ރޯދަމަހާ ދިމާކޮށް ދާއިރާގެ ރައްޔިތުންނަށް އެހީވުމަށް ތިމަރަފުށީ ދާއިރާގެ މަޖިލިސް މެންބަރު މުހައްމަދު މުސްތަފާ އެ ދާއިރާގެ ކޮންމެ ގެއަކަށް ކާޑުގެ ބާވަތްތައް ހަދިޔާކޮށްފި އެވެ.
ތިމަރަފުށީ ދާއިރާގައި އެރަށާއި ވޭމަންޑޫއާއި ދެރަށް އޮންނައިރު މުސްތަފާ ވަނީ މިދިޔަ އަހަރުވެސް އެދާއިރާގެ ކޮންމެ ގެއަކަށް ކާޑުގެ ބާވަތްތައް ހަދިޔާކޮށްފައެވެ.
ސަން އަށް މައުލޫމާތު ދެއްވަމުން މުސްތަފާ މިއަދު ވިދާޅުވީ، އެ ދާއިރާގައި ގައި ގާތްގަނޑަކަށް 700 ވަރަކަށް ގެ ހުންނަ، އެ ދާއިރާގެ ގޭތަކަށް ކާޑުގެ ބާވަތްތައް ބެހުމަށް ފޮނުވާފައިވާ ކަމަށާއި ކުރިއަށްއޮތް ދެދުވަހުގެ ތެރޭގައި ހުރިހާ ގެއަކަށް ކާޑު ބަހައި ނިންމާލެވޭނެ ކަމަށެވެ.
ތިމަރަފުށީ ކޮންމެ ގެއަކަށް 50 ކިލޯގެ ހަނޑޫ ބަސްތާއަކާއި ހަކުރު ބަސްތާއެއް ފޮނުވާފައިވާއިރު ވޭމަންޑޫއަށް ހަނޑުލާއި ހަކުރު އަދި ފުށް ބަސްތާއެއް ކޮންމެ ގެއަކަށް ބެހުމަށް ފޮނުވާފައިވާނެ ކަމަށް މުސްތަފާ ވިދާޅުވިއެވެ.
ތ. އަތޮޅުގެ އެހެން ދާއިރާއެއްކަމަށްވާ ކިނބިދޫ ދާއިރާގެ މެމްބަރު އަބްދުއްﷲ ރިޔާޒު ވެސް ވަނީ ރޯދަމަހާ ދިމާކޮށް ރައްޔިތުންނަށް އެހީއެއް ފޯރުކޮށްދިނުމުގެ ގޮތުން ތ. އަތަޮޅު ކޮންމެ ރަށަކަށް ހަތިމާއި އޭނާގެ ދާއިރާގެ ކޮންމެ ގެއަކަށް ފަސް ކިލޯ ބާސްމަތީ ހަނޑޫ ބަސްތާއެއް ބަހާފައެވެ.