ދިވެހި ރައްޔިތުންގެ ބޯހިޔާވަހިކަމަށް ޚާއްސަކޮށް ދައުލަތުގެ ބަޖެޓުން ޚަރަދުކޮށްގެން ކ. ފުށިދިއްގަރު ފަޅު (ރަސްމާލެ) ހިއްކައިގެން އެ މަޝްރޫއު ކުރިއަށް ގެންދަން އެންމެ ފުރަތަމަ ނިންމެވީ ޚުދު އެމަނިކުފާނު ކަމަށާއި، ނަމަވެސް އެކަން ކުރަން ނިންމެވީ ދެވަނަ ދައުރެއްގައި ކަމަށް ކުރީގެ ރައީސް އަބްދުﷲ ޔާމީން އަބްދުލްގައްޔޫމް ރޭ ވިދާޅުވެއްޖެއެވެ.
ޔާމީން އެފަދައިން ވިދާޅުވިއިރު އަބޫދާބީގެ މަޝްހޫރު ޑިވެލޮޕަރު، އީގަލް ހިލްސް އާއި ދިވެހި ސަރުކާރާ ދެމެދު ރަސްމާލޭގައި 20 ބިލިއަން ޑޮލަރުގެ ވޯޓާފްރަންޓް އަދި މެރީނާ މަޝްރޫއެއް ތަރައްގީކުރުމަށް އެއްބަސްވުމުގައި ސޮއިކޮށްފައިވަނީ މިދިޔަ މަހުގެ 21ގައެވެ. މިއީ ރާއްޖޭގެ ތާރީޚުގައި ވެސް ހިންގަން ހުށަހެޅުނު ބޭރުގެ އެންމެ ބޮޑު އެއް އިންވެސްޓްމަންޓް މަޝްރޫއެވެ.
މި މަޝްރޫއާ ގުޅޭގޮތުން ޔާމީން ވަނީ މީގެ ކުރިން ވެސް ކަންބޮޑުވުންފާޅުކުރައްވައި ވާހަކަފުޅު ދައްކަވައިފައެވެ. އެގޮތުން ރަސްމާލެ މަޝްރޫއުގެ އެއްބަސްވުން ކަނޑައެޅިގެން ގާނޫނާ ޚިލާފު ކަމަށާއި، ރަސްމާލެ އެއްބަސްވުން ހެދުމުގެ ކުރިން ރައްޔިތުންގެ ފެންނަ ނުފެންނަ ވޯޓެއް ނަގަން ޖެހޭނެ ކަމަށް ވެސް އެމަނިކުފާނު ވިދާޅުވިއެވެ. ހަމައެއާއެކު އެއްބަސްވުމާ ގުޅޭ ރަސްމީ ހުރިހާ ލިޔެކިޔުންތައް ހާމަކުރުމަށް ގޮވާލައި ޔާމީންގެ އަމިއްލަފުޅު ޕާޓީ ޕީޕަލްސް ނެޝަނަލް ފްރަންޓް (ޕީއެންއެފް) އިން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް ސިޓީއެއް ވެސް ވަނީ ފޮނުވައިފައެވެ.
ކަން އެހެން އޮއްވައި ޕީއެންއެފްއިން ރޭ ބޭއްވި ޖަލްސާއެއްގައި ވާހަކަފުޅު ދައްކަވަމުން ޔާމީން ވިދާޅުވީ، އޭރު އޮތް އިގްތިޞާދީ ތަރައްގީގެ ދުވެލި އެގޮތުގައި ހިފެހެއްޓިއްޖެނަމަ ދެވަނަ ދައުރެއްގައި ރަސްމާލެ ހިއްކަން ނިންމެވީ 2030 ގެ ކުރިން 18 އަހަރާއި 30 އަހަރާ ދެމެދުގެ ކޮންމެ ޒުވާނަކަށް ބިމެއް ނުވަތަ އެޕާޓްމަންޓެއް ހޯދައިދިނުމުގެ ބޭނުމުގައި ކަމަށެވެ.
ކުރީގެ ރައީސް އަބްދުﷲ ޔާމީން އަބްދުލްގައްޔޫމް، ގެކޮޅަށް ބަދަލުކުރި ދުވަހު އަރިހުގައި ރައީސް ޑރ. މުޙައްމަދު މުއިއްޒު -- ސަން ފޮޓޯ; މުހައްމަދު މާހިލްނަމަވެސް މިހާރުގެ ހާލަތުގައި އެއީ ބޭކާރު ޚަރަދެއް ކަމަށް އެމަނިކުފާނު ވިދާޅުވިއެވެ. އެފަދއިން ވިދާޅުވި ސަބަބު ސާފުކޮށްދެއްވަމުން އެމަނިކުފާނު ވިދާޅުވީ، ދައުލަތުގެ ދަރަނި އިންތިހާއަށް ބޮޑުވެފައިވާ ވަގުތެއްގައި ލޯނު ނަގައިގެން އެ މަޝްރޫއު ކުރިއަށް ގެންދިއުމަކީ ބޭކާރު ކަމެއް ކަމަށެވެ.
