ގައުމީ ޓީމާ ގުޅުވައިގެން މި ދައްކާ ވާހަކަތަކަކީ ކޮން ވާހަކަތަކެއްތޯ އެވެ؟ ޓީމުގެ ކޯޗު މަގާމުން ދުރަށް ދިޔަ ހިސާބުން، ފެންމަތި ވެގެން މި އުޅޭ ވާހަކަތަކުގެ އަސްލަކީ ކޮބައި ހެއްޔެވެ؟ މި ސުވާލުތަކުގެ ޖަވާބު ސަޕޯޓަރުން ބޭނުންވެ އެވެ. ގައުމީ ޓީމާ ގުޅުވައިގެން ވާހަކަތަކެއް ފެންމަތިވި ހިސާބުން ޓީމުގެ ކެޕްޓަން ޢަލީ އަޝްފާޤް (ދަގަނޑޭ) އާއި ގައުމީ އެއް ނަމްބަރު ކީޕަރު ޢިމްރާން މުޙައްމަދު، ޓީމުގެ ދިފާއުގައި ތެދުވެއްޖެ އެވެ. ގައުމީ ޓީމުގެ އެއްބައިވަންތަކަން އޮތް މިންވަރު އެ ދެ ކުޅުންތެރިން ދަނީ ސާބިތުކޮށްދެމުންނެވެ. ކުޅުންތެރިންގެ މެދުގައި ދެބަސްވުމެއް، ހިލާފެއް ނެތް ކަން ދަނީ ހަމާކޮށްދެމެންނެވެ.
ދަގަނޑޭއާއި އިމްރާން ބުނަނީ ހަމަ ރަނގަޅަށް!
ދަގަނޑޭ އާއި ޢިމްރާން އަދާ ކުރަމުން އެ ދަނީ ގައުމީ ޒިންމާ އެވެ. ސަޕޯޓަރުން ކަރު އެލޭނެ އެއްވެސް ވާހަކައެއް ދެއްކުމަށް އެ ކުޅުންތެރިން ފުރުސަތު ދީގެން ނުވާނެ އެވެ. ޓީމު ބައިބައިވިޔަ ނުދިނުމަށް އެކުޅުންތެރިން މިއަދު ކޮންމެ ގުރުބާނީއެއް ވެސް ވާންޖެހޭނެ އެވެ. އެއީ ގައުމީ ޓީމުގައި ތިބި އެންމެ މުހިއްމު ދެ ތަނބަށް ވާތީ އެވެ.
ދިވެހި ތާރިހު މިހާތަނަށް ދުށް އެންމެ މޮޅު ކުޅުންތެރިޔާ ދަގަނޑޭއާއި ރާއްޖޭގެ އެއް ނަންބަރު ގޯލް ކީޕަރު އިމްރާންގެ މޮޅުކަމުގެ ވާހަކަ ދައްކައި ކޮޅުން ނުލާނެ އެވެ. ދިވެހި ސަޕޯޓަރުން އެކަން ދަންނާނެ އެވެ.
ނަމަވެސް ވެލިޒާ ޕޮޕޯފް މަގާމުން ދުރަށް ދިޔަ ހިސާބުން، އޭނާގެ ދިފާއުގައި އެ ދެ ކުޅުންތެރިން ތެދުވީ ދިވެހި ފުޓްބޯޅައިގެ މަސްލަހަތަށްޓަކަ އެވެ. އެއީ ކުރަން ޖެހޭ ކަމެކެވެ. އެ ކަމުގެ ތައުރީފާއި ސާބަސް އަބަދުވެސް ދަގަނޑޭ އާއި އިމްރާނަށް އޮހޭނެ އެވެ. މިހާލަތުގައި ވެސް އެ ދެ ކުޅުންތެރިން ނުދައްކާ އޮތް ވާހަކައެއް ދިވެހި ފުޓްބޯޅައިގެ މައި އިދާރާ އެފްއޭއެމުން ވަނީ އާންމުކޮށްފަ އެވެ. މީޑިއާގެ ހާޒިރުގައި އެފްއޭއެމްގެ ނޯމަލައިޒޭޝަން ކޮމެޓީގެ ޗެއާމަން މުހައްމަދު ޝަވީދު ވިދާޅުވީ، ޕޮޕޯފަށް މަގާމު ގެއްލުނީ އޭނާގެ އަހުލާގު ހުރި ގޮތުން ކަމަށެވެ. އެ އަހްލާގު ޕްޕޯފްގެ ކިބައިގައި ނެތުމުން ގައުމީ ޓީމު އަމާޒަށް ވާސިލްވުމަށް ހުރަސް އެޅޭނެ ކަމަށް ޝަވީދު އިޝާރާތް ކުރެއްވި އެވެ.
