މިއަހަރު ނިމުމުގެ ކުރިން ސަރުކާރުން އާއްމުންނަށް ބޮންޑު ވިއްކަން ނިންމާފާވާކަމަށް ފިނޭންސް މިނިސްޓްރީގެ ސްޓޭޓް މިނިސްޓަރު އަހުމަދު މުނައްވަރު ވިދާޅުވެއްޖެއެވެ.
ޕެންޝަން އޮފީހުން އިންތިޒާމްކޮށްގެން މިދިޔަ ބުދަ ދުވަހު ކުރުނބާ މޯލްޑިވްސް ރިސޯޓްގައި ބޭއްވި ފައިނޭންސް ފޯރަމްގައި ވާހަކަ ދައްކަވަމުން މުނައްވަރު ވިދާޅުވީ ބޮންޑު މާކެޓަށް ތަރައްގީ ކުުރުމަކީ ސަރުކާރުން އިސްކަންދޭ ކަމެއް ކަަމަށެވެ.
ބޮންޑަކީ ލޯނުގެ އުސޫލުން ދޭ ފައިސާއެކެވެ. މި ފައިސާ އަނބުރާ ދައްކަންޖެހޭނީ އިންޓަރެސްޓަކާއި އެކީގައެވެ.
"ރާއްޖޭގެ ދަރަނި މިހާރު މިއުޅެނީ ގާތްގަނޑަކަށް ޖީޑީޕީގެ 60 ޕަސެންޓް ހިސާބުގައި. މީގެ ދެބައިކުޅަ އެއް ބަޔަކީ ޓްރެޝަރީ ބިލްސް،" މުނައްވަރު ވިދާޅުވިއެވެ.
އެ ޓްރެޝަރީ ބިލްތަކަކީ ކުރު މުއްދަތުގައި އަނބުރާދައްކަންޖެހޭ އިންޓްރެސްރޭޓް ބޮޑު ޓީބިލް ކަމަށް މުނައްވަރު ވިދާޅުވިއެވެ. މި ސަބަބަށްޓަކައި ދިގު މުއްދަތުގައި ދައްކާގޮތަށް ބޮންޑު ދޫކުުރުމަށް ސަރުކާރުގެ ޝައުގުވެރިކަން އެބަހުރި ކަމަށް މުނައްވަރު ވިދާޅުވިއެވެ. އަދި ބޮންޑު ދޫކުުރުމަށް ގޮންޖެހުންތަކެއް އެބަހުރި ކަމަށާއި އޭގެ ތެރޭގައި އެކަމަށް ބޭނުންވާ ގާނޫނީ އޮނިގަނޑެއް ނެތުން ހިމެނޭކަމަށް ވެސް މުނައްވަރު ވިދާޅިއެވެ.
"އަޅުގަނޑުމެންނަށް އެބަހުރި ގޮންޖެހުންތަކެއް ވެސް އެހެންނަމަވެސް ސަރުކާރުން ދަނީ މުހިއްމު މަސައްކަތްތަކެއް ކުރަމުން ބޮންޑް މާކެޓެއް އުފައްދަން،" މުނައްވަރު ވިދާޅުވިއެވެ.
މިގޮތަށް ބޮންޑު ދޫކުރާއިރު އަމިއްލަ ފަރާތްތަކަށް ދިގު މުއްދަތަކަށް ބޮންޑު ދޫކުރޭވޭތޯ ބަލާނެ ކަމަށް އޭނާ ވިދާޅުވިއެވެ.
ފައިނޭންސް ފޯރަމްގައި ވާހަކަ ދައްކަވަމުން ކެޕިޓަލް މޭކެޓް ޑިވެލޮޕްމެންޓް އޮތޯރިޓީ (ސީއެމްޑީއޭ) ގެ ސީއީއޯ އަހުމަދު ނަސީރު ވިދާޅުވީ ބޮންޑު ދޫކުރުމަށް ސަރުކާރުން ކުރަންޖެހޭ މަސައްކަތް އަވަސް ކުރުމަކީ ވަރަށް މުހިއްމު ކަމެއް ކަަމަށެވެ.
އެ ފޯރަމްގައި ވާހަކަ ދައްކަވަމުން ވޯލްޑް ބޭންކުގެ އިކޮނަމިސްޓް އަނީތާ ޝްވާޒް ވިދާޅުވީ ރާއްޖޭގައި އިގްތިސާދީ ހަމަޖެހުމަކީ ބޮންޑް މާކެޓެއްގެ ކާމިޔާބީ އަށް އެންމު މުހިއްމު އެއް ކަން ކަމަށެވެ.