މިސްރުގައި އުފަންވާ ކުދިންގެ ނިސްބަތް މިދިޔަ އަހަރު 2.33 އަށް ދަށްވެފައިވާ ކަމަށް އެ ގައުމުގެ ސެންޓްރަލް އޭޖެންސީ ފޯ ޕަބްލިކް މޮބިލައިޒޭޝަން އެންޑް ސްޓެޓިސްޓިކްސް (ކެޕްމާސް) އިން އާންމުކުރި ރިޕޯޓެއްގައި ހާމަކޮށްފިއެވެ.
މިސްރުގައި ނެރުނު، 2025 ވަނަ އަހަރުގެ މިސްރުގެ ފެމިލީ ހެލްތު ސާވޭގެ ފުރަތަމަ ނަތީޖާތަކުން ދައްކާ ގޮތުގައި، މިއީ 2021 ވަނަ އަހަރު ރެކޯޑުކުރެވުނު 2.85 އާ އަޅައި ބަލާއިރު 18.2 އިންސައްތައިގެ ދަށްވުމެކެވެ. އެ ނަތީޖާތަކާ ގުޅިގެން، އަންހެނަކަށް ލިބޭ ކުދިންގެ ނިސްބަތް 2.1 އަށް ތިރިކުރުމަށް މިސްރު ސަރުކާރުން ކަނޑައަޅާފައިވާ ސްޓްރެޓީޖިކް އަމާޒަށް ވާސިލުވުމުގެ ފުރުސަތު ބޮޑުވެފައިވާ ކަމަށް ކެޕްމާސްއިން ފާހަގަކުރެއެވެ.
އެ ސާވޭއަކީ، މިސްރުގެ އާބާދީއާއި ސިއްހީ ސިޔާސަތުތައް އެކުލަވާލުމަށް ބޭނުންވާ މައުލޫމާތު އެއްކުރުމަށް ކެޕްމާސްއިން ކުރިއަށްގެންދާ ސިލްސިލާ ދިރާސާތަކުގެ ތެރެއިން އެންމެ ފަހުގެ ދިރާސާއެވެ. މި ދިރާސާގެ އަލީގައި އާއިލާތަކުގެ ސިއްހަތާއި އާބާދީއަށް އަންނަ ބަދަލުތައް ވަޒަންކުރެވޭނެ ކަމަށް ކެޕްމާސްގެ ވެރިޔާ އަކްރަމް އަލްގޮހާރީ ވިދާޅުވިއެވެ.
މި ރިޕޯޓުގައިވާ ގޮތުން، އުމުރުން 20 އަހަރުން ދަށުގެ ޒުވާނުން ވިހާ ނިސްބަތް ވެސް ވަނީ ވަރަށް ބޮޑަށް ދަށްވެފައެވެ. އެގޮތުން 2021 ވަނަ އަހަރު 1،000 އަންހެނުންނަށް 50 ކުދިން ލިބިފައިވާއިރު، 2025 ވަނަ އަހަރު އެ އަދަދު ވަނީ 34.6 އަށް ދަށްވެފައެވެ. މިއީ 31 އިންސައްތައިގެ ދަށްވުމެކެވެ.
މިސްރުގެ އެސޯސިއޭޝަން އޮފް އިކޮނޮމިކްސް އެންޑް ލެޖިސްލޭޝަންގެ މެންބަރު މުހައްމަދު އަނީސް ވިދާޅުވި ގޮތުގައި، ދަރިން ހޯދާ ނިސްބަތް ދަށްވުމުގެ މައިގަނޑު އެއް ސަބަބަކީ ދިރިއުޅުމުގެ ޚަރަދުތައް ބޮޑުވުމެވެ. އަދި އެ ގައުމުގެ އިގުތިސާދީ މާހިރެއް ކަމަށްވާ ސަހަރު އައްދަމާތީ ވެސް ވަނީ، ގިނަ އަދަދަކަށް ކުދިން ހޯދުމަކީ އިގުތިސާދީ ހާލަތު އޮތް ގޮތުން ދަތި ކަމަކަށް ވެފައިވާ ކަމަށް ވިދާޅުވެފައެވެ. އޭނާ ފާހަގަކުރެއްވި ގޮތުގައި، އާއިލާ ރޭވުމަށް އެންމެ ބޮޑު ބާރަކަށް މިހާރު ވެފައިވަނީ އާއިލާގެ މާލީ ހާލަތެވެ.
މީގެ އިތުރުން، އިގުތިސާދީ މާހިރު ރަޝާދު އަބްދޫ ވިދާޅުވި ގޮތުގައި، އާބާދީގެ ބޮޑު ބަޔަކީ އަސާސީ ތަކެތި ހޯދުމަށް ބޭނުންވާ އާމްދަނީއަށްވުރެ ދަށް އާމްދަނީއެއް ލިބޭ ބަޔަކަށްވާއިރު، އެއީ ކައިވެނިކުރާ ނިސްބަތަށާއި އައު އާއިލާތައް ފެށުމުގެ ގާބިލުކަމަށް ސީދާ އަސަރުތަކެއް ކޮށްފައިވާ ކަމެކެވެ.
އިގުތިސާދީ ގޮތުން ކުރިމަތިވާ މިފަދަ ގޮންޖެހުންތަކުގެ ސަބަބުން ގިނަ ޒުވާނުން ކައިވެނިކުރުން ލަސްކުރަމުންދާ ކަމަށް ވެސް އޭނާ ފާހަގަކުރެއްވިއެވެ.
ސޯޝިއޮލޮޖީ ޕްރޮފެސަރު ސައީދު ސާދިގު ވިދާޅުވި ގޮތުގައި، މިސްރުގެ ވިހާ ނިސްބަތް ދަށްވަމުންދަނީ ޑެމޮގްރަފިކް ޓްރާންސިޝަން ތިއަރީގެ މަރުހަލާތަކާ އެއްގޮތަށެވެ. އޭނާ ވިދާޅުވީ މި ތިއަރީގެ ދަށުން މުޖުތަމައުތައް އެކި މަރުހަލާތައް ކަޑައްތުކުރާ ކަމަށާއި، ފުރަތަމަ މަރުހަލާގައި ވިހާ ނިސްބަތާއި މަރުވާ ނިސްބަތް މަތިކޮށް ހުރުމަށްފަހު، ދެން އަންނަ މަރުހަލާގައި މަރުވާ ނިސްބަތް ދަށްވެފައި ވިހާ ނިސްބަތް މަތިކޮށް ހުންނަ ކަމަށެވެ. އަދި އެންމެ ފަހުން ވިހާ ނިސްބަތާއި މަރުވާ ނިސްބަތް އެއް ހަމައަކަށް އަންނާނެ ކަމަށް އޭނާ ވިދާޅުވިއެވެ.
ކެޕްމާސްއިން ވަނީ އެ ސާވޭގެ ފުރިހަމަ ރިޕޯޓު މި އަހަރު ނިމުމުގެ ކުރިން އާންމުކުރާނެ ކަމަށް ބުނެފައެވެ.