މި ވާހަކަ ދަގަނޑޭ އާއި އިމްރާން ނުދައްކަ އެވެ. އެ ސަބަބު އެނގޭނީ އެ ދެ ކުޅުންތެރިންނަށެވެ.
ސަންއާ ވަހަކަ ދެއްކި ބައެއް ކުޅުންތެރިން ބުނީ ކޯޗް ވަކިކުރުމަށް އެފްއޭއެމުން ނެގި ޑެސިޝަނަކީ ރަނގަޅު ޑިސިޝަނެއް ކަމަށެވެ. އެ ވާހަކަތައް ކުރިން ވެސް ވާނީ ގެނެސްދީފަ އެވެ.
ޕޮޕޯފުގެ ގާބިލްކަމާމެދު ސުވާލެއް ނެތް
ޕޮޕޯފުގެ ގާބިލް ކަމާމެދު ޝައްކެއް ނެތެވެ. އޭނާއަކީ މޮޅު ހުނަރުވެރި ކޯޗެކެވެ. އެއްވެސް މެޗަކުން ބަލިނުވެ ދިވެހި ފުޓްބޯޅައިގެ ގަދަ ބާރު ނިއުރޭޑިއަންޓަށް ސީޒަންގެ ހުރިހާ މުބާރާތެއް ކާމިޔާބު ކޮށްދިމުގެ މޭސްތިރިއަކީ ޕޮޕޯފެވެ.
ނަމަވެސް ކްލަބެއްގެ ކޯޗުކަން ކުރުމާއި ގައުމީ ޓީމެއްގެ ކޯޗުކަން ކުރުމަކީ ތަފާތު ދެކަމެވެ. ގައުމީ ޓީމުގެ ކޯޗުކަމާ އޭނާ ހަވާލުވި އިރު، މީގެ ކުރިން އެއްވެސް ގައުމެއްގެ ގައުމީ ކޯޗުކަން އޭނާކޮށްފައެއް ނުވެ އެވެ. އެ ތަޖުރިބާއަކީ އޭނާއަށް އާ ތަޖްރިބާއެކެވެ. ގައުމީ ޓީމާ އޭނާ ހަވާލުވުމުން ދިވެހި ސަޕޯޓަރުން ތިބީ އުފާވެފަ އެވެ. އެއީ ދެ ވަނަ ފަހަރަށް ދިވެހި ފުޓްބޯޅައިގެ ރީތި ތާރީހެއް އޭނާ ލިޔާނެ ކަމުގެ އުންމީދުގަ އެވެ. ނަމަވެސް ހާލަތު ނިޔާ ކުރީ ދިމާ އިދިކޮޅަށެވެ. ހަ މަސް ފަހުން ޖެހުނީ ކޯޗުކަމުން އިސްތިއުފާ ދޭށެވެ.
އަހްލާގެއް ނެތި، އަމާޒަށް ވާސިލް ނުވެވޭނެ
ޕޮޕޯފްގެ އަހްލާގީ މައްސަލަތައް ވަރަށް ބޮޑެވެ. އޭނާ ދީނަށް ފުރައްސާރަ ކުރިއޭ ނުބުނާނަމެވެ. ނަމަވެސް ވައިބާގައި ހަދާފައިވާ 'ގުރޫޕް ގައުމީ ޓީމް' ގައި އޭނާ ކުޅުންތެރިންނާ ދައްކާފައިވާ ވާހަކަތަކާއި ޕޯސްޓްކޮށްފައިވާ ފޮޓޯތަކުން "ސަޕޯޓަރުންގެ ލޯތައް މުދުނަށް" އަރާނެ އެވެ. އެ ވާހަކަތައް ތިލަކޮށްލާނަމެވެ.
