ތައިލެންޑުގެ ބޭސް އުފައްދާ ކުންފުންޏެއްގެ ބޭސްތަކެއްގައި ނުރައްކާތެރި ކެމިކަލެއް ހުރުމުން، ސަމާލުވުމަށް ފުޑް އެންޑް ޑްރަގް އޮތޯރިޓީ (އެފްޑީއޭ)އިން އިލްތިމާސްކޮށްފިއެވެ.
އެފްޑީއޭއިން މިއަދު ނެރުނު އެލާޓެއްގައި ވަނީ، ތައިލެންޑުގެ ސެވެން ސްޓާސް ފާމަސޫޓިކަލްއިން ބޭސް އުފެއްދުމުގައި ބޭނުންކޮށްފައިވާ ސޯބިޓޯލްގައި ނުރައްކާތެރި ކެމިކަލްގެ މާއްދާއެއް އެކުލެވިގެންވާތީ އެގައުމުގެ ބޭސް ރެގިއުލޭޓް ކުރާ އޮތޯރިޓީން ބޭސްތަކެއް ބާޒާރުން ނަގައި، އެކަން އެ އޮތޯރިޓީއަށް އަންގައިފައިވާ ކަމަށެވެ.
އެ ބޭސްތަކަކީ ރާއްޖެއަށް އިމްޕޯޓް ކުރުމާއި ވިއްކުމަށް ހުއްދަކުރާ ބޭހުގެ ލިސްޓުގައި ހިމެނޭ ބޭސްތަކެއް ނޫން ކަމަށް އެފްޑީއޭއިން ފާހަގަކުރިއެވެ. ނަމަވެސް ތައިލޭންޑަކީ ދިވެހިން ބޭސް ފަރުވާއަށް ގޮސް އުޅޭ ގައުމަކަށް ވެފައި ބައެއް ހާލަތްތަކުގައި އަމިއްލަ ބޭނުމަށް އެގައުމުން ބޭސް އެތެރެކުރާތީ އެކަމަށް ސަމާލުވުމަށް އެފްޑީއޭއިން ވަނީ އެދިފައެވެ.
މީގެ އިތުރުން ރައްކާތެރިކަމުގެ ފިޔަވަޅެއްގެ ގޮތުން، ބޭސް ސިޓީއަށް ބޭސް އެތެރެކުރާއިރު ޚާއްސަ ސަމާލުކަމެއް ދީގެން ޕޯޓްތަކުގައި ބޭސް ބަލައިފާސްކުރަމުން ގެންދާނެ ކަމަށް އެފްޑީއޭއިން ބުންޏެވެ.
އެކަމާ ގުޅޭ އިތުރު މައުލޫމާތު އެ އޮތޯރިޓީގެ ހޮޓްލައިން ނަމްބަރު 7200321އިން ލިބޭނެ ކަމަށް ވެސް އެފްޑީއޭގެ އެލާޓްގައިވެއެވެ.
މީގެ ކުރިން ވެސް ދިވެހީން އާންމު ގޮތެއްގައި ބޭނުންކުރަމުން އައި ބައެއް ބޭސްތަކުގެ ބެޗުތަކުން މައްސަލަ ފާހަގަކުރެވުމުން، ވަކި މުއްދަތަކަށް އެ ބޭހެއް ބޭނުންކުރުން ހުއްޓައިލުމަށް އެ އޮތޯރިޓީން އަންގައިފައިވެއެވެ.