ދެކުނު ކޮރެއާގެ ބޭންކުތަކާއި، މާލީ ކުންފުނިތަކުގެ އިތުރުން ސަރުކާރުގެ އިދާރާތަކުން އާންމުންގެ އަމިއްލަ މައުލޫމާތު ލީކުވި މައްސަލަތައް ވަރަށް ފުރިހަމައަށް ތަޙުގީގުކޮށް، އަޅަންޖެހޭ ފިޔަވަޅުތައް އެޅުމަށް އެ ގައުމުގެ ރައީސް ލީ ޖައެ-މިއުންގް އަމުރުކުރައްވައިފިއެވެ. މިކަން ހާމަކޮށްފައިވަނީ ދެކުނު ކޮރެއާގެ ރައީސްގެ އޮފީހުންނެވެ.
މި މައްސަލައާ ގުޅިގެން ފައިނޭންޝަލް ސާވިސަސް ކޮމިޝަން (އެފްއެސްސީ) ގެ ޗެއަރމަން ލީ އީއޮގް-ވިއޮން ވަނީ މާލީ ދާއިރާގެ ޖަމްޢިއްޔާތަކާއި، ރެގިއުލޭޓަރުން އަދި މި ހާދިސާގެ އަސަރުކުރި އިދާރާތަކުގެ އިސްވެރިންނާއެކު ކުއްލި ބައްދަލުވުމެއް ބާއްވަވާފައެވެ.
އެފްއެސްސީން ނެރުނު ބަޔާނެއްގައި ބުނެފައިވަނީ، މާލީ ދާއިރާއިން މިކަމަށް އެންމެ މަތީ ދަރަޖައިގެ ސަމާލުކަމެއް ދީގެން ފިޔަވަޅުތައް އަޅަންޖެހޭނެ ކަމަށް ޗެއާމަން އިންޒާރު ކުރައްވާފައިވާ ކަމަށެވެ.
އެފްއެސްސީގެ ޗެއާމަން ވިދާޅުވި ގޮތުގައި މި ސައިބާ ހަމަލާތަކުގައި އާޓިފިޝަލް އިންޓެލިޖެންސް (އޭއައި) ބޭނުންކޮށްފައިވުން އެކަށީގެންވެއެވެ. އަދި "އޭއައި ހަމަލާތަކުން ދިފާއުވުމަށް އޭއައި ބޭނުންކުރުމުގެ" އުސޫލެއް ގެންގުޅެންޖެހޭ ކަމަށާއި، މާލީ ދާއިރާގެ ސައިބާ ސެކިއުރިޓީ އޮނިގަނޑު މުޅިން ބަދަލުކޮށް ވަރުގަދަކުރަންޖެހޭ ކަމަށްވެސް އޭނާ އިޝާރާތް ކުރެއްވިއެވެ.
މި ބައްދަލުވުން ބާއްވާފައިވަނީ ޝިންހާން ބޭންކާއި ކޭބީ ކޫކްމިން ބޭންކު ފަދަ ތަންތަނަށް ސައިބާ ހަމަލާތަކެއް ދީފައިވާ ކަމަށް އެފްއެސްސީން ހާމަކުރުމާ ގުޅިގެންނެވެ. މީގެއިތުރުން ހާނާ ބޭންކާއި ވޫރީ ބޭންކުގެ ސެކިއުރިޓީ ވެސް ފޫއަޅުވާލާފައިވާ ކަމަށް ޔޮންހާޕް ނިއުސް އޭޖެންސީން ވަނީ ރިޕޯޓުކޮށްފައެވެ.
މާލީ އިދާރާތަކުން ބުނި ގޮތުގައި ޝިންހާން ބޭންކުން ސެކިއުރިޓީ މައްސަލައެއް އުޅޭކަން ސެޕްޓެމްބަރު 30 ގައި ރިޕޯޓުކުރުމާއެކު، ކަމާބެހޭ ފަރާތްތަކުން ވަނީ އެ ތަނަށް ގޮސް ތަޙުގީގުތައް ފަށާފައެވެ. އަދި އޭގެ ފަހުން ރިޕޯޓުކުރެވުނު އެހެން ހާދިސާތަކަށްވެސް ތަޙުގީގު ވަނީ ފުޅާކޮށްފައެވެ.
