ރަސްމާލެ މަޝްރޫއުން 10 އަހަރު ތެރޭ ދައުލަތަށް 11 ބިލިއަން ޑޮލަރުގެ އާމްދަނީއެއް ލިބޭނެ ކަމަށް ފިނޭންސް މިނިސްޓަރު ހަސަން ޒަރީރު ވިދާޅުވެއްޖެއެވެ.
އަބޫދާބީގެ މަޝްހޫރު ޑިވެލޮޕަރު، އީގަލް ހިލްސް އާއި ދިވެހި ސަރުކާރާ ދެމެދު ރާއްޖޭގައި 20 ބިލިއަން ޑޮލަރު ނުވަތަ ގާތްގަނޑަކަށް 308 ބިލިއަން ރުފިޔާގެ ވޯޓާފްރަންޓް އަދި މެރީނާ މަޝްރޫއެއް ތަރައްގީކުރުމަށް އެއްބަސްވުމެއްގައި ސޮއިކުރީ މި މަހުގެ 21ގައެވެ. މިއީ ރާއްޖޭގެ ތާރީޚުގައި ވެސް ހިންގަން ހުށަހެޅުނު ބޭރުގެ އެންމެ ބޮޑު އެއް އިންވެސްޓްމަންޓް މަޝްރޫއެވެ.
މި މަޝްރޫއާ ގުޅޭގޮތުން ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ޒަރީރު ވިދާޅުވީ ރަސްމާލޭގައި ތަރައްގީކުރާ މޯލްޑިވްސް ވޯޓާފްރަންޓް އެންޑް މެރީނާ މަޝްރޫއުގެ 10 އަހަރުގެ ތަރައްގީގެ މުއްދަތުގެ ތެރޭގައި ދައުލަތަށް އާމްދަނީގެ ގޮތުގައި 11 ބިލިއަން އެމެރިކާ ޑޮލަރަށްވުރެ ގިނަ އަދަދެއް ލިބޭނެ ކަމަށް ލަފާކުރެވޭ ކަމަށެވެ. އަދި މިއީ އަހަރަކު އެވްރެޖުކޮށް ގާތްގަނޑަކަށް 1.1 ބިލިއަން އެމެރިކާ ޑޮލަރު ކަމަށް އޭނާ ވިދާޅުވިއެވެ.
https://x.com/Finance_Min_MV/status/2105278534923268207
ޒަރީރު ވިދާޅުވި ގޮތުގައި އަހަރަކު ލިބޭނެ ކަމަށް ލަފާކުރާ މި އާމްދަނީއަކީ 179 ރިޒޯޓާއި، 16 ހޮޓަލާއި، 920 ގެސްޓްހައުސްގެ އިތުރުން 165 ސަފާރީ އުޅަންދުން ދައުލަތަށް އަހަރަކު ލިބޭ މުޅި އާމްދަނީއަށްވުރެ އިތުރު އަދަދެކެވެ. އަދި މިއިން ރަމްޒުކޮށްދެނީ ދައުލަތުގެ މާލިއްޔާތު ވަރުގަދަކުރުމަށާއި ރާއްޖޭގެ ދުރުރާސްތާ ތަރައްގީއަށް އެހީތެރިވުމުގައި މި މަޝްރޫއުގެ ގާބިލުކަން ކަމަށް އޭނާ ވިދާޅުވިއެވެ.
ރަސްމާލެ އެއްބަސްވުމުގެ ދަށުން ދައުލަތަށް އާމްދަނީ ލިބެން ކަނޑައެޅިފައި ވަނީ އާންމު އުސޫލުން ނެގޭ ޓީޖީއެސްޓީގެ އިތުރުން، މާސްޓާ ޑިވެލޮޕަރުގެ ފުރަތަމަ ވިއްކުންތަކާއި ކުއްޔަށްދިނުންތަކުން ލިބޭ އާމްދަނީގެ 10 އިންސައްތައިން ކަމަށް ޒަރީރު ވިދާޅުވިއެވެ. އަދި ފުރަތަމަ ގަންނަ ފަރާތްތަކުންނާއި އޭގެފަހުން އެހެން ފަރާތްތަކަށް މިލްކުވެރިކަން ބަދަލުކުރާއިރު މުދަލުގެ އަގުގެ ހަތަރު އިންސައްތައިގެ ފީއެއްގެ ގޮތުގައި ވެސް ދައުލަތަށް ނަގާނެ ކަމަށް އޭނާ ވިދާޅުވިއެވެ.
