އަންނަ އަހަރަށް ލަފާކޮށް ރައްޔިތުންގެ މަޖިލީހަށް ހުށަހެޅި 27.457 ބިލިއަން ރުފިޔާގެ ދައުލަތުގެ ބަޖެޓު ރައްޔިތުންގެ މަޖިލީހުން މިއަދު ފާސްކޮށްފި އެވެ.
އަންނަ އަހަރުގެ ބަޖެޓު ފާސްކުރަން ވޯޓު ދެއްވީ 59 މެމްބަރުން ނެވެ. ބަޖެޓް ފާސްކުރުމާ ދެކޮޅަށް ވޯޓު ދިނީ 19 މެމްބަރުންނެވެ. އަންނަ އަހަރުގެ ބަޖެޓަށް ވޯޓު ނުދޭނެ ކަމަށް އެމްޑީޕީން ވަނީ މިއަދު ބުނެފަ އެވެ.
އަންނަ އަހަރުގެ ބަޖެޓަށް އިދިކޮޅު އެމްޑީޕީން ވަނީ ޖުމުލަ 11 އިސްލާހެއް ހުށަހަޅާފަ އެވެ. ނަމަވެސް އެއިން އެއްވެސް އިސްލާހެއް ފާހެއް ނުވެ އެވެ.
އަންނަ އަހަރަށް ލަފާކުރާ ބަޖެޓު ރައްޔިތުންގެ މަޖިލީހަށް ފިނޭންސް މިނިސްޓަރު އަބްދުﷲ ޖިހާދު ހުށަހެޅުއްވީ މި މަހުގެ 12 ވަނަ ދުވަހު އެވެ. އަދި ބަޖެޓު ކޮމެޓީން ބަޖެޓުގެ މަސައްކަތް ނިންމާފައި ވަނީ މިދިޔަ ބުރާސްފަތި ދުވަހުގެ ރޭގެ ވަގުތެއްގަ އެވެ.
ބަޖެޓު ކޮމެޓީން ބަޖެޓު ފާސްކުރަން ނިންމިއިރު އެ ކޮމެޓީން ވަނީ ޝަރުއީ ދާއިރާއަށް 20 މިލިއަން ރުފިޔާ އިތުރުކޮށްދީފަ އެވެ.
އަންނަ އަހަރަށް ލަފާކޮށް ސަރުކާރުން ރައްޔިތުންގެ މަޖިލީހަށް ހުށަހަޅާފައިވާ ބަޖެޓުގައި ޕަބްލިސް ސެކްޓާ އިންވެސްޓުމަންޓް ޕްރޮގުރާމް (ޕީއެސްއައިޕީ)ގެ މަޝްރޫއުތަކަށް 9.1 ބިލިއަން ރުފިޔާ ވަނީ ހިމަނާފަ އެވެ.
ބަޖެޓުގައި ޕީއެސްއައިޕީގެ މަޝްރޫއުތަކަށް ހިމަނާފައިވާ 9.1 ބިލިއަން ރުފިޔާގެ ތެރެއިން އާއްމު ބަޖެޓުން ހޭދަ ކުރުމަށް ކަނޑައަޅާފައި ވަނީ 5.2 ބިލިއަން ރުފިޔާ އެވެ. އަދި ބޭރުގެ ލޯނު އެހީގެ ގޮތުގައި 2.7 ބިލިއަން ރުފިޔާއާއި ހިލޭ އެހީއާ ޓުރަސްޓު ފަންޑުގެ ގޮތުގައި 1.2 ބިލިއަން ރުފިޔާ ލިބޭނެ ކަމަށް ފިނޭންސް މިނިސްޓަރު އަބްދުﷲ ޖިހާދު ވިދާޅުވިއެވެ.
