އާޓިފިޝަލް އިންޓެލިޖެންސް (އޭއައި) އުފައްދާ އެންމެ ބޮޑު އެއް ކުންފުނި ކަމަށްވާ އޯޕަންއޭއައިގެ ރައްކާތެރިކަމާ ބެހޭ ބައިގައި މަސައްކަތްކުރި އިސް މުވައްޒަފަކު، އެ ކުންފުނީގެ އުސޫލުތަކަށް ވަރުގަދައަށް ފާޑުކިޔައި އިސްތިއުފާދީފިއެވެ.
އޯޕަންއޭއައިގައި 3.5 އަހަރު ދުވަހު މަސައްކަތްކުރުމަށްފަހު އިސްތިއުފާދިން ޑޭވިޑް ރޮބިންސަން، "ދި އެޓްލާންޓިކް" މަޖައްލާގައި "އައި ކުއިޓް އޯޕަންއޭއައި ބިކޯޒް އިޓްސް ކަލްޗާ އިޒް ބްރޯކަން" ގެ ނަމުގައި ޝާއިޢުކުރި ލިޔުމެއްގައި ބުނެފައިވަނީ، އޭއައި ނިޒާމުތައް ހަލުވިކަމާއެކު ތަރައްޤީކުރުމަށް އިސްކަންދޭ ސަގާފަތުގެ ސަބަބުން ނުރައްކާތެރި ފެއިލިއާތައް މެދުވެރިވުމުގެ ފުރުޞަތު ބޮޑުވަމުންދާ ކަމަށެވެ.
އޯޕަންއޭއައި ހިމެނޭހެން އޭއައި އުފައްދާ ކުންފުނިތަކުން އެކަށީގެންވާ ވަރަށް ރައްކާތެރިކަމަށް ސަމާލުކަން ނުދޭކަން ފާހަގަކުރަމުން ރޮބިންސަން ބުނީ، އިތުރު ޤާބިލުކަން ހުރި ނިޒާމުތައް އުފެއްދުމުގެ ކުރިން ރައްކާތެރިކަމުގެ ދިރާސާތަކަށާއި މާހިރުންގެ ލަފައަށް އިތުރު އިސްކަމެއް ދޭންޖެހޭ ކަމަށެވެ.
"ތަޖުރިބާކުރުމާއި ކުށްތައް ތަކުރާރުކުރުމުގެ ވަގުތު މިހާރު ފާއިތުވެއްޖެ" ކަމަށް ބުނަމުން ރޮބިންސަން ފާހަގަކުރީ، ކުރިއަރާފައިވާ އޭއައި ނިޒާމުތަކަށް ބޭނުންވަނީ ނިއުކްލިއާ އެނާޖީއާއި ވައިގެ ދަތުރުފަތުރުގެ ދާއިރާގައި ބޭނުންކުރާ ފަދަ ވަރުގަދަ ރައްކާތެރިކަމުގެ ފިޔަވަޅުތަކެއް ކަމަށެވެ.
އޯޕަންއޭއައިއިން އާންމުކޮށް ބޭނުންކުރަނީ "އިޓަރޭޓިވް ޑިޕްލޯއިމަންޓް" ނުވަތަ ނިޒާމުތައް އާންމުންނަށް ދޫކޮށްލުމަށްފަހު މައްސަލަތައް ފެންމަތިވުމުން ރައްކާތެރިކަން ވަރުގަދަކުރުމުގެ އުސޫލު ކަމަށް އޭނާ ބުންޏެވެ.
އޯޕަންއޭއައިގައި ހޭދަކުރި މުއްދަތުގައި އެ ކުންފުނީގެ ތައްޔާރީތަކާ ބެހޭ އުސޫލުތައް (ޕްރިޕެއާޑްނެސް ފްރޭމްވޯކް) އެކުލަވައިލުމުގައި އެހީތެރިވެ، 12 ފްރަންޓިއާ މޮޑެލްއެއް ނެރުމުގެ ކުރިން ތައްޔާރުކުރި ރައްކާތެރިކަމުގެ ރިޕޯޓުތައް ސުޕަވައިޒްކުރި ރޮބިންސަން ބުނީ، އެ ކުންފުނިން އެއް މޮޑެލް ނެރުމަށްފަހު އަނެއް މޮޑެލް ނެރުމަށް ބާރުސްޕީޑުގައި މަސައްކަތްކުރާއިރު، ބޭނުންވާ ފެންވަރުގެ ރައްކާތެރިކަމާއި ސަމާލުކަން ދެމެހެއްޓުމުގައި ފެއިލްވަމުންދާ ކަމަށެވެ.
އަދި އޭއައި އިންސާނީ މަގުސަދުތަކާއި އަގުތަކާ އެއްގޮތަށް ބައްޓަންކުރުމާ ބެހޭ "އެލައިންމަންޓް" ދިރާސާތަކަށްވުރެ އޭއައިގެ ޤާބިލުކަން ކުރިއަރައިގެންދާ މިންވަރު މާ އަވަސްކަމަށްވެސް އޭނާ އިންޒާރު ދިނެވެ.
މި ފާޑުކިޔުންތަކާ ގުޅިގެން އޯޕަންއޭއައިގެ ތަރުޖަމާނަކު ނެރުނު ބަޔާނެއްގައި ބުނެފައިވަނީ، އެ ކުންފުނީގެ މޮޑެލްތައް ރައްކާތެރިކަމާއެކު ބެލެހެއްޓޭނެ މިންވަރަށްވުރެ ބޮޑަށް ޤާބިލުވިޔަނުދީ ހިފެހެއްޓުމަށް މަސައްކަތްކުރަމުންދާ ކަމަށާއި، މަސައްކަތުގެ ސްޕީޑް މަޑުޖައްސާލަންޖެހޭ ހާލަތްތަކުގައި މޮޑެލްތައް ތަމްރީނުކުރުން ހުއްޓާލައި ނުވަތަ ރިލީޒްކުރުން ފަސްކުރާ ކަމަށެވެ.
އޭއައި ކުންފުނިތަކުން މާ އަވަސް އަރުވާލައިގެން ބާރުގަދަ ނިޒާމުތައް އުފައްދަމުންދާތީ ސިނާއަތުގެ ތެރޭގައި ބަހުސްތައް ބޮޑުވެފައިވާއިރު، އޯޕަންއޭއައިގެ އިތުރުން ވާދަވެރި އެންތުރޯޕިކް ކުންފުނީގެ ރައްކާތެރިކަމުގެ ފިޔަވަޅުތައް ފެއިލްވެ ނުވަތަ ޓެސްޓުކުރަމުންދިޔަ ނިޒާމުތަކުން އުއްމީދުނުކުރާ ފަދަ އަމަލުތައް ފެނުމާ ގުޅިގެން އެ ކުންފުނިތަކަށް ވަނީ ބޮޑެތި ފާޑުކިޔުންތަކެއް އަމާޒުވެފައެވެ.
އޯޕަންއޭއައިގެ ސޭފްޓީ ޓީމުގެ މުހިންމު އިސް ވެރިންނާއި އިސް ރިސާޗަރުން އެ ކުންފުނި ދޫކޮށް ދިއުމުގެ ސިލްސިލާ މީގެ ކުރިންވެސް ހިނގާފައިވާއިރު، ރައްކާތެރިކަމަށްވުރެ ވިޔަފާރި ކުރިއެރުވުމަށް އެ ކުންފުނިން އިސްކަންދޭ ކަމަށް ބުނެ ގިނަ އަދަދެއްގެ މުވައްޒަފުން ވަނީ ކަންބޮޑުވުން ފާޅުކޮށްފައެވެ.