އެ ގުރޫޕްގައި އަންހެން ކުއްޖެއްގެ ވާހަކަ ދެކެވުނު ދުވަހަކު ކުޅުންތެރިޔަކު އިނގިރޭސި ބަހުން ބުނެލި އެވެ.
"އެ އަންހެން ކުއްޖާއަކީ އަހަރެންގެ ރައްޓެއްސެއް"
އެ ކުއްޖާއަކީ ދަގަނޑޭގެ ފޭނެއް ކަމަށް ވެސް އެ ކުޅުންތެރިޔާ ވައިބާގައި ބުނެފައިވެ އެވެ.
ރައްދުގައި ޕޮޕޯފް ބުނެލި އެވެ.
"ޖިންސީ އެދުން ފުއްދުމެއް ނެތި އަންހެނަކާ ފިރިހެނެއްގެ ރައްޓެހި ކަމެއް ދެމި ނޯންނާނެ"
ކޯޗްގެ މަސްއޫލިއްޔަތަކީ މިއީއެއް ނޫނެވެ. ދީނާ ފުށުއަރާ މެސެޖުތަކުން ކުޅުންތެރިންނަށް ވަސްވާސް ދީގެން ނުވާނެ އެވެ. މިއީ އިސްލާމީ ގައުމެއްގެ ގައުމީ ޓީމާ ހަވާލުވެ ހުރި ކޯޗެއްގެ ބަސްމަގު ހުންނަންވީ ގޮތެއް ވެސް ނޫނެވެ. ކުޅުންތެރިންނާ މިގޮތަށް މުއާމަލާތް ކުރެވޭނެތޯ އެވެ.
އަދިވެސް އެ ގުރޫޕްގައި ދެއްކި އެހެން ވާހަކައެއް ހިއްސާ ކޮށްލާނަމެވެ.
އިންޑިއަން އޯޝަން އައިލެންޑް ގޭމްސްތެރޭގަ އެވެ. މުބާރާތް ކާމިޔާބު ކުރެވިއްޖެ ނަމަ ޗޭންޖިން ރޫމް އޮންނާނެ ގޮތް ފޮޓޯއަކުން ކޯޗް ސިފަކޮށްދިނެވެ. ޕޮޕޯފް ޕޯސްޓްކުރި ފޮޓޯ އޭގެ އަސްލާ އެއްގޮތަށް ކިޔުންތެރީންނާ ހަމައަށް ނުގެނެވޭނެ އެވެ. ނަމަވެސް އެ ފޮޓޯގެ ސިފަކުރުން ތިލަކުރެވޭ އެންމެ ބޮޑަކަށް ތިލަ ކޮށްލާނަމެވެ. ފޮޓޯއިން ފެންނަނީ މީހަކު ބަނގުރާ ފުޅިއެއް ބޯ ތަނެވެ. ކައިރީގައި ވެސް ބަނގުރާ ފުޅިތައް ހުއްޓެވެ.
އަދި ބަރަހަނާ ހާލުގައި ތިބި ދެ އަންހެނަކު، ބަނގުރާ ބޯ މީހާއަށް ފުރަގަސްދީގެން ހުއްޓައި ފޮޓޯއިން ފެނެ އެވެ.
މިއީ ކުޅުންތެރިންނަށް ކުޅިވަރު ހުނަރު އިތުރުކޮށް އިރުޝާދު ދޭން ހުރި މުދައްރިސްގެ ފިލާވަޅު ހުންނަންވީ ގޮތްތޯ އެވެ؟ ސަމާސާގެ މިސާލަކަށް ވެސް އުފާ ފާޅު ކުރުމުގައި މި ދަރަޖައަށް ދާން ޖެހޭ ވަރުގެ ފޮޓޯއެއް ކޯޗަކު ޕޯސްޓުކޮށްގެން ނުވާނެ އެވެ. ސަބަބަކީ ކޯޗު ނުކުރާ އިހުތިރާމެއް ކުޅުންތެރިން ވެސް އޭނާއަށްނުކޮށްފާނެތީ އެވެ.
