ފޯ ސީޒަންސް ރިސޯޓްސްއިން އިސްނަގައިގެން ކޮންމެ އަހަރަކު ވެސް ފުރާވަރު އުމުރުގެ ދިވެހި ދަރިވަރުންނަށް ހޮސްޕިޓެލިޓީ ދާއިރާއިން ހިންގާ ދަސްވާރު ޕްރޮގްރާމުގެ ދަށުން މި އަހަރު 52 ދަސްވާރުން ދަސްވެނިވެއްޖެ އެވެ.
ފޯ ސީޒަންސް ލަނޑާ ގިރާވަރާއި ފޯ ސީޒަންސް ކުޑަ ހުރާގައި ކުރިއަށް ގެންދިޔަ އެޕްރެންޓިސްޝިޕް ޕްރޮގްރާމުގައި މިދިޔަ އަހަރު، ރާއްޖޭގެ ޖުމްލަ 27 ރަށަކުން 305 ދަރިވަރުން އެޕްރެންޓިސްޝިޕަށް ހުށަހެޅި އިރު، އޭގެ ތެރެއިން ފުރުސަތު ދީފައި ވަނީ 61 ދަރިވަރުންނަށެވެ. އެ 61 ދަރިވަރުންގެ ތެރެއިން ދަސްވާރުކަން ފުރިހަމަ ކުރީ 52 ދަރިވަރުންނެވެ.
ދަސްވެނިވި ދަރިވަރުންގެ ތެރެއިން 30 ދަރިވަރަކު ދަސްވާރުކަން ފުރިހަމަ ކުރީ ފޯ ސީޒަންސް ލަނޑާ ގިރައިވަރުންނެވެ. އަދި ބާކީ 22 ދަރިވަރުން ދަސްވާރުކަން ފުރިހަމަ ކުރީ ފޯ ސީޒަންސް ކުޑަ ހުރާއިންނެވެ.
ފަންސާސް ދެ ދަރިވަރުންގެ ތެރެއިން ސޭފް މެރިޓައިމް ޓްރާންސްޕޯޓުގެ ދާއިރާއިން ފަސް ދަރިވަރަކު ދަސްވެނިވެފައިވެ އެވެ. އަދި އަށް ދަރިވަރަކު ހައުސްކީޕިންގެ ދާއިރާއިން ދަސްވެނިވި އިރު، ވޯޓާ ސްޕޯޓްސް އެޓެންޑާންޓުގެ ގޮތުގައި ތިން ދަރިވަރަކު، ޑައިވް މާސްޓަރުންގެ ގޮތުގައި ތިން ދަރިވަރަކު، މެރީން ބަޔޮލޮޖީއިން ދެ ދަރިވަރަކު، އިންޖިނިއަރިންއިން ތިން ދަރިވަރަކު އަދި ފްރަންޓު އޮފީސްއިން ތިން ދަރިވަރަކު ދަސްވެނިވެފައި ވެ އެވެ.
މީގެ އިތުރުން، ފުޑް އެންޑް ބެވެރެޖެސް ސާވިސްއިން 13 ދަރިވަރަކާއި، ފުޑް އެންޑް ބެވެރެޖެސް ޕްރިޕެރޭޝަނުން 10 ދަރިވަރަކު ދަސްވެނިވި އިރު، މިއަހަރު އަލަށް ފެށި ސާފް އެޓެންޑަންޓުންގެ ދާއިރާއިން ދެ ދަރިވަރަކު ދަސްވެނިވެފައިވެ އެވެ.
މިއަދު ބޭއްވި ދަސްވެނިވުމުގެ ރަސްމިއްޔާތުގައި، ފޯ ސީޒަންސް ހޮސްޕިޓެލިޓީ އެޕްރެންޓިސްޝިޕުގައި މިއަހަރު ކިޔަވައި ތަމްރީނު ލިބިގަންނަން ފަށާނެ 65 ދަރިވަރުން ވަނީ ތައާރަފު ކޮށްފަ އެވެ.
ފޯ ސީޒަންސް އެޕްރެންޓިސްޝިޕުގައި ބައިވެރިވުމުގެ ފުރުސަތު ދެނީ 17 އަހަރާއި 20 އަހަރާ ދެމެދުގެ ދިވެހި ކުދިންގެ ތެރެއިން އޯ ލެވެލް ފެންވަރަށް ކިޔަވައި، އިނގިރޭސި ލިޔެ ކިޔުމަށާއި އެ ބަހުން ވާހަކަ ދެއްކުމަށް ފަރިތަ ކުދިންނަށެވެ. އަދި މި ޕްރޮގްރާމުގައި ބައިވެރިވުމަށް ހޮސްޕިޓެލިޓީ އަދި ޓުއަރިޒަމްގެ ދާއިރާއިން މީގެ ކުރިން ތަޖުރިބާ ލިބިފައި ހުންނާކަށް ނުޖެހެ އެވެ.
އެއް އަހަރު ދުވަހުގެ މުއްދަތަކަށް، ކޮންމެ އަހަރަކު ވެސް ފޯ ސީޒަންސްއިން ކުރިއަށް ގެންދާ މި ޕްރޮގްރާމު ރާއްޖޭގައި ހިންގާތާ މިއީ 14 ވަނަ އަހަރެވެ.
މި ރަސްމިއްޔާތުގައި ވާހަކަ ދައްކަވަމުން، ފޯ ސީޒަންސް ރިސޯޓްސް މޯލްޑިވްސްގެ ޖެނެރަލް މެނޭޖާ އަދި ފޯ ސީޒަންސްގެ ރީޖަނަލް ވައިސް ޕްރެޒިޑެންޓް އާމަންޑޯ ކްރެންޒްލިން ވިދާޅުވީ، މިދިޔަ 14 އަހަރު ދުވަހުގެ ތެރޭގައި އެ ކުންފުނިން ރާއްޖޭގެ 440 އަށް ވުރެ ގިނަ ޒުވާނުން ފަތުރުވެރިކަމުގެ ދާއިރާއިން ތަމްރީނުކޮށް، ވަޒީފާގެ މައިދާނަށް ނެރެފައިވާ ކަމަށެވެ. އަދި މިއީ އެންމެ ކުންފުންޏަކުން އުފެއްދޭ ހުނަރުވެރި ޒުވާނުންގެ އަދަދު ކަމަށާއި، ރާއްޖޭގައި އޮޕަރޭޓުކުރާ ބޭރުގެ ބޮޑެތި، ގިނަ ކުންފުނިތަކުގެ ތެރެއިން އިތުރު ކުންފުނިތަކަކުން މިފަދަ ހަރަކާތެއް ހިންގައިދެން ދިވެހި އެތަކެއް ޒުވާނުންނަށް ފަހި ފުރުސަތުތަކެއް ތަނަވަސް ކޮށްދެވޭނެ ކަމަށެވެ.