އަންނަ އަހަރުގެ ބަޖެޓުގައި ޕީއެސްއައިޕީން އެންމެ ބޮޑު ހޭދައެއް ކުރުމަށް ހިމަނާފައި ވަނީ ލަފާ ފުރުމުގެ ދަތިކަން ހައްލު ކުރުމާއި ވައިގެ ބަނދަރުތައް ތަރައްގީ ކުރުމުގެ މަޝްރޫއުތަކަށެވެ. އެކަމަށްޓަކައި އަންނަ އަހަރު 63 މަޝްރޫއުއެއް ކުރިއަށް ގެންދިއުމަށް ވަނީ ނިންމާފައެވެ. އެއީ 2.6 ބިލިއަން ރުފިޔާގެ މަޝްރޫއުތަކެކެވެ. އޭގެތެރެއިން 62 ރަށެއްގެ ބަނދަރު ހެދުމުގެ މަސައްކަތްތަކަށް 783 މިލިއަން ރުފިޔާ ހޭދަ ކުރާނެ އެވެ.
އަންނަ އަހަރުގެ ބަޖެޓުގައި ބިން ހިއްކުމާއި މަގު ހެދުމަށް 1.2 ބިލިއަން ރުފިޔާ ހޭދަކުރުމަށް ސަރުކާރުން ވަނީ ނިންމާފައެވެ. އެގޮތުން ނުވަ ރަށެއްގެ ބިން ބޮޑު ކުރުމުގެ މަސައްކަތް ކުރުމަށް ސަރުކާރުން ވަނީ ނިންމާފައެވެ. އަދި އަންނަ އަހަރުގެ ބަޖެޓުން ބިން ހިއްކުމުގެ 19 މަޝްރޫއުއެއް ކުރިއަށް ގެންދިއުމަށް ސަރުކާރުން ވަނީ ނިންމާފައެވެ.
އަންނަ އަހަރަށް ލަފާކޮށް ރައްޔިތުންގެ މަޖިލީހަށް ހުށައަޅާފައިވާ 27.457 ބިލިއަން ރުފިޔާގެ ބަޖެޓުގެ ރިކަރަންޓު ހަރަދަކީ ބަޖެޓުގެ 59 ޕަސެންޓެވެ.
ފިނޭންސް މިނިސްޓަރު ޖިހާދު ވިދާޅުވީ ބަޖެޓުގެ 41 ޕަސެންޓް ކަނޑައަޅާފައި ވަނީ ކެޕިޓަލް ހަރަދަށް ކަމަށްވާ އިރު އޭގެ 80 ޕަސެންޓް ހަރަދުކުރެ ވެނީ ޕަބްލިކް ސެކްޓާ އިންވެސްޓްމަންޓް ޕްރޮގުރާމް (ޕީއެސްއައިޕީ) ޕުރޮޖެކްޓްތަކަށް ކަމަށެވެ.
އަންނަ އަހަރުގެ ބަޖެޓުން އާމްދަނީއާއި ހިލޭ އެހީގެ ގޮތުގައި 22.8 ބިލިއަން ރުފިޔާ ލިބޭނެ ކަމަށް ބެލެވޭ އިރު އޭގެ ތެރޭގައި ހިމެނެނީ ޓެކްސްގެ ގޮތުގައި ލިބޭނެ ކަމަށް ބެލެވޭ 16.8 ބިލިއަން ރުފިޔާއި ޓެކްސް ނޫންގޮތުގައި ލިބޭނެ ކަމަށް ލަފާކުރެވޭ 3.7 ބިލިއަން ރުފިޔާ އާއި ހިލޭ އެހީގެ ގޮތުގައި ލިބޭނެ ކަމަށް ލަފާކުރެވޭ 1.5 ބިލިއަން ރުފިޔާ އަދި އާމްދަނީ އިތުރުކުރުމަށް ހުށައަޅާފައިވާ ކަންކަމުން ލިބޭނެ ކަމަށް ލަފާކުރެވޭ ހަތަރު ބިލިއަން ރުފިޔާ ކަމަށް ވެސް މިނިސްޓަރު ޖިހާދު ވިދާޅުވި އެވެ.
ޖިހާދު ވިދާޅުވީ އަންނަ އަހަރަށް ލަފާކުރާ ބަޖެޓް ޑެފެސީޓަކީ 3.4 ބިލިއަން ރުފިޔާ ކަމަށާއި އެއީ ޖީޑީޕީގެ ހަ ޕަސެންޓް ކަމަށެވެ. ޑެފެސިޓް ފޫބަށްދާނީ ބޭރުގެ އެހީއާއި އެތެރެއިން ހޯދާ އާމްދަނީން ކަމަށް މިނިސްޓަރު ވިދާޅުވި އެވެ.