ރިސޯޓްތައް ހިންގާ ދުނިޔޭގެ ފެންވަރުގެ ބްރޭންޑެއް ކަމަށްވާ ފޯ ސީޒަންސް ރިސޯޓްސްއިން ޓޫރިޒަމް ދާއިރާއިން 56 ދިވެހި ޒުވާނުން ތަމްރީނުކޮށް އިތުރު 70 ކުދިން ތަމްރީނު ކުރުމުގެ ޕްރޮގުރާމެއް ފަށައިފިއެވެ.
ނެޝަނަލް އާޓް ގެލެރީގައި މިއަދު ބޭއްވި ހަފްލާއެއްގައި އެ 56 ކުދިންނަށް ސެޓްފިކްޓް ހަވާލުކޮށްދެއްވީ އިކޮނޮމިކް މިނިސްޓަރު މުހައްމަދު ސައީދުއެވެ.
މިދިޔަ އަހަރު ތަމްރީނު ކުރި ކުދިންގެ އިތުރުން މިއަހަރު 70 ކުދިން އެދާއިރާއިން ތަމްރީނު ކުރުމަށްވެސް ފޯސީޒަންސްއިން ނިންމައި އެކަން ވަނީ މިއަދު އިފްތިތާހް ކޮށްފައެވެ.
އެހަފްލާގައި ވާހަކަފުޅުދައްކަވަމުން އިކޮނޮމިކް މިނިސްޓަރު މުހައްމަދު ސައީދު ވިދާޅުވީ މިއަދު ދަސްވެނިވި ކުދިން ހިޔާރު ކުރީ ވަރަށް ރަނގަޅު ދާއިރާއެއް ކަމަށާއި މި ޓްރެއިނިންގައި އެ ކުދިން ތަމްރީނު ކޮށްފައިވަނީ ވަރަށް ރަނގަޅަށް ކަމަށެވެ.
"ކާމިޔާބުގެ ފޯކަސް ނުގެއްލޭނެ ގޮތަށް ކުރިއަށް ވަޑައިގެންފިކަމަށް ވަންޏާ ކޮންމެ ބޭފުޅަކީވެސް ޖީއެމްއަކަށް ވެސް ވެވިދާނެ. ޑައިރެކްޓަރަކަށްވެސް ވެވިދާނެ. އަދިއެއަށްވުރެވެސް މައްޗަށްވެސް ދެވިދާނެ،" މިނިސްޓަރު ސައީދު ވިދާޅުވިއެވެ.
އެހަފްލާގައި ވާހަކަ ދައްކަވަމުން ފޯ ސީޒަންސް ރިސޯޓްސް މޯލްޑިވްސްގެ ޖެނެރަލް މެނޭޖަރު އާމަންޑޯ ކްރާންއެންޒަލަން ވިދާޅުވީ ފޯ ސީޒަނުން ކުރިއަށް އެގެންދާ ޓްރެއިންތައް ކުރިއަށް ގެންދެވޭ ކަމުގެ ހެއްކަކީ އަދުގެ ޒުވާނުން އެދާއިރާއަށް ހުންނަ ޝައުގުވެރިކަމާއި އެއްބާރުލުން ކަމަށެވެ. ތަމްރީނުވި ކުދިން އެދާއިރާއިން ކާމިޔާބީތަކެއް ހޯދާނެ ކަމަށް އުންމީދު ކުރައްވާ ކަމަށް އޭނާ ވިދާޅުވިއެވެ.
އެ ޓްރެނިންގެ ދަށުން އެ 56 ކުދިން ވަނީ ޓޫރިޒަމާ ގުޅުންހުރި ތަފާތު ދާއިރާތަކުން ތަމްރީނު ކޮށްފައެވެ. އޭގެ ތެރޭގައި ފްރޮންޓް އޮފީހާއި ޑައިވިންގެ އިތުރުން އިންޖިނިއަރިންވެސް ހިމެނެއެވެ.