އަންނަ އަހަރަށް ލަފާކޮށް ސަރުކާރުން ރައްޔިތުންގެ މަޖިލީހަށް ހުށަހަޅާފައިވާ 27.457 ބިލިއަން ރުފިޔާގެ ބަޖެޓުގައި އޮތީ ހަމައެކަނި ހިސާބު އަދަދުތަކެއް ކަމަށް އިދިކޮޅު އެމްޑީޕީން ބުނެފި އެވެ.
އެމްޑީޕީގެ އޮފީހުގައި މިއަދު ހަވީރު އޮތް ނޫސްވެރިންގެ ބައްދަލުވުމެއްގައި އެޕާޓީގެ ތައުލީމީ ކޮމެޓީގެ ފަރާތުން ވާހަކަފުޅުދައްކަވަމުން، ކުރީގެ އެޑިއުކޭޝަން މިނިސްޓަރު މުސްތަފާ ލުތުފީ ވިދާޅުވީ ތައުލީމީ ދާއިރާ އަކީ ވަރަށް ބޮޑަށް ޕްރޮގުރާމިން ކޮށްގެން ކުރިއަށް ގެންދާ ދާއިރާއެއް ކަމަށާއި އެހެންނަމަވެސް އެކަން އަންނަ އަހަރުގެ ބަޖެޓުން ފެންނަން ނެތް ކަމަށެވެ.
ސަރުކާރުން ތައުލީމީ ދާއިރާއަށް ގިނަ ވައުދުތަކެއް ވެފައިވާއިރު އެއިން ކޮންމެ ކަމަކީ ޕްރޮގުރާމެއްގެ ގޮތަށް ކުރިއަށް ގެންދަން ޖެހޭ އެއްޗެއް ކަމަށް އޭނާ ވިދާޅުވި އެވެ.
"އެހެންވީމަ އަޅުގަނޑުމެން ބަލާލާއިރު އަންނަ އަހަރުގެ ބަޖެޓަކުންނެއް ބަޖެޓުގެ ޕުރޮގުރާމިންއެއް ނުވަތަ އެބޭފުޅުންގެ {މި ސަރުކާރު} ވައުދުތަކެއް ފެެންނާކަށް ނެތް. އެހެންވީމަ ސާފު ނުވާ އަދަދުތަކެއް ހުރި ބަޖެޓެއް އަންނަ އަހަރުގެ ބަޖެޓަކީ،" މުސްތަފާ ވިދާޅުވި އެވެ.
ނޫސްވެރިންނަށް މައުލޫމާތު ދެއްވަމުން ކުރީގެ އެޑިއުކޭޝަން މިނިސްޓަރު އަދި މާލެ ސިޓީގެ ޑެޕިއުޓީ މޭޔަރު ޝިފާ މުހައްމަދު ވިދާޅުވީ އެޑިއުކޭޝަން މިނިސްޓުރީގައި 18 ސިޔާސީ މަގާމު ހުރި އިރު ތައުލީމީ ދާއިރާ ޕްރޮފެޝަނަލްކޮށް ހިނގެންޖެހޭނެ ކަމަށެވެ.
ޝިފާ ވިދާޅުވީ މި ސަރުކާރުގެ ތައުލީމީ ސިޔާސަތާ މެދު ބެލެނިވެރިން ވަރަށް ކަންބޮޑުވާ ކަމަށެވެ.
"އަށާރަ ސިޔާސީ މަގާމުގައި ބޭފުޅުން ތިއްބަވައިގެން މިނިސްޓްރީ އޮފް އެޑިއުކޭޝަންގެ މަސައްކަތްތައް ތަރުތީބުން ރޭވިގެން ކުރިއާލާ ދުރާލާ މައިންބަފައިންނަށް އެނގިގެން ކަންކަން ދާންޖެހޭއިރު އެއްގޮތަކަށް ވެސް ރޭވިގެން ކަންތައްތައް ދާތަނެއް އަޅުގަނޑުމެންނަކަށް ނުފެނޭ. އަޅުގަނޑުމެންނަށް މި ފެންނަނީ އަނެއްކާ ވެސް ސިޔާސީ މަގާމުތައް އެޑިއުކޭޝަން މިނިސްޓްރީއަށް ލުމަށް މަސައްކަތް ކުރާތަން،" ޝިފާ ވިދާޅުވި އެވެ.
ތައުލީމީ ދާއިރާގައި މަސައްކަތް ކުރާ މުދައްރިސުންނަށް މުސާރައިގެ ކުރިއެރުމެއް ދިނުމަށް ސަރުކާރުން ނިންމާފައިވާއިރު އަދިވެސް 1200 ވަރަކަށް މުދައްރިސުންނަށް މުސާރައިގެ ކުރިއެރުމެއް ލިބިފައިނުވާ ކަމަށް ވެސް ޝިފާ ވިދާޅުވިއެވެ.
އޭނާ ވިދާޅުވީ އަންނަ އަހަރުގެ ބަޖެޓުގައި ޓީޗަރުންގެ މުސާރައަށް ވެސް ބަދަލުތަކެއް އަންނާނެކަން ފާހަގަކުރެވިފައިނުވާ ކަމަށެވެ.