކުޑަ ގައުމަކަށްވެފައި، މަދު ގަޑި އިރުތަކެއްގެ ތެރޭގައި ވޯޓު ފޮށިތަކުގެ ނަތީޖާތައް އިއުލާންކުރެވޭ ހިނދު އީ-ވޯޓިންގެ ނިޒާމަށް ކުއްލި ގޮތަކަށް ބަދަލުކުރަން ޖެހޭ ސަބަބާ މެދު ސުވާލު އުފެދޭ ކަމަށް ވެސް ސިޓީގައި ބުނެފައިވާނޭ ކަމަށް އެމްޑީޕީ އިން ނެރުނު ބަޔާނުގައި ބުނެފައިވެ އެވެ.
އަދި އެމްޑީޕީ އަކީ ރާއްޖޭގެ އެންމެ ބޮޑު ސިޔާސީ ޕާޓީ އަށް ވެފައި އެ ޕާޓީއާ މަޝްވަރާ ނުކޮށް އެ ފަދަ ބަދަލެއް ގެނައުމަކީ ގަބޫލު ކުރެވޭނެ ކަމެއް ނޫންކަމުގައި ވެސް އެ ސިޓީގައި ބުނެފައިވާނޭ ކަމަށް އެމްޑީޕީގެ ބަޔާނުގައި ބުނެފައިވެ އެވެ.