މައިލޯ އިންޓާ ސްކޫލް ފުޓްބޯޅަ މުބާރާތުގެ 16 އަހަރުން ދަށުގެ ފައިނަލުން ބަލިވި ނަމަވެސް ހިތްވަރު އެލުވާނުލައި އަންނަ އަހަރުގެ މުބާރާތުގައި ވާދަކުރުމަށް މާލެ އަންނާނެ ކަމަށް ދ. އަތޮޅު ތައުލީމީ މަރުކަޒުގެ ޕްރިންސިޕަލް މުހައްމަދު އަހުމަދު ވިދާޅުވެއްޖެ އެވެ.
އިއްޔެ ހަވީރު ގައުމީ ބޯޅަ ދަނޑުގައި ކުޅުނު ފައިނަލް މެޗުގައި 2-0ގެ ނަތީޖާ އަކުން ހުޅުމާލޭ ޣާޒީ ސްކޫލް އަތުން ބަލިވި ރަނަރަޕް ޓީމުގެ ގޮތުގައި މުބާރާތް ނިންމާލި އިރު މުހައްމަދު ވިދާޅުވީ ގިނަ ގޮންޖެހުންތަކެއް ކުރިމަތިވި ނަމަވެސް އެ ޓީމުގެ ފަރާތުން ފެނުނު ކުޅުމަށް ތައުރީފް ހައްގު ކަމަށެވެ.
"އަޅުގަނޑުމެން ޓީމްގެ ކުޅުންތެރިން މި ތިބެނީ އެ ކޯއްޗެއްގެ އަމިއްލަ ޚަރަދުގައި. ތިމާގެ މީހެއް ނުވަތަ ރައްޓިއްސެއްގެ ގޭގައި. އެހެން ކަމުން ހުރިހާ ކުޅުންތެރިން ވެސް އެކިއެކި ތަންތަނުގައި ތިބެން ޖެހުމުން ވަރަށް ބޮޑެތި ދަތިތަކާ ދިމާވި،" އަހުމަދު މުހައްމަދު ވިދާޅުވި އެވެ.
އޭނާ ވިދާޅުވީ އެ ޓީމަށް ދިމާވި އެންމެ ބޮޑު ގޮންޖެހުމަކީ ހުރިހާ ކުޅުންތެރިން ވެސް ވަކިން ތިބެން ޖެހުމާ އެކު ޓީމް ވޯކް ދަށް ވުމުގެ މައްސަލަތައް ކަމަށެވެ.
އޭނާ ވިދާޅުވީ ކުޅިވަރު ކުޅުންތެރިންނަށް މާލޭގައި އެކޮމަޑޭޝަން ބްލޮކެއް ހުރި ނަމަވެސް ދ. އަތޮޅު ތައިލީމީ މަރުކަޒުގެ ޓީމަށް އެ ތަނުން ފުރުސަތެއް ނުލިބޭ ކަމަށާއި އެ ކުދިން ތިބެން ޖެހުނީ އަމިއްލަ ތަން ތާންގައި ކަމަށެވެ.
އޭނާ ވިދާޅުވީ އިންޓާ ސްކޫލް ފުޓްބޯޅަ މުބާރާތަކީ މުޅި ރާއްޖެ އަށް ހުޅުވާލެވިގެން ބާއްވާ މުބާރާތެކަށްވީ ނަމަވެސް އަތޮޅުތަކުން ސްކޫލްތައް ބައިވެރިނުވާ މައިގަނޑު ސަބަބަކީ ވެސް އެކޮމަޑޭޝަންގެ މައްސަލަ ކަމަށާއި ދ. އަތޮޅު ތައުލީމީ މަރުކަޒު މި އަހަރުގެ މުބާރާތުގައި ބައިވެރިވީ އެ އަތޮޅުގެ ވިޔަފާރިވެރިންނާއި ހެޔޮއެދޭ ފަރާތްތަކުގު ދީލަތި އެހީތެރި ކަމާ އެކު ކަމަށެވެ.
މިދިޔަ މަހުގެ 24 ވަނަ ދުވަހުން 16 ވަނަ ދުވަހާ ހަމައަށް މާލޭގައި ކުރިއަށް ގެންދިޔަ 16 އަހަރުން ދަށުގެ ފުޓްބޯޅަ މުބާރާތުގައި ޖުމްލަ އަށް ޓީމް ބައިވެރިވެފައިވާ އިރު ދ. އަތޮޅު ތައުލީމީ މަރުކަޒު ފިޔަވާ ދެން އެހެން ހުރިހާ ޓީމަކީ ވެސް މާލެއަށް ނިސްބަތްވާ ޓީމްތަކެވެ.
"އެ މުބާރާތް ފޯރި ގަދަވެގެންނެއް ނުދާނެ މާލޭގެ ޓީމްތައް އެކަނި ބައިވެރިވެގެން ނެތް. މުބާރާތް އިތުރަށް ފުރިހަމަ ވެގެން ދާނެ އަތޮޅުތަކުން ގިނަ ޓީމްތަކެއް ބައިވެރިވުމުން،" އަހުމަދު މުހައްމަދު ވިދާޅުވި އެވެ.
އޭނާ ވިދާޅުވީ މުބާރާތް ދިގުލާން ޖެހުމަކީ ވެސް އަތޮޅުތަކުން އަންނަ ޓީމުތަކަށް ދިމާވާ ބޮޑުމައްސަލައެއް ކަމަށާއި ރަށުން އައިސް ކިޔެވުން މެދު ކަނޑާލައިގެން ތިބުމަކީ ވެސް ފަސޭހަ ކަމެއް ނޫން ކަމަށެވެ.
އެފްއޭއެމް އިން ކޮންމެ އަހަރަކު ވެސް ބާއްވަމުން އަންނަ އިންޓާ ސްކޫލް ފުޓްބޯޅަ މުބާރާތް ތިން އުމުރު ފުރާއަކަށް ބަހާލައިގެން ގެންދިޔަ އިރު 14 އަހަރުން ދަށުގެ ޗެމްޕިއަން ކަން ގެންދިޔައީ އިސްކަންދަރު ސްކޫލް އެވެ. ސޯޅަ އަހަރުން ދަށުގެ ޗެމްޕިއަންކަން ޣާޒީ ސްކޫލް ހޯދި އިރު 18 އަހަރުން ދަށުގެ އުމުރުފުރާގެ ޗެމްޕިއަނަކީ އަހުމަދިއްޔާ އިންޓަނޭޝަނަލް ސްކޫލް އެވެ.