އަންނަ އަހަރަށް ލަފާކޮށް ރައްޔިތުންގެ މަޖިލީހަށް ދައުލަތުން ހުށަހަޅާފައިވާ 27.457 ބިލިއަން ރުފިޔާގެ ބަޖެޓަކީ ރައްޔިތުންގެ ކުރިއެރުމާއި ގައުމުގެ ތަރައްގީއަށް މުހިއްމު އެއްޗެއް ކަމަށް ސަރުކާރަށް ތާއީދު ކުރާ ރައްޔިތުން މަޖިލީހުގެ މެމްބަރުން މިއަދު ވިދާޅުވެއްޖެ އެވެ.
އަންނަ އަހަރުގެ ބަޖެޓު ދިރާސާ ކުރި ކޮމެޓީގެ ރިޕޯޓަށް މަޖިލީހުގެ ތަޅުމުގައި ބަހުސް ކުރައްވަމުން މާމިގިލީ ދާއިރާގެ މެމްބަރު ގާސިމް އިބްރާހިމް ވިދާޅުވީ އަންނަ އަހަރުގެ ބަޖެޓުން ހަރަދުކޮށްގެން ތަރައްގީގެ ބިޔަ ބޮޑެތި މަޝްރޫއުތަކެއް ކުރިއަށް ގެންދަން ސަރުކާރުން ނިންމާފައިވާ ކަމަށާއި އެކަމަށް ޓަކައި އަދުގެ ސަރުކާރަށް ޝުކުރުއަދާ ކުރާ ކަމަށް ގާސިމް ވިދާޅުވި އެވެ. ގާސިމް ވިދާޅުވީ ކޮންމެ ރަށަކަށް ވެސް ބޭނުންވާ ކަންކަން ސަރުކާރުން ކޮށްދޭން ބޭނުންވާ ކަމަށެވެ.
"ބައެއް ފަހަރު ރައްޔިތުން ވެސް އެބަޖެހޭ ކެތްތެރިކަން އިސްކުރަން. ހުރިހާ ރަށަކަށް ބޭނުންވާ ހުރިހާ ކަމެއް ކޮންމެ އަހަރަކު ސަރުކާރަށް ވެސް ނުކުރެވިދާނެ. އެކަމަކު ކެތްތެރިކަން އިސްކޮށް ގައުމުގައި ހިންގާ ބިޔަ ބޮޑެތި މަޝްރޫއުތައް ކުރިއަށް ގެންދިއުމުގެ ފުރުސަތު ސަރުކާރަށް އެބަދޭން ޖެހޭ. އެކަންކަން ކޮށް ނިމުނީމާ އެ ލިބޭ ފައިސާ އިތުރުވެގެން ދިޔައީމާ އަޅުގަނޑުމެންނަށް ކަންކަން ކުރެވޭނެ. މިހެން ބުނާއިރު ވެސް ފެނާ ނަރުދަމާ އަކީ ކިހާ މުހިއްމު އެއްޗެއްކަން އެނގޭ. ސިއްހީ ގޮތުން ތައުލީމުގެ ގޮތުން ކުރަން ހުރި ކަންކަމަކީ މުހިއްމު ކަންކަން،" ގާސިމް ވިދާޅުވި އެވެ.
މިއަދުގެ ބަހުސްގައި ވާހަކަފުޅުދައްކަވަމުން ފުވައްމުލަކު އުތުރު ދާއިރާގެ މެމްބަރު އަލީ ޝާހު ވިދާޅުވީ އަންނަ އަހަރަކީ ބަޖެޓަކީ ޕުރޮގުރާމު ބަޖެޓެއް ކަމަށެވެ. އަދި އަންނަ އަހަރުގެ ބަޖެޓަކީ ދިވެހި ރައްޔިތުންނަށް އުފާވެރިކަން ގެނެސްދޭނެ ބަޖެޓެއް ކަމަށް އޭނާ ވިދާޅުވި އެވެ.
"އިއްޒަތްތެރި ރައީސް އަންނަ އަހަރުގެ ބަޖެޓަކީ ހުސްނުވާ އާސަންދަ ކަށަވަރުކޮށްދޭ ބަޖެޓެއް އަންނަ އަހަރުގެ ބަޖެޓަކީ ޒުވާނުންނަށް އިތުރު ފުރުސަތުތަކެއް ފަހިކޮށްދޭ މެދު ފަންތީގެ ވިޔަފާރިވެރި ދިރުވާލަދޭ ބަޖެޓެއް. އަންނަ އަހަރުގެ ބަޖެޓަކީ ދުވަސްވީ މީހުންނާ އަޅާލުމާއި ހަވާސާއިން ބޭރުވެފައިވާ ހާއްސަ އެހީއަށް ބޭނުންވާ މީހުންނަށް އިހުސާންތެރިކަން އެބަ ފޯރުކޮށްދެވޭ،" ޝާހު ވިދާޅުވި އެވެ.
