ބ. މާޅޮހު ކައުންސިލުން ރޯދަ ހަދިޔާގެ ގޮތުގައި އެރަށުގެ ކޮންމެ ގެއަކަށް ބިސް ޓްރޭއެއް ބަހައިފި އެވެ.
އާބާދީގައި 680 މީހުން ދިރިއުޅޭ އެރަށުގައި 94 ގެ ހުންނައިރު ކޮންމެ ގެއަކަށް 30 ބިހުގެ ރޭޓުން ބިސް ޓްރޭއެއް ބަހާފައިވާ ކަމަށް އެރަށު ކައުންސިލްގެ ރައީސް އަބްދުﷲ ސުޖާއު މިއަދު ސަން އަށް ވިދާޅުވި އެވެ.
"މިއީ މިހާރު އޮތް ކައުންސިލުން ކޮންމެ އަހަރެއްގެ ރަމަޟާން މަހާއި ދިމާކޮށް ހަދިޔާއެއް ދިނުމުގެ ގޮތުން ކުރިއަށްގެންދާކަމެއް. މިއަހަރު އަޅުގަނޑުމެން މިބެހީ ކޮންމެ ގެއަކަށް 30 ބިހުގެ މަގުން ބިސްޓްރޭއެއް،" ސުޖާއު ވިދާޅުވި އެވެ.
މިދިޔަ އަހަރު ވަނީ ކޮންމެ ގެއަކަށް 15 އޮރެންޖް ބަހައިފައެވެ. އެތަކެތި ބަހަނީ އެރަށު ކައުންސިލަރުންގެ އަމިއްލަ ހަރަދުގައެވެ.
ބައެއް ކައުންސިލްތަކުުން ދަނީ ރޯދަ މަހު އެރަށްރަށުގެ ރައްޔިތުންނަށް ތަފާތު އެހީތައް ފޯރުކޮށްދެމުންވެ. އެގޮތުން މި ރޯދަމަހު އއ. ބޮޑުފުޅަދޫ ކޮންމެ ގެއެއްގެ ކަރަންޓު ބިލްގެ ދެބައިކުޅަ އެއްބައި އެރަށު ކައުންސިލުން ދައްކައިދޭން ވަނީ ނިންމައިފައެވެ.
ކައުންސިލަރުން ރައްޔިތުންނަށް ރޯދަ ހަދިޔާ ދޭއިރު މަޖިލިސް މެމްބަރުންވެސް ދަނީ އެ ދާއިރާގެ ރައްޔިތުންނަށް ރޯދަ ހަދިޔާގެ ގޮތުގައި ތަފާތު ތަކެތި ބަހަމުންނެވެ.