މިއަދު ފާހަގަކުރަމުންދާ ދިވެހިރާއްޖޭގެ ގައުމީ ބްރޯޑްކާސްޓިން ދުވަހާ ގުޅުވައި ޒިންމާދާރުކަމާއެކު ޚަބަރާއި މައުލޫމާތު ފެތުރުމުގެ މަސައްކަތް ކުރިއަށް ގެންދިއުމަށް މި ދާއިރާގައި މަސައްކަތްކުރައްވާ އެންމެހައި ފަރާތްތަކަށް މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން (އެމްއެމްބީސީ) އިން އިލްތިމާސްކޮށްފިއެވެ.
އެ ކޮމިޝަނުން ނެރުނު ބަޔާނެއްގައި ބުނީ، ބްރޯޑްކާސްޓިންގެ ޚިދުމަތަކީ ގައުމެއްގެ އިޖުތިމާއީ، ސިޔާސީ އަދި އިގްތިޞާދީ ހޭލުންތެރިކަން އިތުރުކުރުމުގައްޔާއި، ރައްޔިތުންނަށް ތެދު މަޢުލޫމާތު ފޯރުކޮށްދިނުމުގައި އެންމެ މުހިންމު އެއް ވަސީލަތް ކަމަށެވެ. އަދި އިސްލާމީ ރިވެތި އަޚްލާގާއި ދިވެހި ގައުމިއްޔަތާއި ސަގާފަތް ދަމަހައްޓައި، ސައްހަ އަދި އިތުބާރުހުރި މައުލޫމާތު މުޖުތަމަޢަށް ފޯރުކޮށްދިނުމުގައި ރާއްޖޭގެ ބްރޯޑްކާސްޓަރުން އަދާކުރަމުން ގެންދަނީ އަގުހުރި ގައުމީ ޚިދުމަތެއް ކަމަށް ވެސް އެ ކޮމިޝަނުން ފާހަގަކުރެއެވެ.
ޓެކްނޮލޮޖީގެ ކުރިއެރުމާއެކު، ބްރޯޑްކާސްޓިން ދާއިރާ އިތުރަށް ތަރައްޤީކޮށް، ދާއިރާގެ މަސައްކަތްތެރިންގެ ފަންނީ ޤާބިލުކަން އިތުރުކުރުމަށް އަބަދުވެސް މަސައްކަތް ކުރާނެ ކަމަށް އެމްއެމްބީސީން ބުނެއެވެ. އަދި މިނިވަން، ޒިންމާދާރު ނޫސްވެރިކަމަކާއި ބްރޯޑްކާސްޓިން ވެއްޓެއް ގާއިމުކުރުމަކީ ކޮމިޝަނުގެ މައިގަނޑު އެއް އަމާޒުކަމަށް ފާހަގަކުރިއެވެ.
މި ދުވަހުގެ މުނާސަބަތުގައި އެމްއެމްބީސީން ވަނީ ދޮގު މައުލޫމާތާއި ފިތުނަ އުފެދޭ ފަދަ ކަންކަމުން ދުރުހެލިވެ، ގައުމީ މަޞްލަޙަތު އިސްކޮށްގެން ޒިންމާދާރުކަމާއެކު ޚަބަރާއި މަޢުލޫމާތު ފެތުރުމަށް ހުރިހާ ބްރޯޑްކާސްޓަރުންނަށް އިލްތިމާސްކޮށްފައެވެ. އަދި ދާއިރާގެ މަސައްކަތްތެރިންގެ ހައްގުތައް ރައްކާތެރިކުރުމުގައި އެ ކޮމިޝަނުން އަބަދުވެސް ދެމިއޮންނާނެކަމުގެ ޔަޤީންކަން ވަނީ ދީފައެވެ.
ރާއްޖޭގެ ބްރޯޑްކާސްޓިން ތާރީޚަށް ބަލާއިރު، މި ޚިދުމަތް އެންމެ ފުރަތަމަ ފެށިގެން އައީ 29 ޑިސެމްބަރު 1962 ގައި "މާލެ ރޭޑިއޯ" ގެ ނަމުގައެވެ. އޭގެ ފަހުން "ސެނެކޯ ރޭޑިއޯ" އަދި 1967 ގައި "މޯލްޑިވްސް އައިލެންޑް ބްރޯޑްކާސްޓިން ސާވިސް" (އެމްއައިބީއެސް) ގެ ނަމުގައި ކުރިއަށްދިޔަ މި ޚިދުމަތް، 1969 ގައި "ރޭޑިއޯ މޯލްޑިވްސް" އަދި 1980 ގައި "ދިވެހިރާއްޖޭގެ އަޑު" ގެ ނަމަށް ބަދަލުވެގެން ދިޔައެވެ. މީގެއިތުރުން 1978 ވަނަ އަހަރު ޓެލެވިޒަން މޯލްޑިވްސް (ޓީވީއެމް) އުފެދި، 2007 ވަނަ އަހަރު އަމިއްލަ ފަރާތްތަކަށް ބްރޯޑްކާސްޓްކުރުމުގެ ފުރުސަތު ހުޅުވައިލެވުނެވެ.
މި ދާއިރާއަށް ގާނޫނީ ހައިސިއްޔަތު ލިބިގެންދިޔައީ 2010 ވަނަ އަހަރު އަމަލުކުރަން ފެށި ބްރޯޑްކާސްޓްކުރުމުގެ ގާނޫނުގެ ދަށުންނެވެ. އަދި މިދިޔަ އަހަރުގެ ސެޕްޓެމްބަރު 18ގައި ތަސްދީގުކުރެވުނު މީޑިއާ އަދި ބްރޯޑްކާސްޓިން ރެގިއުލޭޝަން ޤާނޫނުގެ ދަށުން އެމްއެމްބީސީ އުފެދި، މި ދާއިރާ މިހާރު ވަނީ ޒަމާނީ މީޑިއާތަކާއެކު އައު ހަރުފަތަކަށް ވާސިލުވެފައެވެ.
ކޮމިޝަނުން ހާމަކުރި ގޮތުގައި، މިއަދާ ހަމައަށް އައިއިރު ރާއްޖޭގައި 37 ބްރޯޑްކާސްޓަރުންނާއި 29 ރީބްރޯޑްކާސްޓަރުން ދަނީ ޚިދުމަތް ދެމުންނެވެ.