ރެގިއުލޭޓަރުން ވަނީ މާލީ އިދާރާތަކުން ސެކިއުރިޓީގެ ފުރިހަމަ އިންސްޕެކްޝަނެއް ހިންގުމަށާއި، ސިސްޓަމްތަކަށް ވަދެވޭ މިންވަރު ކޮންޓްރޯލްކޮށް ހަރުދަނާކުރުމަށާއި، ބޭރުގެ ސިސްޓަމްތަކަށް ފުރުސަތު ދިނުން ކުޑަކުރުމުގެ އިތުރުން ޚިދުމަތް ހޯދާ ފަރާތްތައް ރައްކާތެރިކުރުމުގެ ފިޔަވަޅުތައް ވަރުގަދަކުރުމަށް އަންގާފައެވެ. މީގެއިތުރުން އިތުރު ހާދިސާތައް ހިނގިޔަނުދިނުމަށްޓަކައި ހަމަލާދިން ގޮތްތަކާއި، އައިޕީ އެޑްރެސްތަކާއި، އެނޫންވެސް ނުރައްކަލުގެ މައުލޫމާތު މުޅި ދާއިރާގައި އަވަހަށް ހިއްސާކުރެވޭނެ ކަމަށްވެސް ބުނެފައިވެއެވެ.
ޔޮންހާޕް ނިއުސް އޭޖެންސީން ބުނި ގޮތުގައި ރެގިއުލޭޓަރުން ގަބޫލުކުރަނީ މި ހަމަލާތަކަކީ ވަކި އެއް އިދާރާއަކަށް އަމާޒުކޮށްގެން ދީފައިވާ ހަމަލާތަކެއް ނޫން ކަމަށާއި، މިއީ ގިނަ މާލީ ކުންފުނިތަކެއްގެ ނިޒާމުގައި ހުރި ބަލިކަށިކަންކަން ހޯދުމަށް ފުޅާދާއިރާއެއްގައި ދީފައިވާ ހަމަލާތަކެއް ކަމަށެވެ.
ގާނޫނުހަދާ މަޖިލީހުގެ މެންބަރުންނަށް ބޭންކުތަކުން ހުށަހެޅި މައުލޫމާތާ ހަވާލާދީ ޔޮންހާޕްއިން ރިޕޯޓުކޮށްފައިވާ ގޮތުގައި، ހަމަލާދިނުމަށް ބޭނުންކޮށްފައިވާ އައިޕީ އެޑްރެސްތައް އައިސްފައިވަނީ އެމެރިކާ، ޖަޕާން، ސިންގަޕޫރު، ވިއެޓްނާމް އަދި އިނގިރޭސިވިލާތް ހިމެނޭ ގޮތަށް ގިނަ ގައުމުތަކަކުންނެވެ.
މި ކުއްލި ބައްދަލުވުމަކީ އަންނަ ބުދަ ދުވަހަށް ތާވަލުކުރެވިފައިވާ ބައްދަލުވުމެއް ނަމަވެސް، ދެވަނަ ދަރަޖައިގެ މާލީ އިދާރާތަކުންވެސް އިތުރު މައްސަލަތައް ފެންމަތިވުމާ ގުޅިގެން އަވަސްކޮށްގެން ބޭއްވި ބައްދަލުވުމެކެވެ.
މި މައްސަލައިގައި ދެކުނު ކޮރެއާގެ އިދިކޮޅު މައި އިދާރާ، ޕީޕަލް ޕަވާ ޕާޓީން ބުނެފައިވަނީ މީގެ ކުރިންވެސް އުތުރު ކޮރެއާއިން ދެކުނު ކޮރެއާގެ މާލީ އިދާރާތަކަށް ސައިބާ ހަމަލާތައް ދީފައިވާތީ، މި ހަމަލާތަކުގައިވެސް އުތުރު ކޮރެއާގެ ބައިވެރިވުމެއް އޮތްތޯ ކަމާބެހޭ ފަރާތްތަކުން ތަޙުގީގުކުރަންޖެހޭނެ ކަމަށެވެ.