ކުޅުންތެރިޔަކާ ދިމާލަށް ބަދު ބަސްބުނެ ޕޮޕޯފް ދެއްކި ވާހަކައެއް ވެސް ހިއްސާކޮށްލާނަމަވެ. ވެލެންސިއާއަށް ކުޅެމުންދާ އަކްރަމް ޢަބްދުލް ޣަނީއަށް ހިތްވަރުދީ ކުޅުންތެރިޔަކު ގްރޫޕުގައި ވާހަކަ ދެއްކި އެވެ. އަކްރަމް އިތުރު ހިތްވަރެއް ލައި އޭނާގެ ފޭވަރިޓް ޓީމް، ވެލެންސިއާއަށް ކާމިޔާބަށް އެދޭ ކަމަށް އެ ކުޅުންތެރިޔާ ބުނެލުމުން ކޯޗް ބުނީ މިހެންނެވެ.
"އަކޫއާ އެކު ވެލެންސިއާ ފަހަރެއްގައި ދެ ވަނަ ޑިވިޝަނަނަށް ރެލިގޭޓް ވެދާނެ"
ކޯޗް އެމަސައްކަތް ކުރަނީ ކުޅުންތެރިންގެ އުންމީދު މަރާލުމަށް ކަމަށް ބެލެވިދާނެ އެވެ. މިއީ ގައުމީ ޓީމެއްގެ ކޯޗް އެ ގައުމެއްގެ އެންމެ ބޮޑު ލީގުގައި ވާދަކުރާ ޓީމަށް ނިސްބަތްކޮށް ބުނި ދެރަ ބަހެކެވެ. މިއިން ވެސް އޭނާގެ ޕްރޮފެޝަނަލް މަސައްކަތާ މެދު ސުވާލު އުފެދެ އެވެ.
ކޯޗަކީ ކުޅުންތެރިންނާ ވަރަށް ގާތް ގުޅުމެއް ބާއްވަން ޖެހޭ މީހެކެވެ. އެ ގާތްކަން ޕޮޕޯފް ވަނީ ކުޅުންތެރިންނާ އެކު ބާއްވާފަ އެވެ. ނަމަވެސް އެކަމުގައި ހައްދެއް، އިމެއް އޮންނަން ޖެހެ އެވެ. ކުޅުންތެރިންގެ ހުނަރުގެ ގާބިލްކަން އިތުރުކޮށް، އަހުލާގީ ސިފަތަކުން ކުޅުންތެރިން ޒީނަތްތެރި ކުރަން ހުރި ކޯޗުގެ އަހުލާގު ނެތިއްޖެ ނަމަ މާދަމާ ކުޅެން ނުކުންނަ މެޗުން ނަތީޖާ ނުކުންނާނެ ގޮތް ވިސްނައިލާށެވެ. ދަނޑަށް ނުކުންނައިރު ކުޅުންތެރިން، މެޗަށް ދޭން ޖެހޭ ޝައުގުވެރިކަމާއި ސީރިއަސް ކަމެއް ނުބަހައްޓާފާނެތީ އެވެ. ސަމާސާ ހައްދު ފަހަނައެޅުމުން، ކޯޗު ސީރިއަސްވެފައި ކޮންމެ އެއްޗެއް ބުންޏަށް އެކަމަށް ސީރިއަސްކަމެއް ކުޅުންތެރިން ނުދީފާނެތީ އެވެ.
މީޑީއާއަކީ ތައުރީފް ކުރުމާއި ފާޑު ކިޔުމާއި ހިތްވަރު ދިނުން އެކުލެވޭ ޕްލެޓްފޯމެކެވެ. ދިވެހި ފުޓްބޯޅަ ކާމިޔަބީއާ ހަމަޔަށް ވާސިލްވާ ކޮންމެ ފަހަރަކު އޭގެ ފަހަތުގައި ދިވެހި މީޑީއާ ވާނެ އެވެ. ނާކާމިޔާބާ ކުރިމަތިވާ ފަހަރުތަކުގައި ހިތްވަރު ދިނުމަށް ވެސް ދިވެހި މީީޑިއާ ފަހަތުގައި އޮންނާނެ އެވެ. އެއާ އެކު ގޯސްކޮށް ކަން ހިނގާ ނަމަ ފާޑުކިޔަން ވެސް ތިބޭނީ ހަމަ މީޑިއާ އެވެ. އެއީ ދިވެހި ފުޓްބޯޅައިގެ ކުރިއެރުމަށް ދިވެހި މިީޑިއާ އިން އެދޭތީ އެވެ. "ގޭމުގެ ބިއުޓީ"އަކީ އެއީ އެވެ.
