މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ޑިރެކްޓަރުންގެ ބޯޑުގެ މެންބަރުކަމުން، އެ ކުންފުނީގެ އެގްޒެކްޓިވް ޑިރެކްޓަރު، ހ. ފިނޮޅު، މުޙައްމަދު މިހާދު އަދި ނޮން-އެގްޒެކްޓިވް ޑިރެކްޓަރު، މ. ވެލާލުގެ، ސަޙަރު ވަޙީދު ވަކިކޮށްފިއެވެ.
ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ބުނީ، އެ ދެ ބޭފުޅުން ވެސް އެމްއޭސީއެލްގެ ޑިރެކްޓަރުންގެ ބޯޑުގެ މެންބަރުކަމުން ވަކިކޮށްފައިވަނީ މިއަދުން ފެށިގެން ކަމަށެވެ.
އެމްއޭސީއެލްގެ ބޯޑަށް 26 އެޕްރީލް 2025 ގައި އައްޔަންކުރެއްވި މުޙައްމަދު މިހާދަކީ އެ ކުންފުނީގެ ޗީފް ކޮމާޝަލް އޮފިސަރު (ސީސީއޯ) ގެ މަގާމު ވެސް ފުރުއްވަމުން ގެންދަވާ ބޭފުޅެކެވެ. މާލީ އަދި ހިންގުމުގެ ދާއިރާގައި ގިނަ އަހަރުތަކެއްގެ ތަޖުރިބާ ހުންނެވި މިހާދަކީ ޔޫކޭގެ ސީމާ ޗާޓަޑް މެނޭޖްމަންޓް އެކައުންޓެންޓެކެވެ. މީގެއިތުރުން، އޭނާ ވަނީ މީގެކުރިން އެސްޓީއޯގެ ސީއެފްއޯގެ މަގާމާއި، އެ ކުންފުނީގެ ބޯޑު މެންބަރުކަމުގެ އިތުރުން މިފްކޯ އަދި އެމްއެސްއެސްގެ ބޯޑު މެންބަރުކަން ކުރައްވާފައެވެ. އަދި އެފްއެސްއެމްގެ ޗެއާމަންކަމާއި ކޭޕީއެމްޖީ މޯލްޑިވްސްގެ ޕާޓްނަރެއްގެ ގޮތުގައި ވެސް އޭނާ ވަނީ މަސައްކަތް ކުރައްވާފައެވެ.
ބޯޑުން ވަކިކުރެއްވި ސަޙަރު ވަޙީދަކީ 24 ޑިސެމްބަރު 2023 ގައި އެމްއޭސީއެލްގެ ބޯޑަށް އައްޔަންކުރެވުނު ބޭފުޅެކެވެ. މާލީ ދާއިރާގެ އިސް މަގާމުތަކުގައި 17 އަހަރަށްވުރެ ގިނަ ދުވަހު ޚިދުމަތް ކުރައްވާފައިވާ ސަޙަރަކީ ޗާޓަޑް ބޭންކަރެކެވެ. އޭނާ ވަނީ އިނގިރޭސިވިލާތުގެ ލަންޑަން ސްކޫލް އޮފް އިކޮނޮމިކްސް (އެލްއެސްއީ) އިން އިކޮނޮމިކްސްގެ ދާއިރާއިން ފުރަތަމަ ޑިގްރީ އަދި ޔުނިވާސިޓީ އޮފް ވެސްޓް އިންގްލެންޑުން ކޮމާޝަލް ލޯގެ ދާއިރާއިން މާސްޓަސް ހާސިލުކުރައްވާފައެވެ. ސަޙަރަކީ ރިސްކް މެނޭޖްމަންޓާއި ކޮމްޕްލަޔަންސް އަދި އޮޕަރޭޝަންސްގެ ދާއިރާއިން ފާހަގަކޮށްލެވޭ ކާމިޔާބީތަކެއް ހޯއްދަވާފައިވާ ބޭފުޅެކެވެ.
މި ދެ ބޭފުޅުން ބޯޑުން ވަކިކުރި ނަމަވެސް، އެ ބަދަލު ގެނައި ސީދާ ސަބަބެއް ޕީސީބީން ހާމަކޮށްފައެއް ނުވެއެވެ.