ނިމިދިޔަ ސެޕްޓެމްބަރު މަހަކީ 2026 ވަނަ އަހަރުގެ ތެރޭގައި ކްރިޕްޓޯކަރަންސީގެ ވައްކަމާއ ހެކިންގެ ހަމަލާތަކުގައި އެންމެ ގިނަ އަދަދަކަށް ފައިސާ ގެއްލުނު މަސް ކަމަށް ސެކިއުރިޓީ ރިޕޯޓްތަކުން ދައްކައިފިއެވެ.
ސެޕްޓެމްބަރު މަހު އެކަނިވެސް ހެކިން ވަނީ 766 މިލިއަން ޑޮލަރާއި 768.4 މިލިއަން ޑޮލަރާ ދެމެދުގެ އަދަދެއްގެ ކްރިޕްޓޯ އެސެޓް ވަގަށް ނަގައިފައެވެ. މި ބޮޑު ގެއްލުމުގެ އެންމެ ބޮޑު ހިއްސާއެއް ކުރަނީ ބިޓްގެޓް އަދި ލިކުއިޑް ނެޓްވޯކް އަށް ދިން ހަމަލާތަކުންނެވެ.
ކްރިޕްޓޯ ސެކިއުރިޓީ ކުންފުންޏެއް ކަމަށްވާ ޕެކްޝީލްޑް އިން އާންމުކުރި މައުލޫމާތުގައިވާ ގޮތުން ސެޕްޓެމްބަރު މަހު ސެކިއުރިޓީ ބްރީޗްގެ 55 ހާދިސާއެއް ހިނގައިގެން 766 މިލިއަން ޑޮލަރު ވަނީ ގެއްލިފައެވެ. ނަމަވެސް، ސާޓިކް އިން ރެކޯޑުކޮށްފައިވާ ގޮތުގައި 97 ހާދިސާއެއްގައި ޖުމްލަ 768.4 މިލިއަން ޑޮލަރު ވަނީ ގެއްލިފައެވެ. މި ދެ ކުންފުނީގެ މައުލޫމާތު އެއްކުރި ގޮތުގެ ތަފާތުން ހާދިސާތަކުގެ އަދަދު ތަފާތުވި ނަމަވެސް، ގެއްލުނު މުޅި ޖުމްލަ އަދަދުގެ ތަފާތަކީ ދެ މިލިއަން ޑޮލަރަށްވުރެ ކުޑަ އަދަދެކެވެ.
ސެޕްޓެމްބަރު މަހު ހިނގި އެންމެ ބޮޑު ހާދިސާ ހިނގާފައިވަނީ ސެޕްޓެމްބަރު 24 ގައި ބިޓްގެޓްގައެވެ. ބިޓްގެޓުން ކަށަވަރުކޮށްދީފައިވާ ގޮތުގައި، ހެކަރުންގެ ކޮންޓްރޯލްގެ ދަށުގައިވާ ވޮލެޓްތަކަށް 387.5 މިލިއަން ޑޮލަރުގެ ކްރިޕްޓޯކަރަންސީ ވަނީ ފޮނުވާލާފައެވެ. މި ހަމަލާގައި ބިޓްގެޓްގެ އިތެރިއަމް، އެކްސް.އާރު.ޕީ ލެޖަރ، ޒެޑްކޭޝް އަދި ޓްރޮން ނެޓްވޯކްގައިވާ ހޮޓް އަދި ވޯމް ވޮލެޓްތަކަށް އަސަރުކޮށްފައިވެއެވެ. ނަމަވެސް އެ ކުންފުނީގެ ކޯލްޑް ވޮލެޓްތަކާއި ޕްރައިވެޓް ކީތަކަށް އެއްވެސް ނުރައްކަލެއް ވެފައި ނުވާކަމަށް ބިޓްގެޓުން ބުނެއެވެ.
ދެވަނައަށް އެންމެ ބޮޑު ހަމަލާއެއް އަމާޒުވީ ލިކުއިޑް ނެޓްވޯކަށެވެ. އެ ނެޓްވޯކްގެ އެލިމެންޓްސް ކޯޑްބޭސްގައި އުޅުނު މައްސަލައެއްގެ ފައިދާ ނަގައިގެން، އެއަށް ބެކިންގއެއް ނެތި ހެކަރު ވަނީ 4,000 އެއްހާ އެލް-ބީޓީސީ އުފައްދާފައެވެ. މި މައްސަލައިގެ ސަބަބުން ލިކުއިޑްގެ ސްޓޭންޑާޑް ބިގް-އައުޓް މެކޭނިޒަމް މެދުވެރިކޮށް 4,000 އެއްހާ ބިޓްކޮއިން ވަގަށް ނަގާފައިވާއިރު، ފެޑެރޭޝަންގެ ބިޓްކޮއިން ރިޒާވްގައި ބާކީ އޮތީ އެންމެ 197 ބިޓްކޮއިންއެވެ.
މި ދެ ބޮޑު ހަމަލާގެ އިތުރުން ސެޕްޓެމްބަރު މަހު ކުދި ބައެއް ހަމަލާތައްވެސް ވަނީ ރެކޯޑުކުރެވިފައެވެ. އެގޮތުން ސޭފް ވޮލެޓް އިން 7.8 މިލިއަން ޑޮލަރު ގެއްލިފައިވާއިރު، ޑީސެންޓް އާއި ޑިއުލްބިޓްސް އިން ވަނީ އަނޫގޮތެއްގައި 6 މިލިއަން އަދި 5.9 މިލިއަން ޑޮލަރު ގެއްލިފައެވެ.
މި އަހަރުގެ މިހާތަނަށް ސާޓިކްއިން އާންމުކޮށްފައިވާ ތަފާސްހިސާބުތަކަށް ބަލާއިރު، 2026 ވަނަ އަހަރުގެ ތެރޭގައި ހެކިންގެ 656 ހާދިސާއެއްގައި ޖުމްލަ 2.68 ބިލިއަން ޑޮލަރު ވަނީ ގެއްލިފައެވެ. މިއީ އޮގަސްޓް މަހާ އަޅާބަލާއިރު ނިސްބަތުން ވަރަށް ބޮޑު އިތުރުވުމެކެވެ.
އޮގަސްޓް މަހު 50 ހާދިސާއެއްގައި ގެއްލިފައިވަނީ 136.3 މިލިއަން ޑޮލަރެވެ. އެހެންކަމުން ސެޕްޓެމްބަރު މަހު ގެއްލުނު ފައިސާގެ އަދަދު ވަނީ އޮގަސްޓް މަހަށްވުރެ 462 އިންސައްތަ އިތުރުވެފައެވެ.