މި އެއްބަސްވުމުގެ ދަށުން އެއްވެސް ޓެކްސް އިނާޔަތެއް ނުވަތަ ޑިއުޓީ އިސްތިސްނާއެއް ދީފައެއް ނުވާނެ ކަމަށާއި އަދި މި ތަރައްގީގެ މަޝްރޫއަށް ސަރުކާރުން އެއްވެސް ލޯނެއް ނުނަގާނެ ކަމަށް ޒަރީރު ވިދާޅުވިއެވެ. އެހެންކަމުން ދައުލަތަށް މާލީ އިލްތިޒާމްތަކެއް އުފެދުމެއް ނެތި، ދައުލަތުގެ އާމްދަނީއަށް މި މަޝްރޫއުން ފައިދާ ކުރާނެކަން ކަށަވަރުވާ ކަމަށް ޒަރީރު ވިދާޅުވިއެވެ.
ހަމައެއާއެކު ރަސްމާލެ އެއްބަސްވުމުގެ ދަށުން، މުދާ ވިއްކައިގެން ލިބޭ އެންމެހައި ފައިސާއެއް ބަހައްޓާނީ ރާއްޖޭގައި ގާއިމުކުރެވޭ އެސްކްރޯ އެކައުންޓެއްގައި ކަމަށް ޒަރީރު ވިދާޅުވިއެވެ. އަދި އެ ފައިސާ ދޫކުރުން ބިނާވެގެންވަނީ އެއްބަސްވުމުގައިވާ ގޮތުގެ މަތިން ކަމަށާއި މީގެ އިތުރުން މަޝްރޫއުގެ އެންމެހައި ފައިސާގެ މުއާމަލާތްތައް ހިންގަންޖެހޭނީ ދިވެހިރާއްޖޭގެ ބޭންކުތައް މެދުވެރިކޮށް ކަމަށް ވެސް ޒަރީރު ވިދާޅުވިއެވެ.
ރަސްމާލެ އެއްބަސްވުމުގައި ރޭވިފައިވަނީ 500 ހެކްޓަރުގެ ބިމެއްގައި، ގާތްގަނޑަކަށް 10 އަހަރު ދުވަހުގެ މުއްދަތަކަށް ބަހާލައިގެން، 20 ބިލިއަން އެމެރިކާ ޑޮލަރުގެ ވޯޓާފްރަންޓް އަދި މެރީނާ މަޝްރޫއެއް ތަރައްގީކުރުމަށް. މީގެ ތެރޭގައި ގޭގެއާއި، ހޮޓާތަކާއި، ރިޒޯޓުތަކާއި، މެރީނާއާއި، ފިހާރަތަކާއި، އޮފީސްތަކުގެ އިތުރުން ތައުލީމީ އަދި ސިއްހީ ޚިދުމަތްދޭ ވަސީލަތްތައް ހިމެނޭނެ، ފިނޭންސް މިނިސްޓަރު ހަސަން ޒަރީރު
މިނިސްޓަރު ވިދާޅުވި ގޮތުގައި ގާތްގަނޑަކަށް 10 އަހަރުގެ ތެރޭގައި މަޝްރޫއު މުޅިން ފުރިހަމަވުމުން، އަހަރަކު އެއް މިލިއަނަށްވުރެ ގިނަ ފަތުރުވެރިން ޒިޔާރަތްކުރާނެ ކަމަށް ލަފާކުރެވެއެވެ. އަދި އިގްތިސާދަށް ފަތުރުވެރިކަމުގެ އާމްދަނީގެ ގޮތުގައި އަހަރަކު ގާތްގަނޑަކަށް ދެ ބިލިއަން އެމެރިކާ ޑޮލަރު ވަންނާނެ ކަމަށް ބެލެވޭ ކަމަށް ވިދާޅުވިއެވެ.
