ސާފުތާހިރުކަން ދަށްވުމުގެ ސަބަބުން ބަންދުކުރި އެލްސިއޯން ބޭކަރީ ހުޅުވައި ހިދުމަތް ދިނުމުގެ ހުއްދަ ދީފި އެވެ.
އެލްސިއޯން ބޭކަރީގެ ޕަވާއޮފް އެޓާނީ މުހައްމަދު މަޖުދީ އިބްރާހިމް (މާޅޮހު މަޖުދީ) މިއަދު ސަން އަށް ވިދާޅުވީ އެބޭކަރީ ހިންގުމުގެ ހުއްދަ ލިބިފައިވާ ކަމަށާއި މިއަދު ހަވީރު 4:00 އިން ފެށިގެން އެ ބޭކަރީ އިން ކުރިއެކޭ އެއްގޮތަށް ހިދުމަތްދެމުން ދާނެ ކަމަށެވެ.
ބޭކަރީ ބަންދުކުރަން ޖެހުނީ އެތަން ހިންގަން ތިބި ބައެއްގެ މައްސަލައެއްގެ ސަބަބުން ދިމާވި ކަމަކުން ކަމަށާއި ދެން އެފަދަ ކަމެއް ދިމާނުވާނެ ކަމަށް އޭނާ ވިދާޅުވި އެވެ.
އެލްސިއޯން ބޭކަރީގެ އިންސްޕެކްޝަން މި މަހު 20 ވަނަ ދުވަހު ހެދުމަށް ފަހު އެބޭކަރީ ބަންދުކުރީ ބުރާސްފަތި ދުވަހު ބަންދުކުރީ ސާފު ތާހިރުކަން ދަށްވުމުގެ ސަބަބުންނެވެ.
އާންމު އުސޫލެއްގެ ދަށުން އެގޮތަށް ބަންދުކުރާތަންތަން އަލުން ހުޅުވޭނީ ފުޑް އެންޑް ޑުރަގް އޮތޯރިޓީން އިން ބުނާމިންގަނޑަކަށް ބަދަލުކުރުމުންނެވެ.
އެލްސިއޯން ބޭކަރީއަކީ ގިނަ އަދަދަކަށް ތަފާތު ވައްތަރުގެ ކެއިންބުއިމަށް ބޭނުންވާތަކެތި އުފައްދާތަނެކެވެ. އޭގެ ތެރޭގައި ޕާނާއި ބަނަސް ހިމެނެ އެވެ. އެލްސިއޯން ބޭކަރީ ބަންދުކުރުމާ އެކު މާލޭ ބާޒާރުގައި ޕާން މަދުވެ ޕާންލިބުމުގައި އިއްޔެ ވަނީ ދަތިތަކަކާ ކުރިމަތިލާންޖެހިފަ އެވެ.