ހިރިގަލުގެ މިސްކިތްތަކުގެ ކުރެހުންތައް ދައްކާލުމަށްޓަކައި މައުރަޒެއް ބޭއްވުމަށް އެމްއެންޑީއެފް އާއި މޯލްޑިވްސް ޑިޕާޓްމަންޓް އޮފް ހެރިޓޭޖްއާ ދެމެދު އެއްބަސްވުމެއްގައި ސޮއިކޮށްފި އެވެ.
"ހިރިގަލު މިސްކިތްތައް ދުނިޔޭގެ ތަރިކައިގެ ލިސްޓަށް" ނަމުގައި ބާއްވަން ނިންމައިފައިވާ އެ މައުރަޒަކީ ހިރިގަލު މިސްކިތްތަކުގެ ކުރެހުންތަކާބެހޭ މައުލޫމާތު ވީހާވެސް ގިނަ އާންމު ރައްޔިތުންނަށް ފޯރުކޮށްދީ، ހޭލުންތެރިކުރުވުމުގެ މަގުސަދުގައި ބާއްވާ މައުރަޒެކެވެ.
ނަމަވެސް މައުރަޒު ބާއްވާނެ ތާރީހެއް އަދި ނިންމާފައެއްނުވެ އެވެ.
މައުރަޒު ބޭއްވުމުގެ އެއްބަސްވުމުގައި އެމްއެންޑީއެފްގެ ފަރާތުން ސޮއިކުރެއްވީ، އެމްއެންޑީއެފްގެ މިލިޓަރީ އިންޖިނިއާސްގެ އޮފިސަރު ކޮމާންޑިން ކެޕްޓަން އަހުމަދު ޝާރިމެވެ. މޯލްޑިވްސް ޑިޕާޓްމަންޓް އޮފް ހެރިޓޭޖްގެ ފަރާތުން ސޮއިކުރެއްވީ، އެ ޑިޕާޓްމަންޓްގެ ސީނިއާ ޕޮލިސީ އެގްޒެކެޓިވް އަބްދުއްސަމީއު ހަސަނެވެ.
މީގެ އިތުރުން، މިއެއްބަސްވުމުގައި، ރާއްޖޭގައި ހިރިގަލުގެ މިސްކިތްތަކުގެ ދިރާސާ ކުރައްވާ ބޭފުޅެއްކަމަށްވާ މައުރޫފް ޖަމީލް ވެސް ވަނީ ސޮއިކުރައްވާފައެވެ.
މިއަދު ސޮއިކުރެވުނު އެއްބަސްވުމުގެ ދަށުން، މައުރަޒުގައި ޑިސްޕްލޭ ކުރާ ބައިތަކުގެ ތެރެއިން، މާލޭ ހުކުރު މިސްކިތުގެ އާކިޓެކްޗަރަލް ކުރެހުންތަކުގެ އިތުރުން ޑިސްޕްލޭ ފޮޓޯތައް ތައްޔާރުކުރުމުގެ މަސައްކަތް ކުރާނީ އެމްއެންޑީއެފްގެ އާކިޓެކްޗަރުންގެ ބައިވެރިވުމާއެކުގަ އެވެ.
ދިވެހިރާއްޖޭގައި ހުރި ކުރީގެ ހަ މިސްކިތެއް ވަނީ ދުނިޔޭގެ ތަރިކައިގެ ވަގުތީ ލިސްޓުގައި ހިމަނާފައިވެ އެވެ.