އަރަބި ކަނޑުގައި އިންޑިއާގެ ކޯސްޓްގާޑާއި ގުޖަރާތުގެ އެންޓި-ޓެރަރިޒަމް ސްކޮޑް (އޭޓީއެސް) ގުޅިގެން ހިންގި ހާއްސަ އޮޕަރޭޝަނެއްގައި، މަލިކު ކައިރިން، އީރާނުގެ ބޯޓެއް ހުއްޓުވައި ޕާކިސްތާނުގެ ފަސް މީހަކު ހައްޔަރުކޮށްފިއެވެ.
މި އޮޕަރޭޝަނުގައި އެ ބޯޓުން ގިނަ އަދަދެއްގެ މަސްތުވާތަކެތި އަތުލައިގެންފައިވާ ކަމަށް އިންޑިއާގެ ކޯސްޓްގާޑުން މިއަދު ނެރުނު ބަޔާނެއްގައި ވަނީ ބުނެފައެވެ.
ލަކްޝަދީޕުގެ ހުޅަނގުން އަރަބި ކަނޑުގެ ސަރަހައްދުގައި މިދިޔަ ހުކުރު ދުވަހު ހިންގި މި އޮޕަރޭޝަނުގައި އަތުލައިގަތް މަސްތުވާތަކެތީގެ ތެރޭގައި 526 ކިލޯގެ ހައި-ގްރޭޑް ހެރޮއިން އަދި މެތަމްފެޓަމީން (މެތު) ހިމެނެއެވެ. އިންޑިއާގެ ކޯސްޓްގާޑުން ބުނި ގޮތުގައި، ބައިނަލްއަގުވާމީ ބާޒާރުގައި މި ތަކެތީގެ އަގު 3،000 ކްރޯޑް ރުޕީސްއަށް ވުރެ މައްޗަށް އަރައެވެ.
ގިނަ އަދަދެއްގެ މަސްތުވާތަކެއްޗާއެކު އަތުލައިގަތް ބޯޓް-- ފޮޓޯ: އިންޑިއާ ކޯސްޓްގާޑްމި އޮޕަރޭޝަން ހިންގާފައިވަނީ ގުޖަރާތު އޭޓީއެސްއަށް ލިބުނު އިންޓެލިޖެންސް މައުލޫމާތަކާ ގުޅިގެންނެވެ. އެގޮތުން، ކަނޑުމަތިންނާއި ވައިގެ މަގުން އެ ބޯޓަށް ފާރަލުމަށްފަހު، ކޯސްޓްގާޑުގެ އުޅަނދުތަކުން ވަނީ އެ ބޯޓު ފަހައިގޮސް ހުއްޓުވައިފައެވެ. އަދި ކޯސްޓްގާޑުގެ ކޮމާންޑޯއިން ބޯޓަށް އަރައި ފާސްކުރުމުގެ ތެރޭގައި މި ތަކެތި ވަނީ ހޯދާފައެވެ.
މި މައްސަލައިގައި ހައްޔަރުކުރި ޕާކިސްތާނުގެ ފަސް މީހުންނާއި އަތުލައިގަތް އީރާނުގެ ބޯޓު އަދި މަސްތުވާތަކެތި މިހާރު ވަނީ ހަތިޔާރުއެޅި ސިފައިންގެ ބެލުމުގެ ދަށުން މުމްބާއީއަށް ގެންގޮސްފައެވެ. ގުޖަރާތު އޭޓީއެސްއާއި، ކޯސްޓްގާޑާއި، ނާކޮޓިކްސް ކޮންޓްރޯލް ބިއުރޯ (އެންސީބީ) އަދި މަރުކަޒީ އެހެން އިދާރާތައް ގުޅިގެން ހިންގާ ތަހުގީގުގައި، މި ތަކެތި އެތެރެކުރަން އުޅުނު ބައިނަލްއަގުވާމީ ނެޓްވޯކް ހޯދުމަށް އެ މީހުންނާ ސުވާލުކުރަމުންދާ ކަމަށް އިންޑިއާގެ ކަމާބެހޭ ފަރާތްތަކުން ބުނެއެވެ.
މިހާތަނަށް މި މީހުންގެ ވަނަވަރު އާންމުކޮށްފައެއް ނުވެއެވެ.
މިއީ އަރަބި ކަނޑުގެ މަގުން އިންޑިއާއަށް މަސްތުވާތަކެތި އެތެރެކުރުން ހުއްޓުވުމަށް އެ ގައުމުގެ ސަލާމަތީ ބާރުތަކުން ފަހުގެ ތާރީހެއްގައި ހިންގި އެންމެ ބޮޑު އެއް އޮޕަރޭޝަނެވެ.
ގިނަ އަދަދެއްގެ މަސްތުވާތަކެއްޗާއެކު އަތުލައިގަތް ބޯޓް-- ފޮޓޯ: އިންޑިއާ ކޯސްޓްގާޑްއިންޑިއާގެ ކޯސްޓްގާޑުން ފާހަގަކުރި ގޮތުގައި، މި އޮޕަރޭޝަނުގެ ސަބަބުން ބައިނަލްއަގުވާމީ ޑްރަގް ސިންޑިކޭޓްތަކުގެ މާލީ ނެޓްވޯކަށް ބޮޑު ހުރަހެއް އެޅިގެންދާނެއެވެ. މީގެ ކުރިން މިދިޔަ އަހަރުގެ އޭޕްރީލް މަހުވެސް ކޯސްޓްގާޑާއި ގުޖަރާތު އޭޓީއެސް ގުޅިގެން ވަނީ ގުޖަރާތުގެ އައްސޭރިފަށުން 307.5 ކިލޯގެ މަސްތުވާތަކެތި އަތުލައިގެންފައެވެ.
އިންޑިއާ ސަރުކާރުން ކުރިއަށްގެންދާ ނަޝާ މުކްތު ބާރަތު އަބިޔާން (މަސްތުވާތަކެތިން ސަލާމަތްވެފައިވާ އިންޑިއާއެއް ބިނާކުރުމުގެ ކެމްޕޭން) ގެ ދަށުން، ކަނޑުމަގުން ހިންގާ މިފަދަ ކުށްތައް ހުއްޓުވުމަށް ސަލާމަތީ ފިޔަވަޅުތައް ވަނީ ވަރުގަދަކޮށްފައެވެ.