ށ. މިލަންދޫގައި އަނބިމީހާ ފަލައޭ ބުނި ކަމަށް ބުނެ ތޫނު ހަތިޔާރާއެކު މާރާމާރީ ހިންގަން އުޅުނު ކަމަށް ތުހުމަތު ކުރެވޭ މީހާގެ މައްޗަށް ކުޑަ އަދަބެއް އަންނަ ދައުވާތަކެއް ޕްރޮސިކިއުޓާ ޖެނެރަލް (ޕީޖީ) އޮފީހުން އުފުލުމުން، ހަރުކަށި ޝަރުތުތަކާއެކު އޭނާ ބަންދުން ދޫކޮށްލަން މިލަންދޫ މެޖިސްޓްރޭޓް ކޯޓުން އަމުރުކޮށްފިއެވެ.
މި މައްސަލައިގައި ދައުވާކޮށް ބަންދުން ދޫކޮށްލާފައިވަނީ ށ. މިލަންދޫއަށް ނިސްބަތްވާ އުމުރުން 22 އަހަރުގެ ޒުވާނެކެވެ. އެ ޒުވާނާ ހައްޔަރުކުރީ 15 އޮގަސްޓު 2026 ވިލޭރޭ، ށ. މިލަންދޫ ސައުޓަންވިލާ ގޭގެ ކުރިމަތިން ތޫނު ހަތިޔާރު ބޭނުންކޮށްގެން މާރާމާރީ ހިންގަން އުޅުނު ކަމުގެ ތުހުމަތުގައެވެ. ތަހުގީގު މަރުހަލާގައި އޭނާ ބަންދުގައި ބަހައްޓާފައިވަނީ "ގޭންގުތަކުން ހިންގާ ކުށްތަކާއި އެ ނޫންވެސް ނުރައްކާތެރި ކުށްތައް ހުއްޓުވުމުގެ ގާނޫނު" ގެ ދަށުންނެވެ.
ނަމަވެސް، ތަހުގީގު ނިންމައި އިއްޔެ ޕީޖީ އޮފީހުން މިލަންދޫ މެޖިސްޓްރޭޓް ކޯޓަށް ދައުވާ ހުށަހެޅިއިރު، އޭނާގެ މައްޗަށް އުފުލާފައިވަނީ ދިވެހިރާއްޖޭގެ ގާނޫނުލްއުގޫބާތުގެ ދަށުން އަނިޔާއެއް ދީފާނެ ކަމުގެ ބިރުދެއްކުމުގެ ކުށުގެ ދައުވާ އަދި ބަނގުރާ ބުއިމުގެ ކުށުގެ ދައުވާއެވެ.
އިސް މެޖިސްޓްރޭޓް ޙަސަން ޝިޔާމް ނެރުއްވި ކޯޓު އަމުރުގައި ފާހަގަކުރައްވާފައިވާ ގޮތުގައި، ޒުވާނާ ބަންދުން ދޫކޮށްލަން ނިންމެވި މުހިންމު ސަބަބަކީ ދައުލަތުން މިހާރު އުފުލާފައިވާ ދައުވާތަކަކީ ނިސްބަތުން ކުޑަ އަދަބެއް އަންނަ، އަދި ޖިނާއީ އިޖުރާއަތުގެ ގާނޫނުގެ ދަށުން "ޖިނާއީ ބޮޑު ކުށެއް" ކަމަށް ނުބެލެވޭ ދައުވާތަކަކަށް ވުމެވެ.
އޭގެ އިތުރުން، ޕީޖީ އޮފީހުގެ ފަރާތުންވެސް ޝަރުތުތަކެއް ކުރުމަށްފަހު އޭނާ ބަންދުން ދޫކޮށްދިނުމަށް ކޯޓުގައި އެދިފައިވުމާއި، ތަހުގީގު މަރުހަލާއިން ފެށިގެން ދައުވާކުރުމާ ހަމައަށް އޭނާ ބަންދުގައި ގިނަ ދުވަސްތަކެއް ހޭދަކޮށްފައިވާކަން ކޯޓު އަމުރުގައި ފާހަގަކޮށްފައިވެއެވެ. އަދި ހަރުކަށި ޝަރުތުތަކެއް ކޮށްގެން ބަންދުން ދޫކޮށްލުމުން ހެކިންނަށް ނުފޫޒު ފޯރުވުމާއި މުޖުތަމައުގެ ސަލާމަތަށް އޮތް ނުރައްކާ ނައްތާލެވޭނެ ކަމަށް ޝަރީއަތަށް ގަބޫލުކުރެވޭ ކަމަށްވެސް ބަޔާންކޮށްފައިވެއެވެ.
މި ނުކުތާތަކަށް ރިއާޔަތްކުރުމަށްފަހު، މިލަންދޫ މެޖިސްޓްރޭޓް ކޯޓުން ވަނީ އިއްޔެގެ ހެނދުނު 11:45 ގައި އޭނާ ބަންދުން ދޫކޮށްލުމަށް ފުލުހުންގެ މައްޗަށް އަމުރުކޮށްފައެވެ.