ބޮލީވުޑްގެ މަޝްހޫރު ދެ ތަރިން ކަމަށްވާ ބިޕާޝާ ބާސޫ އާއި ކަރަން ސިންހް ގްރޯވަރު، ހަނީމޫނަށް ރާއްޖެ އައި ހަބަރަކީ ދާދިފަހުން މީޑިއާތަކުގައި އެންމެ ގަދަ އަށް ދެކެވުނު އެއް ވާހަކަ އެވެ. އެހެންނަމަވެސް އެކަން އެއްވެސް ފަރާތަކުން ކަށަވަރުކޮށްދީފައި ނުވާތީ، އެ ދެތަރިން ހަނީ މޫނަށް އައީ ރާއްޖެއަށް ކަމެއް ނުވަތަ ނޫންކަމެއް ޔަގީން ކުރެވިފަ އެއް ނުވެ އެވެ.
އެހެންނަމަވެސް، ބިޕާޝާ މިއަދު އިންސްޓާގުރާމް ކުރި ފޮޓޯއަކާއެކު، އެ ދެތަރިން ހަނީމޫންގެ ދުވަސްތައް ހޭދަ ކުރަމުން އަންނަނީ ރާއްޖޭގައިކަން މިހާރު ވަނީ ޔަގީން ކުރެވިފަ އެވެ.
ބިޕާޝާ އިންސްޓާގްރާމް ކުރި ފޮޓޯގައި، އެ ދެތަރިންނަށް މަރުހަބާ ކިޔުމަށް ޖުމެއިރާ ވިޓަވެލި ރިސޯޓުން ތައްޔާރުކޮށްފައިވާ ކޭކެއް ފެނެ އެވެ. އަދި އެ ކޭކުގައި ރިސޯޓުގެ ނަން ލިޔެފައި ވެއެވެ.
ކޮންމެއަކަސް މިދިޔަ މަހުގެ 30 ވަނަ ދުވަހު ކައިވެނި ކުރި ދެ ތަރިން، މާމުއި ހަނދުގެ ދުވަސްތައް ހޭދަ ކުރަމުން ދަނީ ދުނިޔެ މަތީގެ ސުވަރުގެ ކަމަށްވާ ރާއްޖޭގައިކަން މިހާރު ވަނީ ޔަގީން ކުރެވިފަ އެވެ.
ބިޕާޝާ އަދި ކަރަން ވަނީ މިދިޔަ އަހަރު ވެސް ޗުއްޓީ ހޭދަކޮށްލުމަށް ރާއްޖެ އައިސްފަ އެވެ. ރާއްޖޭގެ ފަތުރުވެރިކަން އިޝްތިހާރު ކުރުމުގެ ގޮތުން ބޭރުގެ މަޝްހޫރު ފަންނާނުންނަށް ދައުވަތު ދީގެން މިދިޔަ އަހަރު ބޭއްވި "ވިޒިޓް މޯލްޑިވްސް އިޔަރ މިއުޒިކް ފެސްޓިވަލް"ގެ މިނިވަންދުވަހުގެ އެޑިޝަންގައި ބައިވެރިވުމަށް ދެ ތަރިން ރާއްޖެ އައިސް ތިބީ ފޯ ސީޒަން ކުޑަ ހުރާގަ އެވެ.
މިއުޒިކް ފެސްޓިވަލްގައި ކަރަން އަދި ބިޕާޝާ ވެސް ވަނީ ދިވެހި ރައްޔިތުންނާ، ސްޓޭޖް މަތިން ބައްދަލުކޮށް ވާހަކަދައްކައިފި އެވެ. އަދި ކޮންމެ މަހަކު ވެސް ރާއްޖެ އަންނަން ބޭނުން ކަމަށް ބިޕާޝާ އޭރު ވަނީ ބުނެފަ އެވެ.