ރާއްޖޭގެ ނޫސްވެރިކަމުގެ ހާލަތާ ބެހޭ ގޮތުން ބޭރުގެ ޑިޕްލޮމެޓިކް މިޝަންތަކުގެ އޮފިޝަލުންނާ ބައްދަލު ކުރަން ދިވެހި ނޫސްވެރިންތަކެއް ރާއްޖެއިން ބޭރަށް ގޮސް ދެއްކި ވާހަކަތަކާ ގުޅިގެން ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމް ކަންބޮޑުވުން ފާޅުކުރައްވައިފި އެވެ.
ޖުމްހޫރީ މައިދާނުގައި މިރޭ ބޭއްވި ރަސްމިއްޔާތެއްގައި ވާހަކަފުޅުދައްކަވަމުން ރައީސް ޔާމީން ވިދާޅުވީ، ދިވެހި ނޫސްވެރިންތަކެއް ލަންކާއަށް ގޮސް ނޫސްވެރިކަމުގެ މިނިވަންކަން ރާއްޖޭގައި ނެތް ކަމަށް ބުނެ ރާއްޖޭން ބޭރުގެ ފަރާތްތަކުގައި ވާހަކަދަ ދައްކަނީ އެ މިނިވަންކަން ރާއްޖޭގައި ނެތިގެން ނޫން ކަމަށެވެ.
ދައުލަތުން ހިންގާ ކަންކަމާ ބެހޭ ގޮތުން ނޫސްތަކުގައި "އަރި ހުރަހަށް" ޖަހަން ސަރުކާރުން މަރުހަބާ ކިޔާނެ ކަމަށާއި ނަމަވެސް މުއައްސަސާއެއްގެ އަބުރު ނަގާލުމުގެ ފުރުސަތެއް ނުދެއްވާނެ ކަމަށް ރައީސް ވިދާޅުވި އެވެ.
އަރި ހުރަހަށް ޖަހާނެ އެއްޗެއް، ދިގު މިން އޭފޯ ސައިޒް ވިޔަސް އޭތުރީ ސައިޒް ވިޔަސް ޖަހަން ކެރުނު ވަރަކަށް ޖަހަންވީ. އެކަމަށް މަރުހަބާ ކިޔާނަން، ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމް
"ކޮން މިނިވަން ކަމެއްތޯ މިތާ ނެތީ. ކޮން މިނިވަންކަމެއް ނެތިގެންތޯ މިއުޅެނީ. މި މިނިވަންކަމަކީ މީހުންގެ އަބުރު ނަގާލަން ހުއްޓުވަން ކުރާ މަސައްކަތްތޯ. އެއީތޯ މިނިވަންކަން ނެތުމަކީ. ނޫހެއްގަ ޖަހާނެ ވަރަކަށް ދައުލަތުން ހިންގާކަމަކާ ބެހޭ ގޮތުން ވާހަކަ ޖަހަންވީ. ދައުލަތުގެ މުއައްސަސާގެ އަބުރެއް ނަގައެއް ނުލެވޭނެ،" ރައީސް ވިދާޅުވި އެވެ.
ދިވެހި ނޫސްވެރިން ކޮލޮމްބޯގައި ތިބޭ ޑިޕްލޮމެޓުންނާ ބައްދަލުކުރަނީ.
އެމަނިކުފާނު އެގޮތަށް ވިދާޅުވެފައި މި ވަނީ، ދިވެހި ނޫސްވެރިންތަކެއް ސްރީ ލަންކާއަށް ގޮސް "އަބުރު ރައްކާތެރިކުރުމާއި ޚިޔާލު ފާޅުކުރުމުގެ ބިލު"ގެ މައުލޫމާތާއި ނޫސްވެރިން ހައްޔަރުކޮށް އެ މީހުންގެ މައްޗަށް ކުރަމުންދާ ދައުވާތަކާއި ހަވީރު ނޫސް ހުއްޓާލަން ޖެހުމާއި އަދި މީޑިއާ ސްޓޭޝަންތަކާއި ވަކިވަކި ނޫސްވެރިންނަށް ލިބެމުންދާ އިންޒާރުތަކާ ބެހޭ މައުލޫމާތު ކޮލޮމްބޯގައި ތިބި ޑިޕްލޮމެޓުންނާ ހިއްސާ ކޮށްފައި ވާތީ އެވެ.
ރައީސް ވިދާޅުވީ، ކޮންމެ ބައެއްގެ ވެސް ދާހިލީ ކަންކަމަކީ އެބަޔަކު އަމިއްލައަށް އެކަމެއް މުރާޖާކޮށް ނިންމާނެ ކަންތައްތަކެއް ކަމަށެވެ. އަދި އަމިއްލައަށް އެފަދަ މައްސަލަތައް ނިންމޭނެވަރުގެ ގާބިލްކަމާއި ހަކަތަ އާއި ވިސްނުން ދިވެހިންގެ އެބަހުރި ކަމަށް ވިދާޅުވި އެވެ.
އެގޮތުން، ރާއްޖޭގައި އެހެން ގައުމެއްގައި ނެތް ކަމެއް ނެތް ކަމަށާއި ނަމަވެސް އަބުރު ނަގާލަން ކުރާ މަސައްކަތްތަކަށް ޖާގައެއް ނުދެވޭނެ ކަމަށް ރައީސް ޔާމީން ވިދާޅުވި އެވެ.