ރަސްމާލެ ހިއްކައިގެން އެންމެ ފުރަތަމަ ވެސް އެކަން ކުރަން ނިންމީ އަޅުގަނޑު. އޭރު އޮތް އިގްތިޞާދީ ތަރައްގީގެ ދުވެލި އެގޮތުގައި ހިފެހެއްޓިއްޖެނަމަ ދެވަނަ ދައުރެއްގައި ރަސްމާލެ ހިއްކަން ނިންމެވީ 2030 ގެ ކުރިން 18 އަހަރާއި 30 އަހަރާ ދެމެދުގެ ކޮންމެ ޒުވާނަކަށް ބިމެއް ނުވަތަ އެޕާޓްމަންޓެއް ހޯދައިދިނުމުގެ ބޭނުމުގައި، ކުރީގެ ރައީސް އަބްދުﷲ ޔާމީން އަބްދުލްގައްޔޫމް
ޔާމީން އެފަދައިން ވިދާޅުވިއިރު ރައީސް މުއިއްޒަކީ އޭރު އެމަނިކުފާނުގެ ވެރިކަމުގައި ހައުސިން މިނިސްޓަރަކަށް ހުންނެވި ބޭފުޅާއެވެ. އަދި ރާއްޖެ ދުށް އެންމެ ބޮޑެތި ތަރައްގީގެ ޕްރޮޖެކްޓްތައް ކަމަށްވާ ސިނަމާލެ ބުރިޖާއި ހުޅުމާލެ ފޭސް ދޭއްގެ ހިޔާ ފްލެޓް މަޝްރޫއު ފަދަ ޕްރޮޖެކްޓްތަކަކީ ސީދާ ރައީސް މުއިއްޒުގެ ބެއްލެވުމުގެ ދަށުން އޭރު ހިންގެވި މަޝްރޫއުތަކެވެ.
ޔާމީން އިތުރަށް ފާހަގަކުރެއްވި ގޮތުގައި މިހާރު ދައުލަތުގެ ޖުމްލަ ދަރަނި 160 ބިލިއަން ރުފިޔާއަށް އަރާފައިވާއިރު، ރާއްޖެއަށް އަހަރަކު ލިބޭ އާމްދަނީއަކީ ގާތްގަނޑަކަށް 40 ބިލިއަން ރުފިޔާއެވެ. އަދި މިހާރު އޮތް ދަރަންޏަކީ ހަތަރު އަހަރުގެ އާމްދަނީއާ އެއްވަރުގެ އަދަދެއް ކަމަށާއި، މި ސަރުކާރުން އެކަނިވެސް ބޮޑު ދަރަންޏެއް އުފައްދާފައިވާ ކަމަށް އެމަނިކުފާނު ވިދާޅުވިއެވެ.
މީގެއިތުރުން ހުޅުމާލޭގައި އަދިވެސް ބޮޑެތި ބިންތައް އެބަހުރި ކަމަށާއި، ބޭނުންވަނީ އުސް އިމާރާތްތައް އެޅުން ކަމަށްވެސް ވިދާޅުވިއެވެ.
މި މަޝްރޫޢާ ގުޅިގެން ޔާމީން އެންމެ ބޮޑު ކަންބޮޑުވުމެއް ފާޅުކުރެއްވީ ދިވެހިން އާބާދުކުރަން އޮތް ބިމެއް ބޭރުގެ ފަރާތްތަކަށް ދޫކޮށްލުމާ ގުޅޭގޮތުންނެވެ. އެގޮތުން، ޔަހޫދީންނާއި ދިވެހިން އެކީގައި ދިރިއުޅޭ ގޮތް ހަދާތީ ކަންބޮޑުވާ ކަމަށާއި މިއީ އަވަސްއަރުވާލައިގެން ބަޔަކަށް ފައިސާ ނަގައިދިނުމަށް ރާއްޖެ ވިއްކާލުން ފަދަ ކަމެއްގެ ގޮތުގައި އެމަނިކުފާނު ސިފަކުރެއްވިއެވެ. އަދި މި މަޝްރޫއާ ގުޅިގެން ވާހަކަދެކެވޭ ކުންފުނިތަކަކީ ޒިންމާދާރުކަމެއް ނެތް ކަރުދާސް ކުންފުނިތަކެއް ކަމަށާއި، މި ނިންމުން ނިންމާފައި ވަނީ އެކަށީގެންވާ ޑިއު ޑިލިޖެންސްއާއި ފީސިބިލިޓީ ނުބަލައި ކަމަށްވެސް ތުހުމަތުކުރެއްވިއެވެ.