ޒަރީރު ވިދާޅުވީ މިއީ ރާއްޖޭގެ ފަތުރުވެރިކަމުގެ ދާއިރާ ވަރުގަދަވެ، ދުރުރާސްތާގެ އިގްތިސާދީ ކުރިއެރުމަށް ބޮޑު ބާރަކަށް ވެގެންދާނެ ކަމެއް ކަމަށެވެ.
އީގަލް ހިލްސް އާއި ދިވެހި ސަރުކާރާ ދެމެދު ރާއްޖޭގައި 20 ބިލިއަން ޑޮލަރު ނުވަތަ ގާތްގަނޑަކަށް 308 ބިލިއަން ރުފިޔާގެ ވޯޓާފްރަންޓް އަދި މެރީނާ މަޝްރޫއެއް ތަރައްގީކުރުމަށް ސޮއިކުރުން --- ފޮޓޯ: ހައުސިން މިނިސްޓްރީރަސްމާލެ މަޝްރޫއުގެ ދަށުން ޔޫއޭއީގެ އީގަލް ހިލްސް ކުންފުންޏާއެކު ދިވެހި ސަރުކާރުން ވެފައިވާ ވިޔަފާރި އެއްބަސްވުމަކީ ގާނޫނުއަސާސީއާ ޚިލާފު އެއްބަސްވުމެއް ކަމަށް ކަނޑައަޅައި، އެ އެއްބަސްވުން ބާތިލުކުރުމަށް އެދި ދިވެހިރާއްޖޭގެ ސުޕްރީމް ކޯޓަށް ދުސްތޫރީ މައްސަލައެއް ވެސް މިހާރު ވަނީ ހުށަހަޅައިފައެވެ.
ކޯޓަށް ހުށަހެޅި މައްސަލައިގައި ބަޔާންކޮށްފައި ވަނީ، ދައުލަތުގެ މުދަލެއް ނުވަތަ މިލްކިއްޔާތެއް ކުއްޔަށް ދިނުމާއި ދޫކުރުން ފަދަ ކަންކަން ކުރަންވާނީ ގާނޫނުގައިވާ ގޮތުގެ މަތިން ކަމަށް ގާނޫނުއަސާސީގެ 250 ވަނަ މާއްދާގައި ބަޔާންކޮށްފައި އޮންނަ ކަމަށެވެ. ނަމަވެސް ބޭރުގެ ފަރާތަކަށް އެއްފަހަރާ 99 އަހަރަށް މިފަދައިން ދައުލަތުގެ ބިން ދޫކުރެވޭނެ ގާނޫނީ އޮނިގަނޑެއް ނެތުމުން، މި އެއްބަސްވުމަކީ ގާނޫނުއަސާސީއާ ސީދާ ޚިލާފު ކަމެއް ކަމަށް ވަނީ ފާހަގަކޮށްފައެވެ.
އެހެންނަމަވެސް މި މަޝްރޫއުގެ ސަބަބުން ރާއްޖެއަށް އެއްވެސް ގެއްލުމެއް ކުރިމަތިނުވާނެކަމަށާއި، ރާއްޖޭގެ ޖީޑީޕީ މަތިވެ، ރާއްޖޭގެ އިގްތިސާދާއި ރައްޔިތުންނަށް ލިބޭނީ ބޮޑުތަނުން ކުރިއެރުންކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ވިދާޅުވެފައެވެ.
ހަމައެއާއެކު ރަސްމާލޭގައި ހިންގުމަށް ރާވާފައިވާ ބޮޑު މަޝްރޫއު ހިންގާނީ މިހާރު އެކުލަވާލަމުން އަންނަ ރިއަލް އެސްޓޭޓް ގާނޫނުގެ ދަށުން ކަމަށާއި، ގާނޫނުއަސާސީއާއި ގާނޫނުތަކާ ޚިލާފު އެއްވެސް ކަމެއް ސަރުކާރުން ނުކުރާނެ ކަމަށް ބަންޑާރަނައިބު އަހުމަދު އުޝާމް ވެސް ވަނީ ވިދާޅުވެފައެވެ.