އާޓިފިޝަލް އިންޓެލިޖެންސް (އޭއައި) ނިޒާމުތައް ތަރައްޤީކުރާ އޯޕަންއޭއައި ކުންފުނީގެ އޭއައި އެޖެންޓުންގެ ހުއްދަނެތް އަދި ނުރައްކާތެރި ޙަރަކާތްތަކެއް ފާހަގަކުރެވުމާ ގުޅިގެން، 100 އަށްވުރެ ގިނަ ޖަމްޢިއްޔާއާއި ކުންފުންޏަށް އެކަމުގެ މަޢުލޫމާތު ދީފިއެވެ.
ޗެޓްޖީޕީޓީ އުފެއްދި އޯޕަންއޭއައި އިން މި މަޢުލޫމާތު ހާމަކޮށްފައިވަނީ އެ ކުންފުނިން ނެރުނު ބްލޮގް ޕޯސްޓެއްގައެވެ.
ސޭމް އަލްޓްމަން އިސްކޮށް ހުންނަވާ އޯޕަންއޭއައި އިން މިފަދަ ބޮޑު ތަޙުޤީޤެއް ފަށާފައިވަނީ ހަގިން ފޭސްއަށް ނުބައިކޮށް ނުވަތަ އޮޅިގެން ހެކިން ހާދިސާއެއް ހިނގުމާ ގުޅިގެންނެވެ. އެއަށްފަހު އެ ކުންފުނީގެ އޭއައި މޮޑެލްތަކުގެ ޙަރަކާތްތައް ފުޅާ ދާއިރާއެއްގައި ދަނީ ރިވިއުކުރަމުންނެވެ.
އޯޕަންއޭއައިގެ އޭއައި އެޖެންޓުން ހިންގާފައިވާ ނުބައި ޙަރަކާތްތަކުގެ ފުރިހަމަ ފުޅާމިން ދެނެގަތުމަށްޓަކައި، އެ ކުންފުނިން ދަނީ ގާތްގަނޑަކަށް 50 ޕެޓާބައިޓްގެ މަޢުލޫމާތު (ޑޭޓާ) ބަލައި ފާސްކުރަމުންނެވެ.
ފަހަކަށް އައިސް މުޅި ދުނިޔޭގައިވެސް މިފަދަ އޭއައި އެޖެންޓުންގެ ނުރައްކާތެރި ސެކިއުރިޓީ ބްރީޗްތައް ހިނގުން އިތުރުވެފައިވާތީ، މިހާރު ތަރައްޤީކުރަމުންދާ ބާރުގަދަ އޭއައި މޮޑެލްތައް ކޮންޓްރޯލްކުރުމުގެ ޤާބިލުކަމާމެދު އޭއައި އިންޑަސްޓްރީގެ ތެރޭގައި ބޮޑެތި ކަންބޮޑުވުންތަކެއް ވަނީ އުފެދިފައެވެ.
އޯޕަންއޭއައި އިން ބުނި ގޮތުގައި، ބައެއް ޙާލަތްތަކުގައި މޮޑެލްތަކުން އިންޓަރނެޓް ބޭނުންކޮށްފައިވަނީ ޤަޞްދުކުރެވިފައިނުވާ ގޮތްގޮތަށެވެ. ނުވަތަ އެކަށީގެންވާ ފުރިހަމަ ފިޔަވަޅުތަކާއި ކޮންޓްރޯލްތައް އެ މޮޑެލްތަކަށް އަޅާފައެއް ނުވެއެވެ.
މިފަދަ މައްސަލަތައް ކުރިޔަށް އޮތް ތަނުގައި ހިނގިޔަނުދިނުމަށާއި، ނުވަތަ މައްސަލައެއް ދިމާވާނަމަ ވަރަށް އަވަހަށް ފާހަގަކުރުމަށްޓަކައި ވޭތުވެދިޔަ މަސްތަކުގައި ފަންނީ އަދި އޮޕަރޭޝަނަލް އާ ފިޔަވަޅުތަކެއް އަޅަމުންދާ ކަމަށާއި، އަދިވެސް މި މަސައްކަތް ކުރިއަށްދާނެ ކަމަށް އޯޕަންއޭއައި އިން ބުނެފައިވެއެވެ.
މި ތަޙުޤީޤާއި ރިވިއު ކުރުމުގެ މަސައްކަތުގެ ބޮޑުމިނަށް ބަލާއިރު، މި މަސައްކަތް މުޅިން ނިންމާލުމަށް އެތައް މަހެއް ނަގާނެ ކަމަށް އޯޕަންއޭއައި އިން ކުރިންވެސް ވަނީ ހާމަކޮށްފައެވެ.
މިހާތަނަށް އޯޕަންއޭއައިގެ މޮޑެލްތަކުން ފާހަގަކުރެވިފައިވާ އެންމެ ނުރައްކާތެރި އަދި ބޮޑު ހާދިސާއަކީ ހަގިން ފޭސް އަށް ދިމާވި ހާދިސާ ކަމަށްވެސް އެ ކުންފުނިން ވަނީ ބުނެފައެވެ.