އީގަލް ހިލްސް އާއި ދިވެހި ސަރުކާރާ ދެމެދު ރާއްޖޭގައި 20 ބިލިއަން ޑޮލަރު ނުވަތަ ގާތްގަނޑަކަށް 308 ބިލިއަން ރުފިޔާގެ ވޯޓާފްރަންޓް އަދި މެރީނާ މަޝްރޫއެއް ތަރައްގީކުރުމަށް ސޮއިކުރުން --- ފޮޓޯ: ހައުސިން މިނިސްޓްރީމީގެއިތުރުން އެމަނިކުފާނު ވިދާޅުވީ، އެމަނިކުފާނުގެ ވެރިކަމުގައި ބޮޑެތި އިންވެސްޓްމަންޓްތަކަށް 99 އަހަރަށް ބިން ދޫކުރި ނަމަވެސް، އެއީ ބޭރުގެ ވަކި ބަޔަކު ވަޒަންވެރިކުރުވުމުގެ މަގްސަދުގައި ކުރި ކަމެއް ނޫން ކަމަށެވެ. އަދި މިހާރުގެ ސަރުކާރުން ގާނޫނުތަކަށް ބަދަލު ގެނެސްގެން ނަމަވެސް ކުރަން އުޅެނީ އެފަދަ ކަމެއް ކަމަށް އެމަނިކުފާނު ތުހުމަތުކުރެއްވިއެވެ.
ރަސްމާލެ މަޝްރޫއުގެ ދަށުން ޔޫއޭއީގެ އީގަލް ހިލްސް ކުންފުންޏާއެކު ދިވެހި ސަރުކާރުން ވެފައިވާ ވިޔަފާރި އެއްބަސްވުމަކީ ގާނޫނުއަސާސީއާ ޚިލާފު އެއްބަސްވުމެއް ކަމަށް ކަނޑައަޅައި، އެ އެއްބަސްވުން ބާތިލުކުރުމަށް އެދި ދިވެހިރާއްޖޭގެ ސުޕްރީމް ކޯޓަށް ދުސްތޫރީ މައްސަލައެއް ވެސް މިހާރު ވަނީ ހުށަހަޅައިފައެވެ.
ކޯޓަށް ހުށަހެޅި މައްސަލައިގައި ބަޔާންކޮށްފައި ވަނީ، ދައުލަތުގެ މުދަލެއް ނުވަތަ މިލްކިއްޔާތެއް ކުއްޔަށް ދިނުމާއި ދޫކުރުން ފަދަ ކަންކަން ކުރަންވާނީ ގާނޫނުގައިވާ ގޮތުގެ މަތިން ކަމަށް ގާނޫނުއަސާސީގެ 250 ވަނަ މާއްދާގައި ބަޔާންކޮށްފައި އޮންނަ ކަމަށެވެ. ނަމަވެސް ބޭރުގެ ފަރާތަކަށް އެއްފަހަރާ 99 އަހަރަށް މިފަދައިން ދައުލަތުގެ ބިން ދޫކުރެވޭނެ ގާނޫނީ އޮނިގަނޑެއް ނެތުމުން، މި އެއްބަސްވުމަކީ ގާނޫނުއަސާސީއާ ސީދާ ޚިލާފު ކަމެއް ކަމަށް ވަނީ ފާހަގަކޮށްފައެވެ.
އެހެންނަމަވެސް މި މަޝްރޫއުގެ ސަބަބުން ރާއްޖެއަށް އެއްވެސް ގެއްލުމެއް ކުރިމަތިނުވާނެކަމަށާއި، ރާއްޖޭގެ ޖީޑީޕީ މަތިވެ، ރާއްޖޭގެ އިގްތިސާދާއި ރައްޔިތުންނަށް ލިބޭނީ ބޮޑުތަނުން ކުރިއެރުންކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ވިދާޅުވެފައެވެ.
ހަމައެއާއެކު ރަސްމާލޭގައި ހިންގުމަށް ރާވާފައިވާ ބޮޑު މަޝްރޫއު ހިންގާނީ މިހާރު އެކުލަވާލަމުން އަންނަ ރިއަލް އެސްޓޭޓް ގާނޫނުގެ ދަށުން ކަމަށާއި، ގާނޫނުއަސާސީއާއި ގާނޫނުތަކާ ޚިލާފު އެއްވެސް ކަމެއް ސަރުކާރުން ނުކުރާނެ ކަމަށް ބަންޑާރަނައިބު އަހުމަދު އުޝާމް ވެސް ވަނީ ވިދާޅުވެފައެވެ. އަދި ރަސްމާލެ މަޝްރޫއުން 10 އަހަރު ތެރޭ ދައުލަތަށް 11 ބިލިއަން ޑޮލަރުގެ އާމްދަނީއެއް ލިބޭނެ ކަމަށް ފިނޭންސް މިނިސްޓަރު ހަސަން ޒަރީރު ވެސް ވަނީ ވިދާޅުވެފައެވެ.