މިދިޔަ ބުރާސްފަތި ދުވަހު މިނާގައި ފިތިބާރުވެގެން ގިނައަދެދެއްގެ ހައްޖުވެރިން މަރުވީ އީރާނު ހައްޖުވެރިންގެ އަމަލުތައް ހުރިގޮތުން ކަމަށް އީރާނު ހައްޖު މިޝަނުގެ އޮފިޝަލުން ބުނެފި އެވެ.
މިނާގައި މަރުވި ހައްޖުވެރިންގެ އަދަދު 769 އަކަށް އަދި ޒަހަމްވި މީހުންގެ އަދަދު 934 އަރާފައިވާ ކަމަށް ސައުދި އަރަބިއާގެ ހެލްތް މިނިސްޓްރީން ވަނީ ހާމަކޮށްފަ އެވެ.
އިރާނު ހައްޖު މިޝަނުގެ އޮފިޝަލަކާ ހަވާލާދީ އަލް އައުސަތު ނޫހުގައި ބުނެފައި ވަނީ މިނާގައި ހައްޖުވެރިން ފިތި ބާރުވެގެން ގިނަ އަދަދެއްގެ ހައްޖުވެރިން މަރުވި ހާދިސާ ހިނގާފައި ވަނީ އީރާނުގެ 300 ހައްޖުވެރިންނަށް ޖަމްރާއަށް ހިލަ އުކަން ދާން ދިން އިރުޝާދަށް ބޯނުލެބުމުގެ ސަބަބުން ކަމަށެވެ. ހިލައުކަން ނިކުތުމުގެ ކުރިން ތައްޔާރުވާން މަޑުކުރުމަށް އިރުޝާދު ދިން ނަމަވެސް އެމީހުން މަޑުނުކޮށް ދިޔައީކަމަށް އެ އޮފިޝަލް ވިދާޅުވި އެވެ.
އީރާނުގެ ހައްޖު މިޝަނުގެ އޮފިޝަލް ވިދާޅުވީ އެ ހައްޖު މިޝަނުގެ ހައްޖުވެރިން ޖަމްރާއަށް ހިލައުކަން ދާން ހަމަޖެހިފަ އޮތީ އެހާދިސާ ހިނގިފަހުން ކަމަށާއި ނަމަވެސް އަސްލު ޝެޑިއުލާ އެއްގޮތަށް ދިޔަ ހައްޖުވެރިން ދާން ދިޔަ އިރު ޝެޑިއުލްއާ ޚިލާފަށް ދިޔަ ހައްޖުވެރިން ތިބީ އެނބުރި އަންނަ މަގުމަތީގައި ކަމަށެވެ.
އީރާނު ހައްޖު މިޝަނުން އެހެން ބުނެފައިވާއިރު އިރާނު ހައްޖުވެރިންގެ ސަަބަބުން އެހާދިސާ ހިނގަން މެދުވެރިވީ ގޮތެއް ކިޔައިދީފައެއް ނުވެ އެވެ.
އީރާނު ހައްޖު މިޝަނުން އެހެން ބުނެފައިވާއިރު އިރާނު ސަރުކާރުން ވަނީ އެހާދިސާއާ ގުޅިގެން ސައުދީ ސަރުކާރަށް ވަރަށްބޮޑަށް ފާޑު ވިދާޅުވެފަ އެވެ. އަދި އެހާދިސާ ހިނގާފައި ވަނީ ސައުދި ސަރުކާރުން ރަގަޅު އިންތިޒާމުތަކެއް ހަމަޖައްސާފައި ނުވާތީކަމަށްވެސް އީރާނުންވަނީ ބުނެފަ އެވެ.
ސައުދީގެ އިންޓީރިއާ މިނިސްޓަރު ވިދާޅުވީ އެހާދިސާ ހިނގަން މެދުވެރިވީ ހޫނުގަދަވުމާއި ހައްޖުވެރިން ވަރުބަލިވުމުގެ ސަބަބުންކަމަށް ގަބޫލުކުރެވޭ ކަމަށެވެ. ނަމަވެސް ވަކި އެއްޗެއް ދަންނަވަން އެނގޭނީ ތަހުގީގަށް ފަހުކަމަށް އޭނާ ވިދާޅުވި އެވެ.
އެމައްސަލަ ތަހުގީގުކުރުމަށް ސައުދީ ރަސްގެފާނު ވަނީ ޚާއްސަ ކޮމިޓީއެއް އެކުލަވާލާފަ އެވެ.
މިނާގައި ހިނގި އެހާދިސާގައި ޙާދިސާގައި އީރާނުގެ 40 އަށްވުރެ ގިނަ ޙާޖީން މަރުވިކަމަށް މީޑިޔާ ރިޕޯޓްތައް ބުނެއެވެ. މިނާގެ ހާދިސާ ހިނގީ ޖަމްރާތަކަށް ހިލަ އުކުމަށް ދާންއޮތް މަގުތަކުގެ ތެރެއިން މަގެއް ވަގުތީގޮތުން ބަންދުކުރުމާއެކު ހައްޖުވެރިންނަށް ވާނުވާނޭނގި އެރި އޮޅުމަކުން ކަމަށްވެސް ބައެއް ރިޕޯޓްތައް ބުނެއެވެ.