ނުކުޅެދުންތެރިކަން ހުންނަ މީހުންނާއި ކުދިންނަށް ޖެންޑާ މިނިސްޓްރީން ބާއްވަމުން އަންނަ "ރެދަން" މައުރަޒުގައި މި އަހަރު ބައިވެރިވުމުގެ ފުރުސަތު ހުޅުވާލައިފި އެވެ.
ރެދަން މައުރަޒަކީ ނުކުޅެދުންތެރިކަން ހުންނަ ފަރާތްތަކުން ކުރަމުން އަންނަ މަސައްކަތްތަކާއި ތައްޔާރުކުރާ ތަކެތި ދައްކާލާއި އެކަންތައްތަކާ ބެހޭ ގޮތުން މައުލޫމާތު ހިއްސާކުރުމަށް ބާއްވަމުން އަންނަ މައުރަޒެކެވެ.
މީގެ އިތުރުން، އެ މައުރަޒުގެ ސަބަބުން ނުކުޅެދުންތެރިކަން ހުންނަ މީހުން އުފައްދާ ތަކެތި ވިއްކުމާއި ވިއްކޭނެ މަގު ތަނަވަސްކޮށްދެވޭނެ ކަމަށް މިނިސްޓްރީން ބުނެ އެވެ.
މި އަހަރުގެ މައުރަޒު ބާއްވަން ނިންމާފައި ވަނީ އަންނަ އޮގަސްޓް މަހުގެ ތެރޭގަ އެވެ.
މުޅި ރާއްޖެ އަށް ހުޅުވާލައިގެން މިދިޔަ އަހަރުން ފެށިގެން ބާއްވަމުން އަންނަ އެ މައުރަޒުގައި ބައިވެރިވުމުގެ ފުރުސަތު ހުޅުވާލާފައި ވަނީ އަންނަ މަހުގެ ނިޔަލަށެވެ.
އެގޮތުން މާލޭގައި ނަމަ ލޯ އެންޑް ޖެންޑާ މިނިސްޓްރީއަށް އަދި އަތޮޅުތެރޭގައި ނަމަ އެ ރަށެއްގެ ރަށު ކައުންސިލް ނުވަތަ ފެމެލީ އެންޑް ޗިލްޑްރަންސް ސާވިސް ސެންޓަރަށް ފޯމް ހުށަހެޅޭނެ އެވެ.
ެޖެންޑާ މިނިސްޓްރީގެ ޑިސޭބިލިޓީ ޑިވިޝަންގެ އޮފިޝަލަކު ވިދާޅުވީ، މި އަހަރުގެ މައުރަޒުން ވެސް މައުރަޒަށް ޒިޔާރަތްކުރާ މީހުންނަށް އެންމެ ކަމުދާ އުފެއްދުމަށް ވޯޓު ދީގެން ހޮވާ، ވިޒިޓާސް ޗޮއިސް އެވޯޑް ދޭނެ ކަމަށެވެ.
މީގެ އިތުރުން، މައުރަޒަށް އަންނަން ބޭނުންވާ ނުކުޅެދުންތެރިކަން ހުންނަ ބޭފުޅުންނަށާއި އެބޭފުޅުންގެ އެއްޗެހި މާލެ ގެނައުމުގެ މަސައްކަތުގައި މިނިސްޓްރީގެ ފަރާތުން އެހީތެރިކަން ފޯރުކޮށްދޭނެ ކަމަށް އޮފިޝަލު ވިދާޅުވި އެވެ.
މިދިޔަ އަހަރު ބޭއްވި ރެދަން މައުރަޒުގައި މުޅި ރާއްޖެއިން ސްކޫލް ދަރިވަރުންނާ އެކު 30 މީހުން ބައިވެރިވެފައިވެ އެވެ.