އެމެރިކާގެ 10 އަހަރުގެ ޓްރެޝަރީ ޔީލްޑް 5.34 ޕަސެންޓަށް އުފުލި، ފާއިތުވި 24 އަހަރު ދުވަހުގެ ތެރޭގައި ނުދާހާ މައްޗަށް ހިނގައްޖެއެވެ.
ރޮއިޓާސްއިން ރިޕޯޓުކޮށްފައިވާ ގޮތުގައި، އިއްޔެ ދުނިޔޭގެ ބޮންޑު މާކެޓަށް އައި ބޮޑު ލޮޅުމާއެކު، އެމެރިކާއިން ފެށިގެން ފަރަންސޭސިވިލާތާއި ޖަޕާނާ ހަމައަށް ވެސް ސަރުކާރުތަކުން ދަރަންޏަށް ފައިސާ ހޯދުމުގެ އަގު ވަނީ އެތައް ދިހަ އަހަރެއްގެ ރެކޯޑު މިންވަރަކަށް އުފުލިފައެވެ.
ބޮންޑު ޔީލްޑަކީ ސަރުކާރުތަކުން ނުވަތަ ކުންފުނިތަކުން ދަރަންޏަށް ފައިސާ ހޯދުމަށް ވިއްކާ ބޮންޑުތަކުން އިންވެސްޓަރުންނަށް ލިބޭ ފައިދާގެ ނިސްބަތެވެ. އާންމު ގޮތެއްގައި ބޮންޑުގެ އަގު ދަށްވުމުން އޭގެ ޔީލްޑް މައްޗަށް ދެއެވެ. ޔީލްޑް މައްޗަށް ދިއުމަކީ ދަރަންޏަށް ފައިސާ ނަގާ ފަރާތްތަކުން އިންޓަރެސްޓުގެ ގޮތުގައި ދައްކަންޖެހޭ މިންވަރު ބޮޑުވެ، މާލީ ބުރަ ބޮޑުވުމެވެ.
އެމެރިކާގެ ބެންޗްމާކް ޔީލްޑް ފަހުން 5.26 ޕަސެންޓަށް ތިރިވި ނަމަވެސް، މާކެޓުގެ ހާލަތު އަދިވެސް އޮތީ ނާޒުކު ފައްތަރެއްގައެވެ. ފަރަންސޭސިވިލާތުގެ ސަރުކާރުން އަންނަ އަހަރުގެ ބަޖެޓު ހުށަހަޅަން ތައްޔާރުވަމުންދާއިރު، އެ ގައުމުގެ 10 އަހަރުގެ ބޮންޑު ޔީލްޑް ވަނީ 2002 ވަނަ އަހަރަށް ފަހު ފުރަތަމަ ފަހަރަށް ފަސް ޕަސެންޓާ ގާތްކޮށްފައެވެ. ފަރަންސޭސިވިލާތާއި ޖަރުމަނުވިލާތުގެ 10 އަހަރުގެ ބޮންޑު ޔީލްޑްގެ ފަރަގު ވަނީ 2010 ގެ އަހަރުތަކުގައި ޔޫރޯ ޒޯނަށް ކުރިމަތިވި ދަރަނީގެ ކާރިސާއަށް ފަހު ނުދާހާ މައްޗަށް ގޮސްފައެވެ. އަދި ފަރަންސޭސިވިލާތް ޑިފޯލްޓްވެދާނެ ކަމުގެ ނުރައްކަލުން ސަލާމަތްވުމަށް ކުރަންޖެހޭ ހަރަދު ވެސް ވަނީ 2013 ވަނަ އަހަރަށް ފަހު އެންމެ މައްޗަށް އުފުލިފައެވެ.
މީގެ އިތުރުން، އިނގިރޭސިވިލާތުގެ 30 އަހަރުގެ ސަރުކާރު ބޮންޑުގެ ޔީލްޑް ހަ ޕަސެންޓަށް ވުރެ މައްޗަށް ގޮސްފައިވާއިރު، މިއީ 1998 ވަނަ އަހަރަށް ފަހު މި ނިސްބަތް މިހާ މައްޗަށް ދިޔަ ފުރަތަމަ ފަހަރެވެ. ޖަޕާނުގައި ވެސް އިންފްލޭޝަން މައްޗަށް ދިއުމާއެކު، ސަރުކާރުގެ ބޮންޑު ޔީލްޑްތައް ވަނީ ވިދިވިދިގެން ފަސް ކުއާޓަރުގައި ދެ އަކުރުގެ ކުރިއެރުމެއް ހޯދާފައެވެ.