ކޮމެޓީ ރިޕޯޓަށް ބަހުސް ކުރައްވަމުން ބައެއް މެމްބަރުން ވިދާޅުވީ އަންނަ އަހަރުގެ ބަޖެޓަކީ ގައުމީ ތަރައްގީގެ މަޝްރޫއުތަކެއް ހިމެނިފައިވާ ބަޖެޓެއް ކަމަށެވެ. އެހެންނަމަވެސް ސަރުކާރާ އިދިކޮޅު މެމްބަރުން ވިދާޅުވީ ގާނޫނު އަސާސީން ކަންތައްތަކެއް ރައްޔިތުންނަށް ކަށަވަރުކޮށްދީފައިވާއިރު އެކަންކަން ބަޖެޓުގައި ހިމެނިފައި ނުވާ ކަމަށެވެ.
ބަޖެޓު ކޮމެޓީން ބަޖެޓުގެ މަސައްކަތް ދިރާސާ ކުރުމަށް ފަހު ބަޖެޓު ފާސްކުރީ ޝަރުއީ ދާއިރާއަށް 20 މިލިއަން އިތުރުކޮށެވެ.
އަންނަ އަހަރަށް ލަފާކޮށް ސަރުކާރުން ރައްޔިތުންގެ މަޖިލީހަށް ހުށަހަޅާފައިވާ ބަޖެޓުގައި ޕަބްލިސް ސެކްޓާ އިންވެސްޓުމަންޓް ޕްރޮގުރާމް (ޕީއެސްއައިޕީ)ގެ މަޝްރޫއުތަކަށް 9.1 ބިލިއަން ރުފިޔާ ވަނީ ހިމަނާފަ އެވެ.
ބަޖެޓުގައި ޕީއެސްއައިޕީގެ މަޝްރޫއުތަކަށް ހިމަނާފައިވާ 9.1 ބިލިއަން ރުފިޔާގެ ތެރެއިން އާއްމު ބަޖެޓުން ހޭދަ ކުރުމަށް ކަނޑައަޅާފައި ވަނީ 5.2 ބިލިއަން ރުފިޔާ އެވެ. އަދި ބޭރުގެ ލޯނު އެހީގެ ގޮތުގައި 2.7 ބިލިއަން ރުފިޔާއާއި ހިލޭ އެހީއާ ޓުރަސްޓް ފަންޑުގެ ގޮތުގައި 1.2 ބިލިއަން ރުފިޔާ ލިބޭނެ ކަމަށް ފިނޭންސް މިނިސްޓަރު އަބްދުﷲ ޖިހާދު ވިދާޅުވި އެވެ.
އަންނަ އަހަރުގެ ބަޖެޓުގައި ޕީއެސްއައިޕީން އެންމެ ބޮޑު ހޭދައެއް ކުރުމަށް ހިމަނާފައި ވަނީ ލަފާ ފުރުމުގެ ދަތިކަން ހައްލު ކުރުމާއި ވައިގެ ބަނދަރުތައް ތަރައްގީ ކުރުމުގެ މަޝްރޫއުތަކަށެވެ. އެކަމަށް ޓަކައި އަންނަ އަހަރު 63 މަޝްރޫއުއެއް ކުރިއަށް ގެންދިއުމަށް ވަނީ ނިންމައިފަ އެވެ. އެއީ 2.6 ބިލިއަން ރުފިޔާގެ މަޝްރޫއުތަކެކެވެ. އޭގެ ތެރެއިން 62 ރަށެއްގެ ބަނދަރު ހެދުމުގެ މަސައްކަތްތަކަށް 783 މިލިއަން ރުފިޔާ ހޭދަ ކުރާނެ އެވެ.
އަންނަ އަހަރުގެ ބަޖެޓުގައި ބިން ހިއްކުމާއި މަގު ހެދުމަށް 1.2 ބިލިއަން ރުފިޔާ ހޭދަކުރުމަށް ސަރުކާރުން ވަނީ ނިންމައިފަ އެވެ. އެގޮތުން ނުވަ ރަށެއްގެ ބިން ބޮޑު ކުރުމުގެ މަސައްކަތް ކުރުމަށް ސަރުކާރުން ވަނީ ނިންމައިފަ އެވެ. އަދި އަންނަ އަހަރުގެ ބަޖެޓުން ބިން ހިއްކުމުގެ 19 މަޝްރޫއުއެއް ކުރިއަށް ގެންދިއުމަށް ސަރުކާރުން ވަނީ ނިންމާފަ އެވެ.
އަންނަ އަހަރަށް ލަފާކޮށް ރައްޔިތުންގެ މަޖިލީހަށް ހުށައަޅާފައިވާ 27.457 ބިލިއަން ރުފިޔާގެ ބަޖެޓުގެ ރިކަރަންޓު ހަރަދަކީ ބަޖެޓުގެ 59 ޕަސެންޓެވެ.
ފިނޭންސް މިނިސްޓަރު ޖިހާދު ވިދާޅުވީ ބަޖެޓުގެ 41 ޕަސެންޓް ކަނޑައަޅާފައި ވަނީ ކެޕިޓަލް ހަރަދަށް ކަމަށްވާ އިރު އޭގެ 80 ޕަސެންޓް ހަރަދުކުރެ ވެނީ ޕަބްލިކް ސެކްޓާ އިންވެސްޓްމަންޓް ޕްރޮގުރާމް (ޕީއެސްއައިޕީ) ޕްރޮޖެކްޓްތަކަށް ކަމަށެވެ.