ރާއްޖެ ގެނެސްފައިވާ "ފާރަ ގެމަ" ކުއްތާތަކަށް ވަކިވަކި ނަން ތަކެއް ދިވެހި ބަހުގެ އެކެޑަމީން ނުކިޔައި، އެއަށް ނަންކިޔާނެ ލަފައެއް ފުލުހުންނަށް ދީފިއެވެ.
ވަކިވަކި ކުއްތާއަށް ނަން ދިނުމަށް އެދި ބަހުގެ އެކެޑަމީއަށް ފުލުހުން އެދިފައިވާއިރު ދިވެހި ބަހުގެ އެކެޑަމީން ފުލުހުންނަށް ދީފައިވާ ޖަވާބާ ގުޅޭގޮތުން އެ އެކެޑަމީގެ ރައީސް އަޝްރަފް އަލީ މިއަދު ސަން އަށް ވިދާޅުވީ، އެކެޑަމީން ފުލުހުންނަށް ލަފައެއް ދީފައިވާ ކަމަށާއި އެހެންކަމުން ވަކިވަކި ކުއްތާތަކަށް ނަންދޭނީ ފުލުހުން ކަމަށެވެ.
"ނަންތައް ދެއްވަންވާނީ އެ ގެންގުޅުއްވާ ބަޔަކު. އެސިފަޔާއި އޭގެ ބައްޓަމާއި އޭގެ ހުޝިއާރުކަމާއި އެކަންކަމަށް ބައްލަވާފައި އެގެންގުޅުއްވާ ބަޔަކު އެއަށް ބޮޑަށް ނަން ދިނުން ރަނގަޅީ،" އަޝްރަފް ވިދާޅުވިއެވެ.
އޭނާ ވިދާޅުވީ، ފުލުހުންނަށް ދީފައިވާ ލަފާގެ ތެރޭގައި ގައުމުގެ ކަރާމާތަށާއި މަސްލަހަތައް އުނިކަން ނާންނަގޮތަށް އަދި އެއްވެސް މީހެއްގެ އަބުރަށް ހުތުރުނުވާނެ ގޮތަށް ނަން ކިޔުމަށް ލަފާދެއްވާފައިވާނެ ކަމަށެވެ.
"ބަހުގެ އެކަޑެމީއިން ނަން ނުދޭނެ. އަޅުގަނޑުމެން ލަފްޒު ހަދަނީ. އެގޮތުން ޑޯގް ސުކޮޑަށް މިހެދި ލަފްޒަކީ ފާރަގެމަ، އެއީ ރަދީފަށް ވަންނާނެ އެއްޗެއް،" އަޝްރަފް ވިދާޅުވިއެވެ.
ކުއްތާތައް ބޭނުންކޮށްގެން ފުލުހުން މިހާރު ވަނީ އޮޕަރޭޝަންތަކުގައި މަސައްކަތް ކުރަންވެސް ފަށާފައެވެ. އަދި ފުލުހުން ގެންގުޅޭ ކުއްތާތައް ބޭނުންކޮށްގެން ތަހުގީގުތައް ކުރުމުގައި އެއްބާރުލުން ދިނުމާ ބެހޭ އެއްބަސްވުމެއްގައި ވަނީ ސޮއިވެސްކޮށްފައެވެ.