އެޗްއެސްބީސީގެ ޗީފް އޭޝިއާ އިކޮނޮމިސްޓް ފްރެޑް ނިއުމަން ވިދާޅުވި ގޮތުގައި، މާކެޓުތަކުން މިހާރު ރިއާކްޓްކުރަމުން ދަނީ އަމާޒުކޮށްފައިވާ މިންވަރަށް ވުރެ މަތީގައި އިންފްލޭޝަން ހުންނަތާ އެތައް އަހަރެއް ވެފައިވުމުންނެވެ. ހަކަތައިގެ އަގުތައް އުފުލުމާއި، އާޓިފިޝަލް އިންޓެލިޖެންސް (އޭއައި) އަދި ޑޭޓާ ސެންޓަރުތައް ބިނާކުރުމަށް ބޮޑެތި އިންވެސްޓްމަންޓްތަކެއް ބޭނުންވުމުގެ ސަބަބުން، ކެޕިޓަލް ހޯދުމުގެ ވާދަވެރިކަން ވަނީ ބޮޑުވެފައެވެ.
މީގެ ނަތީޖާއެއްގެ ގޮތުން، އެމެރިކާގެ ފެޑެރަލް ރިޒާވްއިން އަންނަ އަހަރުގެ މެދުތެރެއާ ހަމައަށް މަދުވެގެން އިތުރު ތިން ފަހަރު އިންޓަރެސްޓް ރޭޓު ބޮޑުކުރާނެ ކަމަށް ޓްރޭޑަރުން މިހާރު ލަފާކުރެއެވެ. އަދި ޔޫރަޕިއަން ސެންޓްރަލް ބޭންކުން ވެސް މި މުއްދަތުގެ ތެރޭގައި އިތުރު ތިން ފަހަރު ރޭޓުތައް މައްޗަށް ޖައްސާނެ ކަމަށް މާކެޓުން ލަފާކުރެއެވެ.
އިންޓަރެސްޓް ރޭޓުތައް މަތިވުމުގެ ސަބަބުން ކުންފުނިތަކަށާއި ގެދޮރު ގަންނަ ފަރާތްތަކަށް ފައިސާ ހޯދުމުގެ އަގު ބޮޑުވެ، ސަރުކާރުތަކުން ދަރަނީގެ އިންޓަރެސްޓަށް ކުރާ ހޭދަ ވަނީ އިތުރުވެފައެވެ. ވޮޝިންޓަންގައި ހުންނަ އިންސްޓިޓިއުޓް އޮފް އިންޓަނޭޝަނަލް ފައިނޭންސް (އައިއައިއެފް) އިން އަންދާޒާކުރާ ގޮތުގައި، ފާއިތުވި އަހަރުގެ ތެރޭގައި ކުރިއަރާފައިވާ ގައުމުތަކުން ބައިނަލްއަގުވާމީ ގޮތުން ވިޔަފާރިކުރާ ސަރުކާރު ބޮންޑުތަކުގެ އިންޓަރެސްޓަށް އެކަނި ވެސް 3.3 ޓްރިލިއަން ޑޮލަރު ވަނީ ހޭދަކޮށްފައެވެ. މިއީ މުޅި ދުނިޔޭގައި އޭއައިއަށް ހޭދަކުރި 2.6 ޓްރިލިއަން ޑޮލަރަށް ވުރެ ވެސް ބޮޑު އަދަދެކެވެ.
ޓްވެންޓީފޯ އެސެޓް މެނޭޖްމަންޓްގެ ޕޯޓްފޯލިއޯ މެނޭޖަރު ޑެނީ ޒައިޑް ވިދާޅުވި ގޮތުގައި، ޔީލްޑްތައް މައްޗަށް ދިއުމަކީ މާލީ ހާލަތު ދަތިވެ، އިގުތިސާދީ ދުވެލި މަޑުޖެހުމުގެ ނުރައްކާ ބޮޑުވެދާނެ ކަމެކެވެ. ޚާއްސަކޮށް އާމްދަނީ މަދު ފަރާތްތަކަށް މީގެ ނޭދެވޭ އަސަރުތައް ކުރަމުންދާ ކަމަށް އޭނާ ފާހަގަކުރިއެވެ. މީގެ އިތުރުން، ކުންފުނިތަކުން ދަރަނި އަދާނުކުރެވިދާނެ ކަމުގެ ބިރު އިންވެސްޓަރުންގެ މެދުގައި އޮތް މިންވަރު ހާމަކޮށްދޭ ކްރެޑިޓް ޑިފޯލްޓް ސްވޮޕްސް އިންޑެކްސް ވެސް ވަނީ އޭޕްރީލް މަހުގެ ކުރީކޮޅަށް ފަހު އެންމެ މައްޗަށް ގޮސްފައެވެ.