ގދ. ތިނަދޫ އިންޖީނުގޭގައި އަލިފާނުގެ ހާދިސާއެއް ހިނގައި މުޅި ރަށް ކަރަންޓް ދިނުމަށް ބޭނުން ކުރި ތިން އިންޖީނު އެއްކޮށް ހަލާކުވި މައްސަލައިގެ ތަހުގީގަށް ހައްޔަރުކުރި އިންޖީނުގޭގެ ދެމުވައްޒަފުން ދޫކޮށްލައިފި އެވެ.
އެ މައްސަލައިގެ ތުހުމަތައް ހައްޔަރުކޮށްފައި ވަނީ ތިނަދޫ ފެނަކަ ބުރާންޗުގެ އެސިސްޓެންޓް މެނޭޖަރު އިބްރާހިމް އަހުމަދު އާއި އެ އިންޖީނުގޭ ޑުރައިވަރު މުހައްމަދު ޔާމީން އެވެ.
އެނގިފައިވާގޮތުގައި އެ ދެ މީހުން ދޫކޮށްލީ މިއަދު 1:15 ހާއިރު އެވެ.
ފުލުހުންގެ މީޑިއާ އޮފިޝަލަކު "ސަން" އަށް ވިދާޅުވީ އެމައްސަލާގައި ފުރަތަމަ ހައްޔަރުކުރި ދެމީހުން ދޫކޮށްލީ ތަހުގީގުގައި އެމީހުންގެ ބައި ފުރިހަމަވެ އިތުރަށް ބަންދުގައި ބަހައްޓަން ނުފެންނާތީ ކަމަށެވެ.
އެދެމީހުންގެ އިތުރުންވެސް އިތުރު މީހަކު އެމައްސަލާގައި ފުލުހުން ވަނީ ހައްޔަރުކޮށްފަ އެވެ. އެމީހާއަކީ 40 އަހަރުގެ ދިވެހި ފިރިހެނެއް ކަމަށް ފުލުހުން ވަނީ ބުނެފަ އެވެ. އޭނާގެ ބަންދަށް ކޯޓުން ވަނީ 15 ދުވަސް ޖަހާފަ އެވެ.
ތިނަދޫ އިންޖީނުގޭގައި އަލިފާން ރޯވެފައި ވަނީ މިދިޔަ ޖެނުއަރީ މަހުގެ 26 ވަނަ ދުވަހު އެވެ. ހާދިސާގައި އިންޖީނުގޭގައި ހުރި ހުރިހާ އިންޖީނެއް ބޭނުން ނުކުރެވޭ ވަރަށް ވަނީ އަނދައިފަ އެވެ. އެ ހާދިސާގެ ސަބަބުން ތިނަދު އަށް ކަރަންޓު ލިބުނީ ފަސް ދުވަސް ފަހުން ނެވެ.