މިމަހުގެ ފުރަތަމަ ހަފްތާގެ ތެރޭގައި އޮޅުވާލައިގެން ރީލޯޑާއި ރާސްޓަސް ކުރާ 25 މައްސަލަ ހުށައެޅުނު އިރު އޭގެ ތެރޭގައި ބޮޑެތި ފައިސާގެ އަދަދުތަކުން ރީލޯޑާއި ރާސްޓަސް ހޯދާފައިވާ ކަމަށް ފުލުހުން ބުނެފި އެވެ.
ފުލުހުން މިއަދު ބުނީ ފާއިތުވި ހަތް ދުވަހު ހުށަހެޅުނު އެފަދަ މައްސަލަތަކުގެ ތެރޭގައި 40000 ރުފިޔާ އާއި 25000 ރުފިޔާ އާއި 20000 ރުފިޔާ ރީލޯޑްކޮށްދީ ރާސްޓަސް އަޅައިދިނުމުގެ ފައިސާގެ މުއާމަލާތާ ގުޅޭ މައްސަލަތައް ހިމެނޭ ކަމަށެވެ.
"މިފަދަ މައްސަލަތަކުގެ ތެރޭގައި އާއްމު ގޮތެއްގައި 2000 ރުފިޔާ، 5000 ރުފިޔާ ފަދަ ޢަދަދުތަކުން ރީލޯޑްކޮށް ދިނުމާ ރާސްޓަސް ފޮނުވައިދިނުން ފަދަ މައްސަލަތައް ހުރިކަން ޖެނެރަލް އިންވެސްޓިގޭޝަންސް ޑިޕާޓްމަންޓުން ހާމަކުރޭ." ފުލުހުން ބުންޏެވެ.
ފުލުހުން ވަނީ އެފަދަ މުއާމަލާތްތައް ނުކުރުމަށް އިލްތިމާސްކޮށްފަ އެވެ. އެފަދަ މައްސަލަތައް ހުށަހެޅުން ދަނީ ދުވަހުން ދުވަހަށް އިތުރު ވަމުންކަމަށާއި އެކަން ހުއްޓުވޭނީ މިހާރަށް ވުރެ ރައްޔިތުން މިކަމަށް ހޭލުންތެރިވެގެން ކަމަށް ފުލުހުން ބުނެ އެވެ.
"ހާއްސަ ގޮތެއްގައި ކާކު ކަންނޭނގޭ އަދި ނުދަންނަ ނަމްބަރަކުން ގުޅައި ކިތަންމެ އަގުހުރި އިނާމުތަކަކާއި ހަދިޔާތައް ހުށަހަޅައި، ނަސީބު ގަދަކަމުގެ ވާހަކަ މޮޅަށް ހަދައިގެން ދެއްކިޔަސް އެފަދަ ވާހަކަތަކުގެ ހަގީގަތް ނުބަލައި އަދި އެފަދަ ކޯލްތަކުގެ ޔަގީންކަން ކަށަވަރު ނުކޮށް ބޮޑެތި އަދަދުތަކުން ފައިސާ ޖަމާކޮށްދީ ރީލޯޑް ކޮށްދީ ފައިސާ ޓްރާންސްފާ ކުރުން ހުއްޓާލަން ޖެހޭ." ފުލުހުން ބުންޏެވެ.
ރާއްޖޭގައި މިހާތަނަށް ހިންގާ އަދި ހިންގަމުންދާ އާއްމު ޕްރޮމޯޝަންތަކަކީ މުދާ ގަނެގެން ނުވަތަ ކޮންމެވެސް މަސައްކަތްތަކެއް ކޮށްގެން ޕްރޮމޯޝަނެއްގައި ބައިވެރިވެގެން ގުރުއަތަކުން ހޮވޭފަރާތަކަށް އިނާމުތަކެއް ލިބޭ ގޮތަށް ހިންގޭ ޕްރޮމޯޝަންތަކެކެވެ. އެއްވެސް ޙާލަތެއްގައި ފޯނުކޮށްގެން ވަކި އަދަދުތަކަކުން ފޯނުން ގުޅާ ފަރާތުން ކަނޑައަޅާ އުސޫލަކުން ފައިސާ ދޫކުރާ ޕްރޮމޯޝަންތަކެއް ނޫނެވެ.
ނަމަވެސް ރާއްޖޭގައި މިހާރަކަށް އައިސް އޮޅުވާލައިގެން ފައިސާ ހޯދާ މައްސަލަތަކުގައި މަޝްހޫރު ވިޔަފާރިތަކުން ހިންގާ ޕްރޮމޯޝަންތަކުގެ ނަން ބޭނުންކޮށްގެން ނުދަންނަ ނަމްބަރުތަކުން އާއްމު ރައްޔިތުންނަށް ގުޅައި އެކި ކަހަލަ ވާހަކަތައް ދައްކައި ބޮޑެތި އަދަދުތަކުން މަކަރާއި ހީލަތުން ފައިސާ އަތުލުމުގެ މައްސަލަތައް އަންނަނީ އިތުރުވަމުންނެވެ.